ఆర్ఆర్ఆర్ హీరోలకు హాలీవుడ్ లో అవకాశం?
అమెరికాలో ఆర్ఆర్ఆర్ సినిమా ఆస్కార్ ప్రమోషన్లు జోరు మీద నడుస్తున్నాయి. గోల్డెన్ గ్లోబ్ అందుకున్న తర్వాత ఆస్కార్ కూడా ఒడిసి పట్టుకుంటుందన్న ధీమా అందరిలోనూ పెరిగిపోయింది. ఆల్రెడీ బెస్ట్ సాంగ్ విభాగంలో షార్ట్ లిస్ట్ అయ్యింది నాటు నాటు పాట. అలాగే ఉత్తమ చిత్రం విభాగంలో రిమైండర్ లిస్ట్ లో ఉంది. ఆస్కార్ కి నామినేట్ అయ్యిందా లేదా అనేది జనవరి 24వ తేదీన తెలిసిపోతుంది. ప్రస్తుతానికి నామినేషన్ల కోసం ఓటింగ్స్ జరుగుతున్నట్టు సమాచారం. ఇదిలా ఉంటే ఆర్ఆర్ఆర్ హీరోలకు హాలీవుడ్ అవకాశాలు వస్తున్నాయని బయట టాక్ నడుస్తోంది. గోల్దెన్ గ్లోబ్ ఈవెంట్ కోసం అమెరికా వెళ్ళిన రామ్ చరణ్, ఎన్టీఆర్.. ఇద్దరు కూడా అమెరికా మీడియాకు ఇంటర్వ్యూలు ఇచ్చారు.
హాలీవుడ్ పెద్ద సంస్థల నుండి అవకాశం
ఆర్ఆర్ఆర్ విజయం, అందుకు హీరోలు చేసిన కృషి, అమెరికాలో ప్రమోషన్స్ మొదలైనవన్నీ చూస్తే హాలీవుడ్ నుండి అవకాశాలు వస్తున్నట్టు వినిపిస్తోంది. రామ్ చరణ్, జూనియర్ ఎన్టీఆర్ లతో సినిమా చేయాలని హాలీవుడ్ నిర్మాణ సంస్థలు అనుకుంటున్నాయట. అన్నీ కుదిరితే మరికొద్ది రోజుల్లో ఈ విషయంపై అధికారిక సమాచారం వచ్చే అవకాశం ఉంది. ఆల్రెడీ రాజమౌళికి హాలీవుడ్ నిర్మాణ సంస్థ సీఏఏ (క్రియేటివ్ ఆర్టిస్ట్ ఏజెన్సీ) నుండి ఆఫర్ వచ్చింది. మొత్తానికి ఆర్ఆర్ఆర్ సినిమాతో హాలీవుడ్ ద్వారాలు తెరుచుకున్నట్టే అనిపిస్తోంది. ఇది రాజమౌళి, ఎన్టీఆర్, రామ్ చరణ్ లకే కాదు తెలుగు సినిమాకు కూడా అతిపెద్ద గౌరవం. ఆర్ఆర్ఆర్ హీరోలకు హాలీవుడ్ లో అవకాశం వస్తే తెలుగు మార్కెట్ మరింత పెరుగుతుందని అభిమానులు ఆశపడుతున్నారు.
