రాజకీయాల్లోకి వైఎస్ వివేక కూతురు సునీత ఎంట్రీ ఇస్తున్నారా? కడపలో పోస్టర్లు వైరల్
కడప జిల్లాలోని ప్రొద్దుటూరులో మాజీ మంత్రి వైఎస్ వివేకా కుమార్తె సునీత పోస్టర్లు కలకలం రేపుతున్నాయి. గుర్తుతెలియని వ్యక్తులు ఆమె రాజకీయ రంగ ప్రవేశం చేయబోతున్నారంటూ టీడీపీ నేతల ఫొటోలతో కూడిన పోస్టర్లను ప్రొద్దుటూరులో ప్రధాన కూడళ్లలో అతికించారు. వైఎస్ వివేకానంద రెడ్డి హత్య కేసులో సునీత వైసీపీ ఎంపీ వైఎస్ అవినాష్ రెడ్డికి వ్యతిరేకంగా పోరాడుతున్న నేపథ్యంలో ఈ పరిణామం ఆసక్తికరంగా మారింది. వివేకానంద రెడ్డి హత్య సునీత- ఏపీ సీఎం వైఎస్ జగన్ మధ్య విభేదాలు తెచ్చిపెట్టింది. ఇదే సమయంలో కడపలో జగన్‌కు చెక్ పెట్టేందుకు సునీత రాజకీయాల్లోకి రావచ్చని చాలా రోజులుగా ప్రచారం జరుగుతోంది. ఈ క్రమంలో సునీత పోస్టర్లు వెలియడం రాజకీయ వర్గాల్లో చర్చ జరుగుతోంది.
వాల్ పోస్టర్లపై టీడీపీ నేతలు ఆగ్రహం
సునీత వాల్ పోస్టర్లపై టీడీపీ నేతలు ఆగ్రహం వ్యక్తం చేస్తున్నారు. ఈ పోస్టర్ల వెనుక వైసీపీ నేతల హస్తం ఉందని ఆరోపిస్తున్నారు. వైఎస్ వివేకానంద రెడ్డి హత్య కేసును పక్కదోవ పట్టించేందుకు, శాంతి భద్రతలకు విఘాతం కలిగించేందుకు ఈ పోస్టర్లను అంటించారని ప్రొద్దుటూరు టీడీపీ ఇన్‌చార్జి ప్రవీణ్‌కుమార్‌రెడ్డి మండిపడ్డారు. అయితే ఈ పోస్టర్లను లోతుగా పరిశీలించగా, అవి బెంగళూరులో ముద్రించినట్లు తెలింది. కొంతమంది గుర్తు తెలియని వ్యక్తులు ప్రొద్దుటూరులోని అనేక ప్రదేశాలలో వాటిని అతికించారు. అయితే ఈ పోస్టర్ల వెనుక ఎవరున్నారు? సునీత రాజకీయాల్లోకి వస్తారా? లేక సునీతను కార్నర్ చేయడానికి ఎవరైనా పొలిటికల్ మైండ్ గేమ్ ఆడుతున్నారా? అనేది తేలాల్సి ఉంది.
ఈ టైమ్ లైన్ ని షేర్ చేయండి