Iran - Israel Tensions: ఇజ్రాయెల్ పై ఇరాన్ క్షిపణి దాడులు....మండిపడ్డ ఇజ్రాయెల్
ఈ వార్తాకథనం ఏంటి
యూదు దేశం ఇజ్రాయెల్ (Israel) పై ఇరాన్ (Iran) క్రూయిజ్, డ్రోన్ క్షిపణి దాడులతో విరుచుకుపడింది.
ఇజ్రాయెల్ పై సుమారు 200 లకు పైగా క్షిపణులతో దాడి చేసింది.
ఈ మేరకు ఇజ్రాయెల్ రక్షణ విభాగం అధికార ప్రతినిధి డానియెల్ హగరీ మీడియాకు వెల్లడించారు.
ఉదయం రెండు గంటలకు ఇజ్రాయెల్ లోని టెల్ అవీవా, జెరూసలేం, దిమోనా, ఇజ్రాయెల్ న్యూక్లియర్ రియాక్టర్ లను లక్ష్యంగా చేసుకుని ఇరాన్ దాడులు చేసిందన్నారు.
ఆ క్షిపణుల్లో కొన్నింటిని ఐడీఎఫ్ ద్వారా అడ్డుకున్నట్లు హగరీ వెల్లడించారు.
రెండు వారాల క్రితం సిరియా లోని కాన్సూలేట్ పై ఇజ్రాయెల్ దాడులు చేసి ఇరాన్ మేజర్ జనరల్ కమాండర్ మహమ్మద్ రెజా జహేదీతో సహా ఏడుగురు ఇరాన్ దేశీయులను హతమార్చింది.
Iran attacks
ప్రతీకారంతో రగిలిపోతున్న ఇరాన్
ఈ దాడుల నేపథ్యంలో ఇరాన్ అప్పట్నుంచి ప్రతీకారంతో రగిలిపోతోంది.
గత కొద్ది నెలలుగా సిరియాలోని ఇరాన్ కు మద్దతిచ్చే శక్తులమీద లక్ష్యంగా చేసుకుని ఇజ్రాయెల్ రెచ్చిపోతోంది.
అందులోభాగంగానే సిరియాలోని డెమాస్కస్ లోని కాన్సూలేట్ కార్యాలయంపై ఈ నెల 1న ఇజ్రాయెల్ దాడి చేసింది.
ఆక్రమిత గోలన్ హైట్స్ , నెగెవ్ ఎడారిలోని సైనిక స్థావరాలను లక్ష్యంగా చేసుకుని ఇరాన్ దాడులు చేస్తున్నట్లు ఇజ్రాయెల్ ఇంటెలిజెన్స్ వర్గాలు అనుమానిస్తున్నాయి.
ఇరాన్ నుంచి అనేక డ్రోన్ క్షిపణులు ఇరాక్ గగనతలంపై నుంచి ఇజ్రాయెల్ పైకి వస్తున్నట్లు ఇజ్రాయెల్ తెలిపింది.
ఇజ్రాయెల్ పై దాడిలో యెమెన్ లోని హౌతీ మిలీషియా, లెబనాన్ లోని హిజ్బుల్లా కూడా చేరినట్లు ఆ వర్గాలు వెల్లడించాయి.
Isral reaction
దాడులపై మండిపడ్డ ఇజ్రాయెల్
ఆపరేషన్ ట్రూ ప్రామిస్ పేరుతో గంటల వ్యవధిలోనే ఇజ్రాయెల్ పై బాలిస్టిక్ క్షిపణులు ప్రయోగించినట్లు ఇరాన్ రెవల్యూషనరీ గార్డ్స్ కార్స్ప్ వెల్లడించింది.
నేరాలకు పాల్పడుతున్న జియోనిస్ట్ దేశంపై ఇది ప్రతీకారచర్యగా ఇరాన్ ఈ దాడులను అభివర్ణించింది.
క్షిపణి దాడిలో నెగెవ్ లోని ఓ బాలిక , కొందరు గాయపడగా మరికొన్ని భవనాలు దెబ్బతిన్నాయి.
డెమాస్కస్ పై దాడికి ప్రతీకారంగానే తాము క్షిపణి దాడులకు పాల్పడినట్లు ఇరాన్ విదేశీ వ్యవహారాల మంత్రిత్వ శాఖ పేర్కొంది.
తాము చేసిన దాడులపై ఇజ్రాయెల్ ప్రతీకారం తీర్చుకోవాలనుకుంటే సహించేది లేదని హెచ్చరించింది.
ఈ దాడులపై ఇజ్రాయెల్ లేదా అమెరికా తమ దేశంపై దాడికి దిగే అవకాశముందని కూడా తెలిపింది.
కాగా, ఇరాన్ తాజా దాడులపై ఇజ్రాయెల్ తీవ్రంగా మండిపడింది.