Vidya Balan: హోటల్ గదికి రావాలని పట్టుబట్టాడు.. ఆ తర్వాత సినిమా నుంచి తీసేశాడు: విద్యా బాలన్
ఈ వార్తాకథనం ఏంటి
ప్రముఖ బాలీవుడ్ నటి విద్యా బాలన్ తన సినీ కెరీర్ ప్రారంభంలో ఎదుర్కొన్న ఓ చేదు అనుభవానికి సంబంధించిన వ్యాఖ్యలు ప్రస్తుతం మరోసారి సోషల్ మీడియాలో వైరల్ అవుతున్నాయి. ఓ సినిమా దర్శకుడు తనను హోటల్ గదికి రావాలని పదేపదే పట్టుబట్టాడని, ఆ తర్వాత తనను ఆ సినిమా ప్రాజెక్ట్ నుంచి తొలగించారని ఆమె గతంలో వెల్లడించారు. ఈ సంఘటన తనకు ఎదురైన అనుభవాల్లో ఒకటని విద్యా బాలన్ గుర్తుచేసుకున్నారు. చెన్నైలో ఓ యాడ్ ఫిల్మ్ షూటింగ్ కోసం వెళ్లిన సమయంలో ఈ ఘటన చోటుచేసుకుందని ఆమె తెలిపారు. అప్పటికే ఓ సినిమాకు సంతకం చేసిన విద్యా బాలన్.. ఆ చిత్ర దర్శకుడిని కలవాల్సి వచ్చిందని చెప్పారు.
వివరాలు
కాఫీ షాప్‌లో కలుద్దామని చెప్పారు
అయితే అతడిని ఎక్కడ కలవాలనే విషయంలోనే సమస్య ఎదురైందని వివరించారు.
తాను కాఫీ షాప్‌లో కలుద్దామని సూచించినప్పటికీ, దర్శకుడు మాత్రం హోటల్ గదిలో మాట్లాడుకుందామని పదేపదే పట్టుబట్టాడని విద్యా బాలన్ వెల్లడించారు.
అతడి ప్రవర్తనతో అనుమానం కలగడంతో అప్రమత్తంగా వ్యవహరించానని చెప్పారు. "కాఫీ షాప్‌లో కలుద్దామని నేను చెప్పాను.
కానీ, అతను మాత్రం హోటల్ గదికి వెళ్లి మాట్లాడుకుందామని పదేపదే పట్టుబట్టాడు. అతని ఉద్దేశంపై నాకు అనుమానం వచ్చింది.
అందుకే గదిలోకి వెళ్లిన తర్వాత సమయస్ఫూర్తితో వ్యవహరించి తలుపును తెరిచే ఉంచాను. దీంతో ఐదు నిమిషాల్లోనే అతను అక్కడి నుంచి వెళ్లిపోయాడని విద్యా బాలన్ వివరించారు.
వివరాలు
పరిస్థితిని ముందుగానే అంచనా వేశా
అయితే, ఈ సంఘటన జరిగిన తర్వాత తనను ఆ సినిమా ప్రాజెక్ట్ నుంచి తొలగించారని ఆమె పేర్కొన్నారు.
దర్శకుడు తనకు ఎలాంటి తప్పుడు ప్రతిపాదన చేయలేదని, అయితే అతడి ప్రవర్తన వెనుక ఉన్న ఉద్దేశాన్ని తాను అర్థం చేసుకున్నానని తెలిపారు.
అందుకే తన భద్రతకు ప్రాధాన్యమిస్తూ జాగ్రత్తగా వ్యవహరించానని స్పష్టం చేశారు. ఈ ఘటనను పూర్తిస్థాయి క్యాస్టింగ్ కౌచ్ అనుభవంగా పరిగణించలేమని విద్యా బాలన్ అభిప్రాయపడ్డారు.
అయినప్పటికీ, పరిస్థితిని ముందుగానే అంచనా వేసి స్వీయరక్షణ కోసం అప్రమత్తంగా ఉండటం అవసరమని ఆమె వ్యాఖ్యల ద్వారా స్పష్టమవుతోంది.
వివరాలు
ఆ విషయంలో అదృష్టవంతురాలిని : విద్యా బాలన్
సినీ పరిశ్రమలో తనకు ఇలాంటి సంఘటనలు ఎక్కువగా ఎదురుకాలేదని విద్యా బాలన్ చెప్పారు. ఈ విషయంలో తాను అదృష్టవంతురాలినని పేర్కొన్నారు.
సినిమా అవకాశాల కోసం వ్యక్తిగత భద్రతను ప్రమాదంలో పెట్టాల్సిన అవసరం లేదని ఆమె స్పష్టం చేశారు.
ఏ అవకాశం కూడా మన భద్రతను పణంగా పెట్టేంత విలువైనది కాదని విద్యా బాలన్ చేసిన వ్యాఖ్యలు మరోసారి చర్చనీయాంశంగా మారాయి.