కేజీఎఫ్ హీరోయిన్ కి తెలుగులో అవకాశం, సీనియర్ హీరో సరసన?
బాహుబలి స్ఫూర్తితో దక్షిణాది నుండి చాలా సినిమాలు పాన్ ఇండియా రేంజ్ లో రిలీజ్ అయ్యాయి. అలా రిలీజైన వాటిల్లో మొదటగా అందరినీ ఆకర్షించింది మాత్రం కేజీఎఫ్ అని చెప్పవచ్చు. చాలా నిశ్శబ్దంగా వచ్చిన ఈ చిత్రం, థియేటర్లలో జన సునామీని, బాక్సాఫీసు వద్ద వసూళ్ళ వర్షాన్ని కురిపించింది. కేజీఎఫ్ ఛాప్టర్2, 1200కోట్లకు పైగా వసూళ్ళను కొల్లగొట్టింది. దీంతో ఇందులో నటించిన హీరో యష్, హీరోయిన్ శ్రీనిధి శెట్టి పాన్ ఇండియా స్టార్లుగా మారిపోయారు. గత కొన్ని రోజులుగా శ్రీనిధి శెట్టి గురించి అనేక వార్తలు వస్తున్నాయి. తన నెక్స్ట్ సినిమా ఏంటనేది ఇప్పటివరకు ప్రకటన రాలేదు. కేజీఎఫ్ స్టార్ డమ్ తో పారితోషికం ఎక్కువ అడిగిందని, దానివల్ల అవకాశాలు రాలేదని అన్నారు.
వెంకటేష్ సరసన నటించబోతున్నట్లు వార్తలు
తాజా సమాచారం ప్రకారం శ్రీనిధి శెట్టికి తెలుగు సినిమాలో అవకాశం లభించిందని సోషల్ మీడియాలో వార్తలు వస్తున్నాయి. హిట్ 1, హిట్ 2 చిత్రాల దర్శకుడు డాక్టర్ శైలేష్ కొలను నెక్స్ట్ సినిమాలో శ్రీనిధి హీరోయిన్ గా ఉండనుందని వినిపిస్తోంది. విక్టరీ వెంకటేష్ కి శైలేష్ కొలను ఒక కథ చెప్పాడని, అది నచ్చడంతో వెంకటేష్ ఒప్పుకున్నారని టాక్. వెంకటేష్ సరసన శ్రీనిధి శెట్టి కనిపించనుందని అనుకుంటున్నారు. ఈ విషయమై ఇంకా అధికారిక ప్రకటన రాలేదు కానీ ఈ వార్త నిజమైతే తెలుగులో శ్రీనిధి శెట్టికి మంచి వెల్కమ్ అందినట్లే. ప్రస్తుతం సల్మాన్ ఖాన్ హీరోగా నటిస్తున్న "కిసీకా భాయ్ కిసీకీ జాన్" అనే సినిమాలో ఒక పాత్రలో వెంకటేష్ కనిపిస్తున్నారు.
