Nithin Narne: షూటింగ్‌లో గాయపడ్డ యంగ్‌ హీరో నితిన్ నార్నే
ఈ వార్తాకథనం ఏంటి
సినిమా షూటింగ్‌లో యాక్షన్ సన్నివేశాలు చిత్రీకరిస్తుండగా జరిగిన ప్రమాదం యువ నటుడు నితిన్ నార్నేను ఆస్పత్రి పాలు చేసింది. కుడి భుజానికి తీవ్ర గాయం కావడంతో ఆయనను వెంటనే హైదరాబాద్‌లోని కిమ్స్ ఆస్పత్రికి తరలించారు. నవంబర్ 4న ఆస్పత్రిలో చేరిన నితిన్‌కు వైద్యులు శస్త్రచికిత్స అవసరమని గుర్తించారు. తాజాగా నిపుణుల బృందం ఆయనకు భుజం సర్జరీని విజయవంతంగా పూర్తి చేసింది. ప్రస్తుతం ఆయన ఆరోగ్యం నిలకడగా ఉండటంతో అభిమానులు, కుటుంబ సభ్యులు, చిత్ర బృందం ఊపిరి పీల్చుకున్నారు.
Details
యాక్షన్ సీన్ చేస్తుండగా ప్రమాదం
నితిన్ నార్నే ప్రస్తుతం ఓ సినిమాలో నటిస్తున్నారు. ఈ సినిమా షూటింగ్‌లో భాగంగా యాక్షన్ సన్నివేశాలను చిత్రీకరిస్తుండగా అనుకోని ప్రమాదం జరిగింది.
ఈ ఘటనలో ఆయన కుడి భుజానికి తీవ్ర గాయమైంది. పరిస్థితిని గమనించిన చిత్ర బృందం ఏమాత్రం ఆలస్యం చేయకుండా ఆయన్ని ఆస్పత్రికి తరలించింది.
అక్కడ పరీక్షలు నిర్వహించిన వైద్యులు శస్త్రచికిత్స చేయాలని నిర్ణయించారు. దీంతో అభిమానుల్లో ఆయన ఆరోగ్యంపై ఆందోళన మొదలైంది.
Details
నిపుణుల బృందంతో విజయవంతంగా ఆపరేషన్
హైదరాబాద్ కిమ్స్ ఆస్పత్రిలో ఆర్థోపెడిక్ సర్జన్ డాక్టర్ ఆర్.ఏ. పూర్ణచంద్ర తేజస్వి నేతృత్వంలోని వైద్య బృందం నితిన్‌కు శస్త్రచికిత్స నిర్వహించింది.
డాక్టర్ ఈశ్వర్ పటేల్, డాక్టర్ హరికృష్ణ బచ్చు, డాక్టర్ మధుసూదన్ ఈ చికిత్సలో భాగమయ్యారు. నవంబర్ 5 ఉదయం భుజం సర్జరీని విజయవంతంగా పూర్తి చేసినట్లు ఆస్పత్రి వర్గాలు వెల్లడించాయి.
ప్రస్తుతం నితిన్ పోస్ట్ ఆపరేటివ్ వార్డులో వైద్యుల పర్యవేక్షణలో ఉన్నారు. ఆయన ఆరోగ్య పరిస్థితి నిలకడగా ఉందని స్పష్టం చేశాయి.
Details
కొద్దిరోజులు విశ్రాంతి తప్పనిసరి
ఆపరేషన్ విజయవంతమైనప్పటికీ నితిన్ వెంటనే షూటింగ్‌కు హాజరయ్యే పరిస్థితి లేదు. గాయం తీవ్రతను దృష్టిలో పెట్టుకుని కొంతకాలం పూర్తి విశ్రాంతి తీసుకోవాలని వైద్యులు సూచించారు.
భుజం మునుపటిలా పనిచేయాలంటే పునరావాస చికిత్స (రీహాబిలిటేషన్) కూడా అవసరమని తెలిపారు. ఈ ప్రక్రియ పూర్తయ్యే వరకు శారీరక శ్రమతో కూడిన పనులకు దూరంగా ఉండాలి.
Details
పుకార్లు నమ్మొద్దన్న ఆస్పత్రి యాజమాన్యం
నితిన్ ఆరోగ్యంపై సోషల్ మీడియాలో కొన్ని అసత్య ప్రచారాలు జరుగుతుండటంతో కిమ్స్ ఆస్పత్రి యాజమాన్యం స్పందించింది.
ఆయన పరిస్థితిపై వస్తున్న వదంతులను నమ్మవద్దని ప్రజలకు విజ్ఞప్తి చేసింది. అదే సమయంలో నితిన్ కుటుంబ సభ్యులకు గోప్యత ఇవ్వాలని కోరింది.
ఆస్పత్రికి అభిమానులు, ఇతరులు అనవసరంగా రావడం వల్ల మిగతా రోగులకు వైద్య సేవల్లో ఇబ్బందులు కలగవచ్చని తెలిపింది.
ప్రస్తుతం నితిన్ కోలుకోవడమే ముఖ్యమని, ఆయన త్వరగా సంపూర్ణ ఆరోగ్యంతో తిరిగి రావాలని అభిమానులు ఆకాంక్షిస్తున్నారు.