Stock Market: నష్టాల్లో ముగిసిన సూచీలు.. 24,100 దిగువకు నిఫ్టీ

వ్రాసిన వారు Jayachandra Akuri

Aug 31, 2026

04:14 pm

ఈ వార్తాకథనం ఏంటి

భౌగోళిక, రాజకీయ ఉద్రిక్త పరిస్థితుల ప్రభావంతో దేశీయ స్టాక్ మార్కెట్ సూచీలు సోమవారం నష్టాల్లో ముగిశాయి. అమెరికా-ఇరాన్ పరస్పర దాడులకు దిగడం, అంతర్జాతీయ మార్కెట్‌లో క్రూడాయిల్ ధరలు మరోసారి పెరగడం ఇన్వెస్టర్ల సెంటిమెంట్‌ను దెబ్బతీశాయి. దీంతో అంతర్జాతీయ మార్కెట్లతో పాటు భారత స్టాక్ మార్కెట్లలోనూ ప్రతికూల వాతావరణం నెలకొంది. ముఖ్యంగా ఐటీ, మెటల్, రియల్టీ, మీడియా రంగాల షేర్లలో అమ్మకాల ఒత్తిడి కనిపించింది. అంతర్జాతీయ మార్కెట్ల నుంచి వచ్చిన ప్రతికూల సంకేతాల నేపథ్యంలో బీఎస్‌ఈ సెన్సెక్స్ ఉదయం 77,130.73 పాయింట్ల వద్ద నష్టాలతో ప్రారంభమైంది. గత ముగింపు 77,264.51 పాయింట్లుగా ఉంది.

వివరాలు

రూపాయి మారకం విలువ 95.22

ట్రేడింగ్ మొత్తం సెన్సెక్స్ నష్టాల్లోనే కొనసాగింది. ఇంట్రాడేలో 76,751.32 పాయింట్ల కనిష్ఠాన్ని తాకిన సూచీ.. చివరకు 307.24 పాయింట్లు కోల్పోయి 76,957.27 వద్ద స్థిరపడింది.

అదే సమయంలో ఎన్‌ఎస్‌ఈ నిఫ్టీ 95.25 పాయింట్లు నష్టపోయి 24,080.40 వద్ద ముగిసింది. డాలర్‌తో పోలిస్తే రూపాయి మారకం విలువ 95.22గా నమోదైంది.

సెన్సెక్స్ 30 సూచీలో అదానీ పోర్ట్స్, ఐటీసీ, భారతీ ఎయిర్‌టెల్, హెచ్‌డీఎఫ్‌సీ బ్యాంక్, ఇన్ఫోసిస్ షేర్లు ప్రధానంగా నష్టాలను చవిచూశాయి.

మరోవైపు సన్‌ఫార్మా, ఐసీఐసీఐ బ్యాంక్, యాక్సిస్ బ్యాంక్, ఎస్‌బీఐ, బజాజ్ ఫిన్‌సర్వ్ షేర్లు లాభాల్లో ముగిశాయి.

వివరాలు

బంగారం ఔన్సు ధర 4,451 డాలర్ల వద్ద ట్రేడ్

అంతర్జాతీయ కమోడిటీ మార్కెట్ విషయానికి వస్తే.. బ్రెంట్ క్రూడ్ బ్యారెల్ ధర 91.31 డాలర్ల వద్ద కొనసాగుతోంది.

మరోవైపు బంగారం ఔన్సు ధర 4,451 డాలర్ల వద్ద ట్రేడవుతోంది.

దీంతో భౌగోళిక ఉద్రిక్తతలు, క్రూడాయిల్ ధరల కదలికలు తదుపరి ట్రేడింగ్‌లోనూ మార్కెట్లపై ప్రభావం చూపే అవకాశం ఉందని ఇన్వెస్టర్లు గమనిస్తున్నారు.