Smit Machchhar: ఊహించనిదేదైనా జరగొచ్చు.. ఎప్పుడూ సిద్ధంగా ఉండాలి: స్మిత్ మచ్చర్ పాత వీడియో వైరల్
ఈ వార్తాకథనం ఏంటి
భారతీయ పైలట్‌ స్మిత్ మచ్చర్ పేరు ప్రస్తుతం అంతర్జాతీయంగా చర్చనీయాంశంగా మారింది. విమానంలో జరిగిన కత్తిపోట్ల ఘటన నేపథ్యంలో ఆయన సమయస్ఫూర్తితో వ్యవహరించిన తీరు వెలుగులోకి వచ్చింది. ఇదే సమయంలో కొన్నినెలల క్రితం 'Bonafide Banter' పాడ్‌కాస్ట్‌లో మచ్చర్ చెప్పిన తన వ్యక్తిగత ప్రయాణానికి సంబంధించిన విషయాలు కూడా ఇప్పుడు సామాజిక మాధ్యమాల్లో వైరల్‌గా మారుతున్నాయి.
వివరాలు
చిన్నప్పటి నుంచి పైలట్‌ కావాలనే ఆలోచన లేదు..
స్మిత్ మచ్చర్‌కు చిన్నప్పటి నుంచీ పైలట్‌ కావాలనే కల లేదట.
కుటుంబం నిర్వహిస్తున్న వస్త్ర వ్యాపారంలో చేరాలనే ఉద్దేశంతో ఆయన టెక్స్‌టైల్‌ ఇంజినీరింగ్‌ చదివారు.
అనంతరం మేనేజ్‌మెంట్‌ కోర్సు కూడా చేశారు. అయితే 19 ఏళ్ల వయసులో ఓ ఏవియేషన్‌ సెమినార్‌కు హాజరైన తర్వాత ఆయన జీవిత గమనం పూర్తిగా మారిపోయింది.
ఆ సెమినార్‌ తనలో విమానయాన రంగంపై ఆసక్తిని పెంచిందని మచ్చర్ తెలిపారు.
పైలట్‌ కావాలన్న తన నిర్ణయాన్ని విన్న తల్లి ఆందోళన చెందారని, తండ్రి మాత్రం పెద్దగా మాట్లాడకుండా తన నిర్ణయానికి అంగీకారం తెలిపారని చెప్పారు.
వివరాలు
9,750 గంటల విమాన అనుభవం..
కమర్షియల్‌ పైలట్‌గా మారేందుకు మచ్చర్ న్యూజిలాండ్‌లో శిక్షణ పొందారు.
ఇప్పటివరకు సుమారు 9,750 గంటలపాటు విమానాలు నడిపిన అనుభవం ఆయనకు ఉంది. 2011లో స్పైస్‌జెట్‌లో చేరిన ఆయన.. అనంతరం 2022లో ఫ్లైదుబాయ్‌లోకి మారారు.
కాక్‌పిట్‌లో క్రమశిక్షణే కీలకం..
పైలట్‌ బాధ్యతలు, కాక్‌పిట్‌లో పాటించాల్సిన క్రమశిక్షణ గురించి కూడా మచ్చర్ పాడ్‌కాస్ట్‌లో వివరించారు.
పైలట్‌ ప్రధాన బాధ్యత ఎప్పటికప్పుడు విమాన పరిస్థితిని పర్యవేక్షించడమేనని చెప్పారు. కాక్‌పిట్‌లో అవసరం లేని చర్చలకు తాను దూరంగా ఉంటానని మచ్చర్ తెలిపారు.
ఎక్కువగా మాట్లాడటం వల్ల దృష్టి మరలే అవకాశం ఉంటుందని వివరించారు.
అత్యవసర పరిస్థితులను ఎదుర్కొనేందుకు పైలట్లు ఎప్పుడూ అప్రమత్తమైన స్థితిలో ఉంటారని చెప్పారు.
