Raja Saab: ప్రభాస్ ఫ్యాన్స్‌కు గుడ్‌న్యూస్.. రిలీజ్ డేట్‌తో పాటు టీజర్ టైమ్ అనౌన్స్‌మెంట్!
ఈ వార్తాకథనం ఏంటి
రెబల్ స్టార్ ప్రభాస్ ప్రధాన పాత్రలో నటిస్తున్న హారర్ కామెడీ చిత్రం 'రాజాసాబ్' గురించి కీలక అప్డేట్‌ను మేకర్స్ తాజాగా విడుదల చేశారు. మారుతి దర్శకత్వంలో రూపొందుతున్న ఈ భారీ బడ్జెట్ చిత్రం పై అభిమానుల్లో భారీ అంచనాలు నెలకొన్నాయి. అయితే షూటింగ్ ఆలస్యం కావడం, విడుదల వాయిదాలు పడటం వంటివి ఫ్యాన్స్‌లో కొంత నిరాశను కలిగించాయి. ఆ నిరాశను తీర్చేందుకు చిత్ర బృందం ఇప్పుడు రెండు ముఖ్యమైన ప్రకటనలు చేసింది. మేకర్స్ ప్రకారం, 'రాజాసాబ్' చిత్రాన్ని డిసెంబర్ 5న ప్రపంచవ్యాప్తంగా విడుదల చేయనున్నారు. అంతేకాదు, ఈ నెల జూన్ 16న ఉదయం 10:52 గంటలకు టీజర్‌ను విడుదల చేయనున్నట్లు కూడా అధికారికంగా ప్రకటించారు.
Details
ప్రత్యేక పోస్టర్ రిలీజ్
ఈ ప్రకటన సందర్భంగా ఒక ప్రత్యేక పోస్టర్‌ను కూడా విడుదల చేశారు. ఈ చిత్రంలో ప్రభాస్ సరసన మాళవిక మోహనన్, నిధి అగర్వాల్ హీరోయిన్లుగా నటిస్తుండగా, యువ కథానాయిక రిద్ధి కుమార్ ప్రత్యేక పాత్రలో కనిపించనున్నారు. అలాగే ప్రముఖ బాలీవుడ్ నటుడు సంజయ్ దత్, ప్రభాస్ తాత పాత్రలో కనిపించనుండగా, ఆయనతో ప్రభాస్‌కు ఉన్న సన్నివేశాలు సినిమాకు ప్రధాన హైలైట్‌గా నిలవబోతున్నాయని టీమ్ వెల్లడించింది. ఈ చిత్రానికి తమన్ సంగీతాన్ని అందిస్తున్నారు. ఇప్పటికే ప్రభాస్ చేతిలో 'ఫౌజీ' (హను రాఘవపూడి), 'స్పిరిట్'(సందీప్ రెడ్డి వంగా), 'సలార్ 2', 'కల్కి 2' వంటి భారీ ప్రాజెక్టులు ఉన్నాయి. అయినా 'రాజాసాబ్' సినిమా ప్రభాస్ కెరీర్‌లో ప్రత్యేకమైన చిత్రంగా నిలవబోతుందని సినీ వర్గాల్లో చర్చ నడుస్తోంది.