అది వినగానే పవన్ కళ్యాణ్ చప్పట్లు కొట్టారు.. ఖుషీ నిర్మాత ఏఎమ్ రత్నం
పవర్ స్టార్ పవన్ కల్యాణ్ కెరీర్ లో ఖుషీ సినిమాకి ప్రత్యేక స్థానం ఉంది. 2001లో విడుదలైన ఈ సినిమా, పవన్ కళ్యాణ్ నటనకు సరికొత్త స్టైల్ ని తీసుకొచ్చింది. దాంతో పాటు అభిమానులను పెంచింది. భూమికా చావ్లా హీరోయిన్ గా మెరిసిన ఈ సినిమాను ఏఎమ్ రత్నం నిర్మించారు. ఎస్ జే సూర్య దర్శకత్వం వహించగా మణిశర్మ మ్యూజిక్ అందించారు. 21ఏళ్ల క్రితం అందరి హృదయాలను తాకిన ఖుషీ, మరోమారు థియేటర్లలో సందడి చేయనుంది. ఈ నెల 31వ తేదీన రీరిలీజ్ కి సిద్ధం అవుతోంది. ఈ నేపథ్యంలో అప్పుడు సినిమా చూసి ఆనందంలో మునిగిపోయిన వారు ఇప్పుడు మళ్ళీ అలాంటి అనుభూతి కోసం ఎదురుచూస్తున్నారు.
ఆ పాట ఆలోచన పవన్ కళ్యాణ్ దే
రీరిలీజ్ సందర్భంగా ట్రైలర్ ని రిలీజ్ చేసిన నిర్మాత ఏఎమ్ రత్నం, సినిమా ఎలా మొదలైందనే విషయం గురించి మీడియాతో కొన్ని విషయాలు పంచుకున్నారు. ఖుషీ సినిమా కథ విన్నప్పుడు చాలా ఎక్సైటింగ్ గా అనిపించిందని, సున్నితమైన ప్రేమకథ ప్రేక్షకులకు అందించబోతున్నామనే నమ్మకం ఉండిందని, ఆ నమ్మకాన్ని ఎస్ జే సూర్య నెరవేర్చాడని అన్నారు. కథ వినగానే పవన్ కళ్యాణ్ ఆనందంగా చప్పట్లు కొట్టాడని ఏఎమ్ రత్నం చెప్పుకొచ్చారు. యే మేరాజాహ పాట ఆలోచన పవన్ కళ్యాణ్ దే అని అన్నారు. హీరో కోలకతాలో పెరుగుతాడు కాబట్టి ఆ పాట హిందీలో ఉంటే బాగుంటుందని పవన్ కళ్యాణ్ చెప్పారని, ఆ ఐడియా తనకు బాగా నచ్చిందని అన్నారు ఏఎమ్ రత్నం.
