Tata Group: టాటా గ్రూప్ కీలక నిర్ణయం...అమ్మకానికి కీలక బ్రాండ్
ఈ వార్తాకథనం ఏంటి
దేశంలో డేటా సెంటర్లకు డిమాండ్ వేగంగా పెరుగుతున్న సమయంలో టాటా గ్రూప్‌కు సంబంధించిన కీలక వ్యాపారంలో వాటాల విక్రయంపై చర్చలు మొదలయ్యాయి. ప్రముఖ డేటా సెంటర్ సంస్థ STT గ్లోబల్ డేటా సెంటర్స్ ఇండియా (STT GDC India)లో పెట్టుబడులను విక్రయించే అవకాశాన్ని టాటా గ్రూప్‌తో పాటు అంతర్జాతీయ పెట్టుబడి సంస్థలు పరిశీలిస్తున్నట్లు నివేదికలు వెల్లడించాయి. ఈ డీల్ విలువ 5.5 బిలియన్ డాలర్లకు పైగా ఉండవచ్చని అంచనా. భారత కరెన్సీలో ఇది సుమారు రూ.50 వేల కోట్లకు మించిన మొత్తం. అయితే ఇప్పటివరకు ఒప్పందం ఖరారు కాలేదు.
Details
10 నగరాల్లో 34 డేటా సెంటర్లు
STT GDC India దేశంలోని ప్రముఖ డేటా సెంటర్ సంస్థల్లో ఒకటి. ప్రస్తుతం 10 నగరాల్లో 34 కేంద్రాలను నిర్వహిస్తోంది.
వీటి మొత్తం సామర్థ్యం 613 మెగావాట్లు. సాధారణంగా డేటా సెంటర్లలో సర్వర్లు, నెట్‌వర్కింగ్ పరికరాలు ఉంటాయి.
బ్యాంకింగ్, ఈ-కామర్స్, క్లౌడ్ సేవలు, ఏఐ వంటి డిజిటల్ కార్యకలాపాలకు అవసరమైన సమాచారాన్ని ఇవి భద్రపరుస్తాయి. అందుకే డిజిటల్ వినియోగం పెరుగుతున్న కొద్దీ వీటి వ్యాపార విలువ కూడా పెరుగుతోంది.
Details
టాటా కమ్యూనికేషన్స్‌కు 26 శాతం వాటా
ఈ వ్యాపారంలో ST టెలీమీడియాకు 74 శాతం, టాటా కమ్యూనికేషన్స్‌కు 26 శాతం వాటా ఉంది.
ST టెలీమీడియా గ్లోబల్ డేటా సెంటర్స్ వ్యాపారంలో కేకేఆర్, సింగ్‌టెల్ ప్రధాన పెట్టుబడిదారులుగా ఉన్నారు. 2016లో ఈ వ్యాపారంలో 74 శాతం వాటాను కొనుగోలు చేసినప్పుడు దాని విలువ సుమారు రూ.3,140 కోట్లుగా ఉంది.
అప్పటి నుంచి క్లౌడ్ కంప్యూటింగ్, డిజిటల్ సేవల విస్తరణతో ఈ రంగం గణనీయంగా అభివృద్ధి చెందింది.
Details
ఆదాయం పెరిగినా లాభాల్లో తగ్గుదల
టాటా కమ్యూనికేషన్స్ వార్షిక నివేదిక ప్రకారం FY26లో STT India ఆదాయం రూ.2,747.5 కోట్లకు చేరింది. అంతకుముందు ఏడాదితో పోలిస్తే 17 శాతానికి పైగా వృద్ధి నమోదైంది.
అయితే నికర లాభం మాత్రం రూ.163.5 కోట్ల నుంచి రూ.126 కోట్లకు తగ్గింది. ఆదాయం పెరుగుతున్నా లాభాలపై ఒత్తిడి ఉన్నట్లు ఈ గణాంకాలు సూచిస్తున్నాయి.
ఒకవైపు STT India పెట్టుబడుల విక్రయంపై చర్చలు జరుగుతుండగా, మరోవైపు టాటా గ్రూప్ ఈ రంగంలో కొత్త అవకాశాలను అన్వేషిస్తోంది.
టీసీఎస్, ప్రైవేట్ ఈక్విటీ సంస్థ TPGతో కలిసి స్వతంత్ర డేటా సెంటర్ ప్లాట్‌ఫామ్‌ను ఏర్పాటు చేసే ప్రణాళికను ప్రకటించింది.
అంటే ప్రస్తుత పెట్టుబడులపై నిర్ణయం తీసుకుంటూనే, భవిష్యత్తు డిజిటల్ అవసరాలకు అనుగుణంగా వ్యాపార మార్గాలను టాటా పరిశీలిస్తోంది.