Smriti Mandhana: టీమిండియాకు కొత్త కెప్టెన్‌.. స్మృతి మంధాన సారథ్యంలో తొలి టీ20 సిరీస్‌ నేటి నుంచే!
ఈ వార్తాకథనం ఏంటి
భారత మహిళల క్రికెట్‌లో కొత్త అధ్యాయానికి తెరలేవనుంది. స్మృతి మంధాన పూర్తిస్థాయి కెప్టెన్సీలో టీమిండియా తొలిసారిగా బరిలోకి దిగేందుకు సిద్ధమైంది. మూడు మ్యాచ్‌ల టీ20 సిరీస్‌లో భాగంగా నేడు జింబాబ్వేతో భారత్‌ తొలి మ్యాచ్‌ ఆడనుంది. ఈ సిరీస్‌ పలు ప్రత్యేకతలకు వేదిక కానుంది. ఏ ఫార్మాట్‌లోనైనా జింబాబ్వేతో భారత్‌ ద్వైపాక్షిక సిరీస్‌ ఆడటం ఇదే తొలిసారి. అలాగే రాయ్‌పూర్‌లో మహిళల అంతర్జాతీయ క్రికెట్‌ మ్యాచ్‌ జరగనుండటం కూడా ఇదే మొదటిసారి. గతంలో కెప్టెన్‌ హర్మన్‌ప్రీత్‌ కౌర్‌ అందుబాటులో లేని సమయంలో స్మృతి మంధాన 18 మ్యాచ్‌ల్లో భారత జట్టుకు నాయకత్వం వహించింది. అయితే పూర్తిస్థాయి కెప్టెన్‌గా బాధ్యతలు చేపట్టిన తర్వాత ఆమె సారథ్యంలో భారత్‌ ఆడనున్న తొలి సిరీస్‌ ఇదే.
వివరాలు
వర్షం ముప్పు లేదు
గత పదేళ్లుగా జట్టును నడిపించిన హర్మన్‌ప్రీత్‌ కౌర్‌ ఇప్పుడు స్మృతి నాయకత్వంలో సాధారణ ఆటగాడిగా బరిలోకి దిగనుంది.
గతేడాది వన్డే ప్రపంచకప్‌ను కైవసం చేసుకున్న భారత జట్టు.. టీ20 ఫార్మాట్‌లోనూ సత్తా చాటాలని పట్టుదలగా ఉంది.
ఇటీవల ఆసియా కప్‌, ఏషియన్‌ గేమ్స్‌లో అద్భుత ప్రదర్శనతో విజేతగా నిలిచిన టీమిండియా అదే జోరును కొనసాగించాలని భావిస్తోంది.
మరోవైపు ఏడాది కాలంగా ఈ ఫార్మాట్‌లో ఒక్క విజయం కూడా నమోదు చేయని జింబాబ్వే.. భారత జట్టుకు ఎంతవరకు పోటీనిస్తుందనేది ఆసక్తికరంగా మారింది.
రాయ్‌పూర్‌ పిచ్‌ బ్యాటింగ్‌కు అనుకూలించే అవకాశం ఉండటంతో భారీ స్కోర్లు నమోదయ్యే అవకాశాలున్నాయి. మ్యాచ్‌కు వర్షం ముప్పు లేదని వాతావరణ అంచనాలు సూచిస్తున్నాయి.
వివరాలు
ఓపెనర్లు ఫుల్‌ ఫామ్‌లో..
ఇటీవలి సిరీస్‌లను పరిశీలిస్తే భారత జట్టుకు బ్యాటింగ్‌ విభాగంలో పెద్దగా సమస్యలు కనిపించడం లేదు.
ఆసియా స్థాయిలో టీమిండియాకు గట్టి పోటీ ఇచ్చే జట్లు లేకపోవడంతో ఆసియా కప్‌, ఏషియన్‌ గేమ్స్‌లో భారత మహిళలు సునాయాస విజయాలు సాధించారు.
ఇప్పుడు జింబాబ్వేపై కూడా అదే ఆధిపత్యాన్ని కొనసాగించాలని చూస్తున్నారు. ఓపెనర్‌ షఫాలీ వర్మ ప్రస్తుతం మంచి ఫామ్‌లో ఉంది.
గత ఐదు మ్యాచ్‌ల్లో ఆమె వరుసగా 64, 68, 40, 100, 48 పరుగులు చేసింది. ఈ గణాంకాలు ఆమె దూకుడుకు అద్దం పడుతున్నాయి.
జింబాబ్వేతో సిరీస్‌లోనూ షఫాలీ ఇదే జోరును కొనసాగించాలని జట్టు మేనేజ్‌మెంట్‌ ఆశిస్తోంది. మరో ఓపెనర్‌గా బరిలోకి దిగనున్న కెప్టెన్‌ స్మృతి మంధాన కూడా మంచి టచ్‌లో ఉంది.
వివరాలు
గాయం కారణంగా జెమీయా దూరం
అయితే మూడో స్థానంలో ఎవరిని ఆడించాలన్నది జట్టు మేనేజ్‌మెంట్‌కు కీలకంగా మారింది.
