Bank Strike India: బ్యాంకుల సమ్మె.. ఖాతాదారులపై ప్రభావమెంత? కీలక వివరాలు ఇవే!
ఈ వార్తాకథనం ఏంటి
భారత్లోని యునైటెడ్ ఫోరమ్ ఆఫ్ బ్యాంక్ యూనియన్స్ (UFBU) సెప్టెంబర్ 28 నుంచి 30 వరకు దేశవ్యాప్త బ్యాంకు సమ్మెకు పిలుపునిచ్చింది. ఈ సమ్మె ప్రభావం గల్ఫ్ దేశాల్లోని ఎన్ఆర్ఐలపై, ముఖ్యంగా యూఏఈ నుంచి భారత్కు పంపే రెమిటెన్స్లపై పడే అవకాశం ఉంది. సెప్టెంబర్ 30న అర్ధవార్షిక ఆర్థిక ముగింపు సమయం కూడా ఉండటంతో ఈ సమ్మెకు ప్రాధాన్యత ఏర్పడింది. సమ్మె కారణంగా బ్యాంకు శాఖల్లో జరిగే ప్రత్యక్ష లావాదేవీలకు అంతరాయం ఏర్పడనుంది. అయితే యూఏఈలోని ఎక్స్ఛేంజ్ హౌస్ల ద్వారా నిర్వహించే డిజిటల్ నిధుల బదిలీలు కొనసాగనున్నాయి. అయినప్పటికీ భారత్లోని రిసీవింగ్ బ్యాంకుల వద్ద సిబ్బంది ద్వారా ప్రాసెసింగ్ చేయాల్సిన రెమిటెన్స్లలో జాప్యం జరిగే అవకాశం ఉంది.
వివరాలు
సెప్టెంబర్ 27న ప్రత్యేక బ్యాంకింగ్ సేవలు
దీంతో అత్యవసరంగా నిధులు పంపాల్సిన ఎన్ఆర్ఐలు ముందుగానే అప్రమత్తంగా ఉండాలని నిపుణులు సూచిస్తున్నారు.
సమ్మె కారణంగా ఖాతాదారులకు కలిగే అసౌకర్యాన్ని తగ్గించేందుకు భారత రిజర్వ్ బ్యాంక్ (RBI) సత్వర చర్యలు చేపట్టింది.
ఇందులో భాగంగా సెప్టెంబర్ 27, ఆదివారం ప్రభుత్వ బ్యాంకులు, ప్రాంతీయ గ్రామీణ బ్యాంకుల పరిధిలోని శాఖలు, కరెన్సీ చెస్ట్లను తెరిచి ఉంచనున్నారు.
దీంతో ఖాతాదారులు సమ్మె ప్రారంభానికి ముందే తమ అత్యవసర బ్యాంకింగ్ పనులను పూర్తి చేసుకునే అవకాశం ఉంటుంది.
ప్రైవేట్ బ్యాంకులు ఈ సమ్మెలో పాల్గొనకపోయినప్పటికీ.. ఆదివారం వాటి శాఖల పనివేళలకు సంబంధించి ఆయా బ్యాంకుల నిబంధనలను పరిశీలించాల్సి ఉంటుంది.
వివరాలు
ఏటీఎం లావాదేవీలపై అదనపు ఛార్జీలు ఉండవు
ఇదిలా ఉండగా.. సెప్టెంబర్ 28 నుంచి 30 వరకు ఏటీఎంలలో విధించే పరిమితిని మించి చేసే లావాదేవీలపై వసూలు చేసే అదనపు రుసుములను ఇండియన్ బ్యాంక్ సహా పలు ప్రభుత్వ రంగ బ్యాంకులు తాత్కాలికంగా రద్దు చేశాయి.
దీంతో కస్టమర్లు ఇతర బ్యాంకుల ఏటీఎంల నుంచి కూడా ఎలాంటి అదనపు ఛార్జీలు చెల్లించకుండా నగదు ఉపసంహరించుకోవచ్చు.
వివరాలు
డిజిటల్ బ్యాంకింగ్ సేవలు యథావిధిగా
సమ్మె సమయంలో యూపీఐ, ఇంటర్నెట్ బ్యాంకింగ్, మొబైల్ బ్యాంకింగ్, ఏటీఎం సేవలు సాధారణంగానే అందుబాటులో ఉంటాయని అధికారులు తెలిపారు.
అలాగే పండుగ సమయంలో ఇబ్బందులు తలెత్తకుండా ముందస్తు చర్యల్లో భాగంగా కేంద్ర ప్రభుత్వ ఉద్యోగులు, పెన్షనర్లకు జీతాల చెల్లింపులకు కూడా మార్గం సుగమం చేసినట్లు వెల్లడించారు.
ఇక బ్యాంకర్ల ప్రధాన డిమాండ్లలో వారానికి ఐదు రోజులు బ్యాంకింగ్ విధానాన్ని అమలు చేయడం కీలకంగా ఉంది.
ఈ డిమాండ్తోనే బ్యాంకింగ్ యూనియన్లు సెప్టెంబర్ 28 నుంచి 30 వరకు దేశవ్యాప్త సమ్మెకు పిలుపునిచ్చాయి.