తాము మౌనంగా ఉన్నంత మాత్రాన భయపడుతున్నట్లు కాదని స్పష్టం చేశారు.
వివరాలు
గర్భిణికి అత్యవసర పరిస్థితి..
తన సుదీర్ఘ విమానయాన కెరీర్‌లో విమానంలో సాంకేతిక లోపం కారణంగా అత్యవసర ల్యాండింగ్‌ చేయాల్సిన పరిస్థితి ఇప్పటివరకు ఎదురుకాలేదని మచ్చర్ చెప్పారు.
అయితే ఓసారి విమానంలో వైద్యపరమైన అత్యవసర పరిస్థితి ఎదురైందని వివరించారు.
ఓ విమాన ప్రయాణంలో గర్భిణికి నెలలు నిండకముందే ప్రసవ నొప్పులు ప్రారంభమయ్యాయి.
వెంటనే సిబ్బంది ఈ విషయాన్ని కాక్‌పిట్‌కు తెలియజేశారు.దీంతో వాతావరణ పరిస్థితులను పరిగణనలోకి తీసుకుంటూ సమీపంలోని విమానాశ్రయాలను పరిశీలించడం ప్రారంభించారు.
అయితే పరిస్థితులు అనూహ్యంగా మారి.. విమానంలోనే ఆమెకు ప్రసవం జరిగింది.
ఆ సమయంలో సమీప విమానాశ్రయంలో ల్యాండ్‌ అయ్యే అవకాశం ఉన్నప్పటికీ,తొందరపడి నిర్ణయం తీసుకోలేదని మచ్చర్ తెలిపారు.
ఒకవేళ ల్యాండింగ్‌ ప్రయత్నం విఫలమైతే మరో 20నిమిషాల సమయం వృథా అయ్యే అవకాశం ఉందని భావించినట్లు చెప్పారు.
వివరాలు
తల్లీబిడ్డలను కాపాడిన నిర్ణయం..
ఆ తర్వాత పరిస్థితులు వేగంగా మారాయి. తల్లీబిడ్డలకు వెంటనే వైద్యసాయం అందేలా చర్యలు తీసుకోవడంతో వారి ప్రాణాలు నిలిచాయి.
ఆ ఘటన తమకు ఎంతో ఊరటనిచ్చిందని మచ్చర్ గుర్తుచేసుకున్నారు.
ఒకవేళ ఆ బిడ్డకు ఏదైనా జరిగి ఉంటే.. అది తన తప్పు కాకపోయినా, ఆ ఘటనపై అపరాధభావం జీవితాంతం వెంటాడేదని ఆయన అన్నారు.
అత్యవసర పరిస్థితుల్లో తీసుకునే ప్రతి నిర్ణయం ఎంత కీలకమో ఈ ఘటన తనకు గుర్తుచేసిందని వివరించారు.
వివరాలు
కత్తిపోట్ల ఘటనలోనూ సమయస్ఫూర్తి..
ఇదిలా ఉండగా.. సెప్టెంబర్‌ 30న జరిగిన విమాన ఘటనలోనూ స్మిత్ మచ్చర్ తన అనుభవాన్ని, సమయస్ఫూర్తిని ప్రదర్శించారు.
విమానంలో కత్తిపోట్ల ఘటన చోటుచేసుకుని ఓ వ్యక్తి రక్తమోడుతున్న సమయంలో.. కాక్‌పిట్‌ డోర్లు తెరవడం సహా కీలక నిర్ణయాలు తీసుకున్నట్లు సమాచారం.
ఈ చర్యతో మరింత తీవ్రమైన పరిణామాలను నివారించగలిగారని కథనాలు పేర్కొంటున్నాయి.
అనుకోకుండా విమానయాన రంగంలోకి వచ్చిన వ్యక్తి.. దశాబ్దానికి పైగా అనుభవంతో అత్యవసర పరిస్థితుల్లో తీసుకున్న నిర్ణయాలు ఇప్పుడు మచ్చర్ పేరును అంతర్జాతీయంగా చర్చలోకి తెచ్చాయి.