జెమీమా రోడ్రిగ్స్‌ గాయం నుంచి పూర్తిగా కోలుకోకపోవడంతో ఆ స్థానానికి పలువురు ఆటగాళ్లను పరిశీలించినా, ఎవరూ ఆశించిన స్థాయిలో నమ్మకాన్ని నిలబెట్టుకోలేకపోయారు.
శుక్రవారం జరిగే పోరులో అనుష్క శర్మ లేదా నిక్కీ ప్రసాద్‌లలో ఒకరికి అవకాశం కల్పించే అవకాశముంది. హర్మన్‌ప్రీత్‌ కౌర్‌, రిచా ఘోష్‌, భారతి ఫుల్మాలి, దీప్తి శర్మలతో భారత మిడిలార్డర్‌ పటిష్ఠంగా కనిపిస్తోంది.
కెప్టెన్సీ బాధ్యతల నుంచి తప్పుకున్న తర్వాత హర్మన్‌ప్రీత్‌ మరింత స్వేచ్ఛగా, దూకుడుగా బ్యాటింగ్‌ చేస్తుందని అభిమానులు ఆశిస్తున్నారు.
వివరాలు
బౌలింగ్‌లో శ్రీచరణిపై ప్రత్యేక దృష్టి
భారత బౌలింగ్‌ విభాగంలో ఆంధ్ర స్పిన్నర్‌ శ్రీచరణి ప్రదర్శనపై అందరి దృష్టి నిలవనుంది. ఈ ఏడాది ఆమె 23 టీ20 మ్యాచ్‌లు ఆడి 47 వికెట్లు పడగొట్టింది.
దీంతో ఈ జాబితాలో అగ్రస్థానంలో కొనసాగుతోంది. జింబాబ్వేతో సిరీస్‌లోనూ ఆమె తన స్పిన్‌ మాయాజాలంతో ప్రత్యర్థి బ్యాటర్లను ఇబ్బంది పెట్టాలని చూస్తోంది.
శ్రీచరణితో పాటు ప్రేమ రావత్‌, దీప్తి శర్మ స్పిన్‌ బాధ్యతలను పంచుకోనున్నారు. పేస్‌ విభాగంలో నందని శర్మ, క్రాంతి గౌడ్‌ కీలక పాత్ర పోషించనున్నారు.
బ్యాటింగ్‌తో పాటు బౌలింగ్‌లోనూ సమతూకంగా కనిపిస్తున్న భారత జట్టు సిరీస్‌ను విజయంతో ప్రారంభించాలని లక్ష్యంగా పెట్టుకుంది.
వివరాలు
జింబాబ్వే పోటీనిస్తుందా?
మరోవైపు జింబాబ్వే మహిళల జట్టుకు ఈ ఏడాది టీ20ల్లో విజయమే దక్కలేదు. ఆడిన 18 మ్యాచ్‌ల్లోనూ పరాజయాలను చవిచూసింది.
ఈ ఏడాది జూన్‌లో ఆస్ట్రేలియా చేతిలో ఓటమి తర్వాత భారత జట్టు వరుసగా ఎనిమిది టీ20 మ్యాచ్‌ల్లో విజయం సాధించింది.
దీనికి భిన్నంగా జింబాబ్వే తన చివరి టీ20 విజయాన్ని గతేడాది సెప్టెంబర్‌లో నమీబియాపై నమోదు చేసుకుంది. జింబాబ్వే జట్టులో ఓపెనర్‌ కెలిస్‌, కెప్టెన్‌ జోస్‌పైన్‌కు మంచి అనుభవం ఉంది.
భారత జట్టుతో పోలిస్తే తమపై అంచనాల ఒత్తిడి తక్కువగా ఉండటం జింబాబ్వేకు కలిసొచ్చే అంశం.
ఈ అవకాశాన్ని ఉపయోగించుకుని భారత జట్టుకు గట్టి పోటీ ఇవ్వాలని ఆ జట్టు భావిస్తోంది.
వివరాలు
స్మృతి మంధాన ఏమన్నారంటే?
పూర్తిస్థాయి కెప్టెన్‌గా తన తొలి సిరీస్‌పై స్మృతి మంధాన ఆసక్తి వ్యక్తం చేసింది. గతంలోనూ భారత జట్టుకు కెప్టెన్‌గా వ్యవహరించినందున ఇది తనకు పూర్తిగా కొత్త అనుభవం కాదని ఆమె పేర్కొంది.
అయితే పూర్తిస్థాయి కెప్టెన్‌గా తొలి సిరీస్‌ కావడంతో ఆసక్తిగా ఎదురుచూస్తున్నట్లు తెలిపింది.
జింబాబ్వేతో తలపడటం ఇదే మొదటిసారని చెప్పిన స్మృతి.. ఇలాంటి జట్లతో ఆడటం ద్వారా ఎన్నో విషయాలు నేర్చుకోవచ్చని అభిప్రాయపడింది.
ప్రత్యర్థి జట్లు ఆటను బాగా ఆస్వాదిస్తూ ఆడతాయని, అలాంటి పోటీల ద్వారా తమ ఆటను మరింత మెరుగుపరుచుకునే అవకాశం ఉంటుందని పేర్కొంది.
మొత్తంగా చూస్తే.. స్మృతి మంధాన పూర్తిస్థాయి కెప్టెన్సీలో భారత మహిళల జట్టు కొత్త ప్రయాణాన్ని ప్రారంభించబోతోంది.