43 years in the making: 43 ఏళ్ల తర్వాత నార్వేలో మోదీ పర్యటన.. ఇండియా-నార్డిక్ సంబంధాల్లో కొత్త అధ్యాయం
ఈ వార్తాకథనం ఏంటి
ప్రధాని నరేంద్ర మోదీ సోమవారం నార్వేలో అడుగుపెట్టనున్నారు. మే 18, 19 తేదీల్లో రెండు రోజుల పాటు ఆయన అక్కడ పర్యటించనున్నారు. దాదాపు 43 ఏళ్ల తర్వాత భారత ప్రధాని నార్వేను సందర్శించడం ఇదే తొలిసారి కావడం విశేషం. అంతకుముందు 1983లో మాజీ ప్రధాని ఇందిరాగాంధీ నార్వేకు వెళ్లారు. ప్రస్తుతం ప్రపంచవ్యాప్తంగా భద్రతా,ఆర్థిక పరిస్థితులు మారుతున్న వేళ ఈ పర్యటనకు ప్రత్యేక ప్రాధాన్యం ఏర్పడింది. ఈ సందర్భంగా ఒస్లోలో 3వ ఇండియా-నార్డిక్ సమ్మిట్ జరగనుంది. ఇందులో నార్వే, డెన్మార్క్, ఫిన్లాండ్, ఐస్‌లాండ్, స్వీడన్ దేశాల నాయకులతో ప్రధాని మోదీ సమావేశం కానున్నారు. గ్రీన్ ఎనర్జీ, సముద్ర రంగం, డిజిటల్ టెక్నాలజీ, వాతావరణ మార్పులు, ఆర్కిటిక్ పరిశోధనలు వంటి అంశాలపై ప్రధానంగా చర్చలు జరగనున్నాయి.
వివరాలు
ఇండియా-యూరోపియన్ ఫ్రీ ట్రేడ్ అసోసియేషన్ మధ్య ట్రేడ్ అండ్ ఎకనామిక్ పార్ట్‌నర్‌షిప్ అగ్రిమెంట్
భారత్‌తో సంబంధాలను మరింత బలోపేతం చేయాలని నార్వే భావిస్తోంది.
నార్వే రాయబారి మే-ఎలిన్ స్టెనర్ మాట్లాడుతూ.. భారత్ ప్రస్తుతం ప్రపంచ ఆర్థిక వ్యవస్థలో కీలక భాగస్వామిగా ఎదుగుతోందన్నారు.
ప్రజాస్వామ్యం, టెక్నాలజీ,ఆర్థిక వృద్ధి పరంగా భారత్‌కు ప్రత్యేక స్థానం ఉందని చెప్పారు. ఇండియా-నార్డిక్ సమ్మిట్ ద్వారా భవిష్యత్ భాగస్వామ్యాలకు బలమైన వేదిక సిద్ధమవుతోందన్నారు.
ఇండియా-యూరోపియన్ ఫ్రీ ట్రేడ్ అసోసియేషన్ (EFTA) మధ్య కుదిరిన ట్రేడ్ అండ్ ఎకనామిక్ పార్ట్‌నర్‌షిప్ అగ్రిమెంట్ (TEPA) కూడా ఈ సమావేశంలో ప్రధాన చర్చగా మారింది.
ఈ ఒప్పందం ద్వారా వచ్చే 15 ఏళ్లలో భారత్‌లో 100 బిలియన్ డాలర్ల పెట్టుబడులు పెట్టాలని నిర్ణయించారు.
దీని ద్వారా 10 లక్షలకు పైగా ఉద్యోగాలు వచ్చే అవకాశం ఉందని అంచనా వేస్తున్నారు.
వివరాలు
భారత్-నార్వే సంబంధాల్లో గ్రీన్ ఎనర్జీ, గ్రీన్ షిప్పింగ్‌కు పెద్దపీట
నార్వే ప్రపంచంలోనే అతిపెద్ద సావరిన్ వెల్త్ ఫండ్‌లలో ఒకటైన గవర్నమెంట్ పెన్షన్ ఫండ్ గ్లోబల్ ద్వారా ఇప్పటికే భారత్‌లో భారీగా పెట్టుబడులు పెట్టింది.
ప్రస్తుతం భారత స్టాక్ మార్కెట్‌లో దాదాపు 30.8 బిలియన్ డాలర్ల పెట్టుబడులు ఉన్నాయని నార్వే తెలిపింది.
అయితే ఇవి TEPA ఒప్పందంలో భాగం కావని స్పష్టం చేసింది. ఇక భారత్-నార్వే సంబంధాల్లో గ్రీన్ ఎనర్జీ, గ్రీన్ షిప్పింగ్‌కు పెద్దపీట వేస్తున్నారు.
విద్యుత్ నౌకలు, గ్రీన్ హైడ్రోజన్, గ్రీన్ అమోనియా వంటి రంగాల్లో కలిసి పనిచేయాలని రెండు దేశాలు భావిస్తున్నాయి.
సముద్ర కాలుష్యాన్ని తగ్గించేందుకు 2019లో ప్రారంభించిన ఇండియా-నార్వే మెరైన్ పొల్యూషన్ ఇనిషియేటివ్‌ను 2030 వరకు పొడిగించారు.
వివరాలు
ప్రపంచ శాంతి, స్థిరత్వం కోసం భారత్‌తో పనిచేయాలని భావిస్తున్న నార్డిక్ దేశాలు
ఆర్కిటిక్ ప్రాంతంలో కూడా భారత్ కీలక పాత్ర పోషిస్తోంది.
నార్వేలోని స్వాల్‌బార్డ్ ప్రాంతంలో భారత్ హిమాద్రి రీసెర్చ్ స్టేషన్‌ను నిర్వహిస్తోంది.
ఆర్కిటిక్‌లో మంచు కరుగుదల భారత వర్షాకాలంపై ఎలా ప్రభావం చూపుతోందో భారత శాస్త్రవేత్తలు పరిశోధనలు చేస్తున్నారు.
ఇక ఉక్రెయిన్ యుద్ధం తర్వాత యూరప్ భద్రతా పరిస్థితులు పూర్తిగా మారిపోయాయని నార్వే పేర్కొంది.
ఈ నేపథ్యంలో భారత్ గ్లోబల్ సౌత్, పాశ్చాత్య దేశాల మధ్య వారధిగా నిలుస్తోందని అభిప్రాయపడింది.
ప్రపంచ శాంతి, స్థిరత్వం కోసం భారత్‌తో మరింత దగ్గరగా పనిచేయాలని నార్డిక్ దేశాలు భావిస్తున్నాయి.
ట్విట్టర్ పోస్ట్ చేయండి
ఇండియా-నార్డిక్ సమ్మిట్‌కు రంగం సిద్ధం
#DidYouKNow #IndiaNordicSummit
— Ambassador May-Elin Stener (@NorwayAmbIndia) May 13, 2026
The #IndiaEFTATEPA Trade and Economic Partnership Agreement is one of 🇮🇳’s largest investment promotion frameworks, with a $100-billion investment commitment over 15 yrs from EFTA countries, expected to generate 1 million jobs in India. #NorwayIndia pic.twitter.com/vJI39uVZSb