'మెదడు తినే అమీబా'తో దక్షిణ కొరియాలో తొలి మరణం.. ప్రపంచ దేశాలు అలర్ట్
ఒకవైపు కరోనా పీడ తొలగకముందే.. మరోవైపు కొత్త వైరస్‌లు పుట్టుకురావడం, పాతవి తిరిగి ప్రభావాన్ని చూపిస్తుండటంతో ప్రజలు భయాందోళనలకు గురవుతున్నారు. తాజాగా దక్షిణ కొరియాలో 'మెదడు తినే అమీబా' వెలుగు చూడటంతో ప్రపంచ దేశాలు కలవరపాటుకు గురువుతున్నాయి. దక్షిణ కొరియాలో ఒక వ్యక్తి 'మెదడు తినే అమీబా' కారణంగా మృతి చెందాడు. ఆ దేశ వైద్యాధికారులు కూడా మరణాన్ని ధృవీకరించారు. దీంతో ఆ దేశంలో ఈ అమీబా కారణంగా తొలి మరణం నమోదైనట్లు అయ్యింది. ఇటీవల కాలంలో ఇలాంటి కేసులు ఇంకా ఎక్కడైనా నమోదయ్యాయా ? అని దక్షిణ కొరియా అధికారులు ఆరా తీసుస్తున్నారు. విషయం తెలుసుకున్న ప్రపంచ దేశాలు 'మెదడు తినే అమీబా'పై అప్రమత్తమయ్యాయి.
'మెదడు తినే అమీబా' ఆవాసాలు అవే..
'మెదడు తినే అమీబా' అనేది.. 'నెగ్లేరియా ఫోవ్‌లేరి' అమీబా జాతికి చెందిన సూక్ష్మజీవి. ఇది ముక్కుద్వారా తలలోకి వెళ్లి నేరుగా మెదడుపై దాడి చేస్తుంది. 1937లో తొలిసారి అమెరికాలో వెలుగుచూసిన ఈ 'మెదడు తినే అమీబా'.. ఆ తర్వాత పలుసార్లు వెలుగు చూసింది. అయితే తాజాగా దక్షిణ కొరియాలో ఈ కేసు నమోదు కావడం.. ఆ వ్యక్తి చనిపోవడం ఇప్పుడు ప్రపంచ దేశాలను ఆందోళన కలిగిస్తున్నాయి. కాల్వలు, చెరువులు, మురికి గుంటలు, స్విమ్మింగ్‌ పూల్స్‌ వద్ద ఈ 'నెగ్లేరియా ఫోవ్‌లేరి' ఉంటుంది. ఇది ప్రాణాంతకమైనప్పటికీ.. ఒకరినుంచి మరొకరికి సోకదని వైద్యులు చెబుతున్నారు. 1983 నుంచి 2010 మధ్య కాలంలో ఈ ప్రమాదకర అమీబా కారణంగా దాదాపు 28 మంది చనిపోయినట్లు గణాంకాలు చెబుతున్నాయి.
