కళ్యాణ్ రామ్ డెవిల్: విడుదలకు దగ్గరపడుతున్న సమయంలో సినిమా నుండి తప్పుకున్న దర్శకుడు
నందమూరి కళ్యాణ్ రామ్ హీరోగా నవీన్ మేడారం దర్శకత్వంలో డెవిల్ సినిమా తెరకెక్కుతున్న సంగతి తెలిసిందే. సంయుక్తా మీనన్ హీరోయిన్ గా నటిస్తున్న ఈ సినిమా నుండి నిన్న ఒకానొక పోస్టర్ రిలీజైంది. అయితే ఈ పోస్టర్లో దర్శకుడు నవీన్ మేడారం పేరు ఎక్కడా కనిపించలేదు. ట్విట్టర్లో ఈ పోస్టర్ ని రిలీజ్ చేస్తూ, హీరో కళ్యాణ్ రామ్ ని ఇతర సాంకేతిక నిపుణులను ట్యాగ్ చేసిన నిర్మాణ సంస్థ, దర్శకుడు నవీన్ మేడారం పేరును ట్యాగ్ చేయలేదు. దీంతో డెవిల్ సినిమా నుండి దర్శకుడు తప్పుకున్నాడని వార్తలు వచ్చాయి. తాజా సమాచారం ప్రకారం ఈ వార్తలు నిజమేనని తెలుస్తోంది.
నిర్మాతతో విభేదాలే కారణం
నిర్మాతతో విభేదాల కారణంగా డెవిల్ సినిమా నుండి దర్శకుడు నవీన్ మేడారం తప్పుకున్నాడని అంటున్నారు. షూటింగ్ మొత్తం పూర్తయిన తర్వాత పోస్ట్ ప్రొడక్షన్ పనులు జరుగుతున్న సమయంలో సినిమా నుండి దర్శకుడు తప్పుకోవడం సినిమా ఇండస్ట్రీలో చర్చనీయాంశంగా మారింది. మరి దర్శక నిర్మాతల మధ్య జరిగిన వివాదం ఏంటో తెలియాలంటే అధికారికంగా ఎవరో ఒకరు స్పందించాల్సిందే. అదలా ఉంచితే, డెవిల్ సినిమాలో బ్రిటిష్ సీక్రెట్ ఏజెంట్ గా కళ్యాణ్ రామ్ కనిపించబోతున్నారు. ఈ సినిమా నుండి రిలీజైన గ్లింప్స్ వీడియోకు ప్రేక్షకుల నుండి మంచి స్పందన వచ్చింది. ప్యాన్ ఇండియా రేంజ్ లో తెలుగు, తమిళం, కన్నడ, మలయాళం, హిందీ భాషల్లో నవంబర్ 24న విడుదలవుతుంది.
