Gold,Silver Imports: బంగారం,వెండి దిగుమతులపై కొత్త పన్ను.. 2027 ఏప్రిల్‌ 1 నుంచి అమలు
ఈ వార్తాకథనం ఏంటి
బంగారం,వెండి కొనుగోలు చేయాలనుకునేవారికి కీలకమైన సమాచారం. 2027 ఏప్రిల్‌ 1 నుంచి బ్యాంకులు, ప్రభుత్వం గుర్తించిన సంస్థల ద్వారా దిగుమతి చేసుకునే బంగారం, వెండి, ప్లాటినంపై 3 శాతం ఇంటిగ్రేటెడ్‌ జీఎస్టీ (ఐజీఎస్‌టీ) విధించనున్నారు. ఇప్పటివరకు కొన్ని బ్యాంకులు, గుర్తింపు పొందిన సంస్థలకు కల్పించిన పన్ను మినహాయింపులను పొడిగించకూడదని కేంద్ర ప్రభుత్వం నిర్ణయించింది. ఈ మార్పు వల్ల సామాన్యులు కొనుగోలు చేసే బంగారం, వెండి ధరలు పెరుగుతాయా? అనే ప్రశ్నలు తలెత్తుతున్నాయి. 2027 మార్చి 31తో ముగియనున్న మినహాయింపులు పన్ను మినహాయింపుల గడువు 2027 మార్చి 31తో ముగియనుంది. ఆ తర్వాత అర్హత కలిగిన దిగుమతులపై 3 శాతం ఐజీఎస్‌టీ అమల్లోకి వస్తుందని రెవెన్యూ కార్యదర్శి అరవింద్‌ శ్రీవాస్తవ గురువారం వెల్లడించారు.
వివరాలు
సామాన్యులపై ఎంత భారం పడుతుంది?
దీంతో ఇప్పటివరకు పన్ను మినహాయింపు పొందుతున్న కొన్ని దిగుమతులపై అదనపు పన్ను భారం పడనుంది.
బంగారం,వెండి దిగుమతులపై పన్ను విధించడం వల్ల వాటి కొనుగోలు వ్యయం పెరిగే అవకాశం ఉంది.
అయితే ఈ అదనపు పన్ను భారం పూర్తిగా వినియోగదారులపైనే పడుతుందా? లేదా? అనేది దిగుమతిదారులు, వ్యాపారులు దాన్ని ఏ మేరకు కొనుగోలుదారులకు బదిలీ చేస్తారనే అంశంపై ఆధారపడి ఉంటుంది.
అంతర్జాతీయ మార్కెట్‌లో బంగారం,వెండి ధరలు, రూపాయి మారకం విలువ, దేశీయంగా ఈ లోహాలకు ఉన్న డిమాండ్‌ కూడా తుది ధరలను ప్రభావితం చేస్తాయి.
అందువల్ల కొత్త పన్ను విధానం కారణంగా బంగారం, వెండి ధరలు ఎంత పెరుగుతాయో ఇప్పుడే కచ్చితంగా అంచనా వేయలేం.
వివరాలు
బంగారం దిగుమతుల విలువలో పెరుగుదల.. వెండిలో తగ్గుదల
ఇప్పటికే దిగుమతి సుంకాల్లో మార్పులు,అంతర్జాతీయ మార్కెట్‌ పరిణామాలు బంగారం,వెండి ధరలపై ప్రభావం చూపుతున్నాయి.
2026-27 ఆర్థిక సంవత్సరంలో ఏప్రిల్‌ నుంచి ఆగస్టు వరకు భారత్‌ బంగారం దిగుమతుల విలువ 3.38 శాతం పెరిగి 17.47బిలియన్‌ డాలర్లకు చేరింది.
ఇదే సమయంలో వెండి దిగుమతుల విలువ 8.81శాతం తగ్గి 1.74బిలియన్‌ డాలర్లుగా నమోదైంది.
కొనుగోలుదారులు ఏం గమనించాలి?
బంగారు ఆభరణాలు కొనుగోలు చేసేవారు, ముఖ్యంగా పెళ్లిళ్ల కోసం బంగారం కొనాలనుకునే కుటుంబాలు ధరల మార్పులను గమనించడం అవసరం.
అయితే కొత్త పన్ను విధానం 2027 ఏప్రిల్‌ 1 నుంచి అమల్లోకి రానుంది.
అప్పటివరకు బంగారం,వెండి ధరలు ఎలా మారతాయన్నది అంతర్జాతీయ మార్కెట్‌ పరిస్థితులు, రూపాయి మారకం విలువ,దేశీయ డిమాండ్‌ తదితర అంశాలపై ఆధారపడి ఉంటుంది.