CJP's Protest: CJP తిరంగా మార్చ్.. జాతీయ జెండాతో 11 మందికే అనుమతి.. ఢిల్లీ పోలీసుల కీలక ప్రకటన..
ఈ వార్తాకథనం ఏంటి
దేశ రాజధాని దిల్లీలోని కన్నాట్ ప్లేస్‌లో 'కాక్రోచ్ జనతా పార్టీ' (CJP) చేపట్టనున్న 'లెహ్రా దో తిరంగా మార్చ్'పై ఉత్కంఠ నెలకొంది. జంతర్‌మంతర్ వద్ద జరిగిన అరెస్టులకు నిరసనగా పార్టీ శుక్రవారం (అక్టోబర్ 16) తిరంగా మార్చ్‌కు పిలుపునిచ్చింది. ఈ నేపథ్యంలో కన్నాట్ ప్లేస్‌లో పోలీసులు భారీ భద్రతను ఏర్పాటు చేశారు. ఎలాంటి అవాంఛనీయ ఘటనలు జరగకుండా భారతీయ నాగరిక్ సురక్షా సంహితలోని సెక్షన్ 163ను అమలు చేస్తున్నారు. ప్రధాన ఎన్నికల కమిషనర్ (CEC) జ్ఞానేశ్ కుమార్ రాజీనామా చేయాలని, స్పెషల్ ఇంటెన్సివ్ రివిజన్ (SIR) ప్రక్రియను రద్దు చేయాలని డిమాండ్ చేస్తూ సాయంత్రం 5 గంటలకు కన్నాట్ ప్లేస్ సెంట్రల్ పార్క్‌లో నిరసన చేపట్టాలని సీజేపీ నిర్ణయించింది.
వివరాలు
రెండు రోజుల పాటు సెంట్రల్ పార్క్ మూసివేత
అయితే, ఈ నిరసనను అడ్డుకోవాలని కోరుతూ దాఖలైన పిటిషన్‌ను ఢిల్లీ హైకోర్టు తోసిపుచ్చింది.
నిరసనను పూర్తిగా నిషేధించేందుకు న్యాయస్థానం నిరాకరించినప్పటికీ, శాంతిభద్రతలకు విఘాతం కలగకుండా పోలీసులు కఠిన ఆంక్షలు విధించారు.
సీజేపీ వ్యవస్థాపకుడు అభిజిత్ దిప్కే పిలుపు మేరకు అక్టోబర్ 16న సెంట్రల్ పార్క్ వద్ద జరగాల్సిన ఆందోళనకు సంబంధించి కీలక నిబంధనలను ప్రకటించారు.
పెద్ద సంఖ్యలో ప్రజలు గుమిగూడేందుకు అనుమతి లేదని స్పష్టం చేశారు.
కేవలం 11 మంది మాత్రమే జాతీయ జెండాలు పట్టుకుని, జాతీయగీతాన్ని ఆలపించేందుకు అనుమతిస్తామని తెలిపారు.
ఈ నేపథ్యంలో సెంట్రల్ పార్క్‌ను రెండు రోజుల పాటు మూసివేశారు.
వివరాలు
ప్రజలకు ఢిల్లీ పోలీసుల విజ్ఞప్తి
తిరంగా మార్చ్‌లో సామాన్య ప్రజలు, కార్యకర్తలు పెద్ద సంఖ్యలో పాల్గొనవద్దని ఢిల్లీ పోలీసులు విజ్ఞప్తి చేశారు.
నిరసన జరిగే ప్రాంతానికి ఎవరూ రావొద్దని సూచిస్తూ ప్రత్యేక అడ్వైజరీ జారీ చేశారు.
పోలీసుల ఆదేశాలను ఉల్లంఘించిన వారిపై కఠిన చర్యలు తీసుకుంటామని హెచ్చరించారు.
వివరాలు
నిరసనపై హైకోర్టు ఏం చెప్పింది?
కన్నాట్ ప్లేస్‌లో నిరసనను నిలిపివేయాలని కోరుతూ దాఖలైన పిటిషన్‌పై ఢిల్లీ హైకోర్టు విచారణ చేపట్టింది.
అయితే, ఆందోళనను పూర్తిగా నిషేధించేందుకు న్యాయస్థానం అంగీకరించలేదు.
అదే సమయంలో, ఎలాంటి అవాంఛనీయ సంఘటనలు జరగకుండా, శాంతిభద్రతలకు విఘాతం కలగకుండా అవసరమైన భద్రతా, నియంత్రణ చర్యలు తీసుకుంటామని ఢిల్లీ పోలీసులు కోర్టుకు హామీ ఇచ్చారు.
ఇప్పటికే పలువురు నేతల నిర్బంధాలు, వరుస నిరసనలతో ఢిల్లీలో రాజకీయ వాతావరణం వేడెక్కింది.
ఈ పరిస్థితుల్లో కన్నాట్ ప్లేస్‌లో పోలీసులు విధించిన తాజా ఆంక్షలు, కేవలం 11 మందికే అనుమతి ఇవ్వాలన్న నిర్ణయం ప్రాధాన్యం సంతరించుకున్నాయి.
పరిమిత అనుమతుల నేపథ్యంలో తిరంగా మార్చ్ ఎలా సాగుతుంది? అక్కడ ఎలాంటి పరిణామాలు చోటుచేసుకుంటాయి? అన్నది ఆసక్తికరంగా మారింది.