Five-day banking week: బ్యాంకులకు ప్రతి శనివారం సెలవా? వైరల్ గెజిట్‌పై కేంద్రం కీలక క్లారిటీ
ఈ వార్తాకథనం ఏంటి
ప్రభుత్వ రంగ బ్యాంకులకు ఇకపై ప్రతి శనివారం సెలవు ఉంటుందంటూ సోషల్ మీడియాలో ఓ గెజిట్ నోటిఫికేషన్ వైరల్ అవుతోంది. అయితే ఈ పత్రం నకిలీదని ప్రెస్ ఇన్ఫర్మేషన్ బ్యూరో (PIB) ఫ్యాక్ట్ చెక్ స్పష్టం చేసింది. ఆర్థిక మంత్రిత్వ శాఖ పరిధిలోని ఆర్థిక సేవల విభాగం (DFS) ఇలాంటి ఎలాంటి నోటిఫికేషన్‌ను జారీ చేయలేదని తెలిపింది. వైరల్ గెజిట్ నకిలీదే.. 'ఎక్స్‌' వేదికగా పీఐబీ ఫ్యాక్ట్ చెక్ ఈ వైరల్ సమాచారంపై స్పందించింది. ఎస్‌బీఐతో పాటు అన్ని ప్రభుత్వ రంగ బ్యాంకులకు ప్రతి శనివారం సెలవు ప్రకటించినట్లు పేర్కొంటున్న గెజిట్ నోటిఫికేషన్ సోషల్ మీడియాలో చక్కర్లు కొడుతోంది. అయితే అందులోని సమాచారం వాస్తవం కాదని పీఐబీ వెల్లడించింది.
ట్విట్టర్ పోస్ట్ చేయండి
PIB ఫ్యాక్ట్ చెక్ చేసిన ట్వీట్
A Gazette circulating on social media , purportedly issued by the Ministry of Finance (Department of Financial Services), claims that the Central Government has declared every Saturday a public holiday for all Public Sector Banks , including SBI.#PIBFactCheck:
— PIB Fact Check (@PIBFactCheck) October 1, 2026
❌ The document… pic.twitter.com/ClCqEt2UAX
వివరాలు
ప్రస్తుతం ఎన్ని శనివారాలు సెలవు?
ప్రస్తుతం ప్రభుత్వ రంగ బ్యాంకులకు నెలలో రెండు శనివారాలు మాత్రమే సెలవు ఉంటుంది.
ప్రతి నెలా రెండో, నాలుగో శనివారాల్లో బ్యాంకులు పనిచేయవు.
మిగిలిన మొదటి, మూడో, ఐదో శనివారాల్లో సాధారణ బ్యాంకింగ్ కార్యకలాపాలు కొనసాగుతాయి.
2015లో రెండో, నాలుగో శనివారాలను ప్రభుత్వ రంగ బ్యాంకులకు సెలవులుగా ప్రకటించారు.
వైరల్ సమాచారంపై పీఐబీ సూచన
సోషల్ మీడియాలో వైరల్ అయ్యే ప్రభుత్వ ఉత్తర్వులు, గెజిట్ నోటిఫికేషన్లను చూసి వెంటనే నమ్మవద్దని పీఐబీ ప్రజలకు సూచించింది.
ముఖ్యంగా కేంద్ర ప్రభుత్వానికి సంబంధించిన సమాచారాన్ని ఇతరులకు షేర్ చేసే ముందు అధికారిక వర్గాల ద్వారా దాని నిజానిజాలను నిర్ధారించుకోవాలని కోరింది.
అనుమానం కలిగించే సమాచారాన్ని పీఐబీ ఫ్యాక్ట్ చెక్‌కు పంపించాలని తెలిపింది.
వివరాలు
ఐదు రోజుల పని వారంపై ఉద్యోగ సంఘాల డిమాండ్
బ్యాంకులకు వారానికి ఐదు రోజుల పని విధానం అమలు చేయాలన్న డిమాండ్ చాలాకాలంగా ఉంది.
ఈ అంశంపై బ్యాంకు ఉద్యోగ సంఘాలు ఇటీవల సమ్మెకు పిలుపునిచ్చాయి. సెప్టెంబర్ 28 నుంచి 30 వరకు మూడు రోజుల సమ్మె నిర్వహించాలని నిర్ణయించాయి.
వివరాలు
సెప్టెంబర్ 27న కూడా బ్యాంకులు పనిచేశాయి
సమ్మె కారణంగా బ్యాంకింగ్ సేవలకు అంతరాయం కలగకుండా ప్రభుత్వం చర్యలు చేపట్టింది.
ఇందులో భాగంగా సెప్టెంబర్ 27న ఆదివారం కూడా ప్రభుత్వ రంగ బ్యాంకులు, ప్రాంతీయ గ్రామీణ బ్యాంకులు పనిచేసేలా ఏర్పాట్లు చేసింది.
అనంతరం సంబంధిత వర్గాల మధ్య జరిగిన చర్చలు ఫలప్రదం కావడంతో బ్యాంకు ఉద్యోగ సంఘాలు సమ్మె నిర్ణయాన్ని ఉపసంహరించుకున్నాయి.
ముఖ్యంగా గుర్తుంచుకోవాల్సిన విషయం ఏమిటంటే.. ప్రస్తుతం ప్రభుత్వ రంగ బ్యాంకులకు ప్రతి శనివారం సెలవు అమల్లో లేదు.
రెండో, నాలుగో శనివారాలు మాత్రమే సాధారణ సెలవు రోజులు. కాబట్టి సోషల్ మీడియాలో వైరల్ అవుతున్న ప్రతి శనివారం బ్యాంకులకు సెలవు అంటూ పేర్కొంటున్న గెజిట్‌ను నమ్మవద్దని పీఐబీ స్పష్టం చేసింది.