ఇండోనేషియాలో భారీ భూకంపం, రిక్టర్ స్కేలుపై 6.0 తీవ్రత నమోదు
ఇండోనేషియాలో సోమవారం ఉదయం భారీ భూకంపం నమోదైంది. రిక్టర్ స్కేలుపై 6.0 తీవ్రతతో భూకంపం సంభవించినట్లు యూఎస్ జియోలాజికల్ సర్వే పేర్కొంది. ప్రస్తుతం అయితే ప్రాణ నష్టానికి సంబంధించిన ఎలాంటి సమాచారం అందలేదని వెల్లడించింది. పశ్చిమ ఇండోనేషియాలోని సుమత్రా ద్వీపం తీరంలో ఈ భూకంపం సంభవించింది. అచే ప్రావిన్స్‌లోని సింగ్‌కిల్ నగరానికి దక్షిణ-ఆగ్నేయంగా 48 కిలోమీటర్ల దూరంలో 48 కిలోమీటర్ల లోతులో భూకంప కేంద్రం కేంద్రీకృతమైనట్లు యూఎస్ జియోలాజికల్ సర్వే వివరించింది.
సునామి ముప్పు లేదు: జియోలాజికల్ సర్వే
భారీ తీవ్రతతో భూకంపం సంభవించిన నేపథ్యంలో సునామిపై కూడా యూఎస్ జియోలాజికల్ సర్వే క్లారిటీ ఇచ్చింది. ప్రస్తుతం వచ్చిన భకంపం తీవ్రతతో సునామి ముప్పు లేదని స్పష్టం చేసింది. 'రింగ్ ఆఫ్ ఫైర్' కారణంగా ఇండోనేషియాలో భూకంపాలు, అగ్నిపర్వత పేలుళ్లు సర్వసాధారణంగా సంభవిస్తుంటాయి. ఇక్కడ టెక్టోనిక్ ప్లేట్లు ఢీకొంటాయి. నవంబర్ 21న పశ్చిమ జావాలోని సియాంజూర్ నగరంలో 5.6 తీవ్రతతో సంభవించిన భూకంపం వల్ల కనీసం 331 మంది మరణించారు. దాదాపు 600 మంది గాయపడ్డారు. 2018లో సునామీ కారణంగా 4,340 మంది మరణించారు. దీని తర్వాత అత్యంత తీవ్రతతో నమోదైన భూకంపం ఇదే కావడం గమనార్హం.
