Naa Anveshana : అన్వేష్ ఆచూకీ కోసం పోలీసుల ముమ్మర గాలింపు.. ఇన్స్టాగ్రామ్కు అధికారిక లేఖ
ఈ వార్తాకథనం ఏంటి
ప్రముఖ ట్రావెల్ యూట్యూబర్, తనను తాను ప్రపంచ యాత్రికుడిగా చెప్పుకునే అన్వేష్ (నా అన్వేషణ) చుట్టూ చట్టపరమైన ఉచ్చు బిగుస్తోంది. అనేక దేశాలు తిరుగుతూ అక్కడి వింతలు, విశేషాలను తనదైన శైలిలో ప్రేక్షకులకు పరిచయం చేస్తూ పాపులర్ అయిన అన్వేష్, ప్రస్తుతం న్యాయ సమస్యల్లో చిక్కుకున్నారు. హిందూ దేవతలపై అనుచిత వ్యాఖ్యలు చేసిన ఆరోపణల నేపథ్యంలో ఆయనపై రెండు తెలుగు రాష్ట్రాల్లో వరుసగా కేసులు నమోదవుతున్నాయి. ఈ కేసుల్లో ఒకదాన్ని హైదరాబాద్ పోలీసులు అత్యంత సీరియస్గా తీసుకున్నారు. ఇటీవల అన్వేష్ తన సోషల్ మీడియా ప్లాట్ఫామ్స్లో హిందూ దేవతలను ఉద్దేశించి చేసిన కొన్ని వ్యాఖ్యలు తీవ్ర వివాదానికి దారితీశాయి. ఈ వ్యాఖ్యలు హిందువుల మనోభావాలను తీవ్రంగా దెబ్బతీసేలా ఉన్నాయని ఆరోపణలు వెల్లువెత్తాయి.
Details
ఆగ్రహం వ్యక్తం చేస్తున్న హిందూ సంఘాలు
హిందూ సంఘాలు అన్వేష్పై తీవ్ర ఆగ్రహం వ్యక్తం చేశాయి. ఈ నేపథ్యంలో బీజేపీ నేత, నటి కరాటే కళ్యాణి పోలీసులకు అధికారికంగా ఫిర్యాదు చేశారు. అన్వేష్ ఉద్దేశపూర్వకంగానే మతపరమైన విద్వేషాలను రెచ్చగొడుతున్నారని ఆమె తన ఫిర్యాదులో పేర్కొన్నారు. కరాటే కళ్యాణి ఫిర్యాదు ఆధారంగా హైదరాబాద్లోని పంజాగుట్ట పోలీసులు అన్వేష్పై కేసు నమోదు చేశారు. ప్రస్తుతం అన్వేష్ విదేశాల్లో ఉన్నట్లు సమాచారం. ఈ క్రమంలో అతడిని గుర్తించి చర్యలు తీసుకునేందుకు పోలీసులు వేగం పెంచారు. అన్వేష్కు సంబంధించిన పూర్తి యూజర్ ఐడీ వివరాలు, లాగిన్ డేటా అందించాలని కోరుతూ పంజాగుట్ట పోలీసులు ఇన్స్టాగ్రామ్ యాజమాన్యానికి అధికారిక లేఖ రాశారు.
Details
త్వరలోనే నోటీసులు జారీ చేసే అవకాశం
వివాదాస్పద వీడియో ఏ ప్రాంతం నుంచి అప్లోడ్ అయింది? ఆ సమయంలో అన్వేష్ ఏ దేశంలో ఉన్నాడు? అనే అంశాలపై పోలీసులు లోతుగా ఆరా తీస్తున్నారు. విదేశాల్లో ఉన్న అన్వేష్ ఆచూకీని కనుగొనేందుకు ప్రయత్నాలు కొనసాగుతున్నాయి. త్వరలోనే అతడికి నోటీసులు జారీ చేసే అవకాశముందని పోలీసులు సూచిస్తున్నారు.