కరాటే కళ్యాణికి షాక్: ఎన్టీఆర్ విగ్రహావిష్కరణ విషయంలో వివాదంపై నోటీసులు జారీ చేసిన మంచు విష్ణు
ఈ వార్తాకథనం ఏంటి
సినీ నటి కరాటే కళ్యాణీకి షాక్ తగిలింది. ఖమ్మంలో ఎన్టీఆర్ విగ్రహావిష్కరణ విషయంలో వివాదం చెలరేగుతుండడంతో మంచు విష్ణు నోటీసులు పంపించారని తెలుస్తోంది.
ఖమ్మంలోని లకారం ట్యాంక్ బండ్ దగ్గర 54అడుగుల శ్రీకృష్ణుడి ఆకారంలోని సీనియర్ ఎన్టీఆర్ విగ్రహాన్ని ఏర్పాటు చేయాలని చూస్తున్నారు. విగ్రహ ఏర్పాటుకు వ్యతిరేకంగా కరాటే కళ్యాణి మాట్లాడింది.
శ్రీకృష్ణుడి ఆకారంలోని సీనియర్ ఎన్టీఆర్ విగ్రహావిష్కరణ సరైన చర్య కాదని, శ్రీకృష్ణుడిగా ఒక మనిషిని ఆరాధించడం తమ మనోభావాలను దెబ్బతీయడమేనని అఖిల భారత యాదవ సంఘం అధ్యక్షురాలిగా ఆమె అభ్యంతరం తెలియజేసింది.
దీంతో మా సభ్యురాలిగా క్రమశిక్షణను ఉల్లంఘించిందని మా అధ్యక్షుడు మంచు విష్ణు షోకాజ్ నోటీసులు జారీ చేసారు.
Details
విగ్రహావిష్కరణ ముఖ్య అతిథిగా జూనియర్ ఎన్టీఆర్
ఎన్టీఆర్ విగ్రహా ఏర్పాటు విషయంలో ఆమె మాట్లాడిన మాటలు అనుచితంగా ఉన్నాయని, క్రమశిక్షణకు విరుద్ధంగా ఉన్నాయని, అందువల్లే షోకాజ్ నోటీసులు పంపినట్లు అర్థమవుతోంది.
ఈ నోటీసులకు మూడు రోజుల్లో స్పందించాలని నోటీసులోని సారాంశం. వివరణ ఇవ్వకపోతే చర్యలు తీసుకుంటామని హెచ్చరించారు.
కృష్ణుడి ఆకారంలోని ఎన్టీఆర్ విగ్రహాన్ని ఏర్పాటు చేయడానికి తెలంగాణ మంత్రి పువ్వాడ అజయ్ కుమార్ అన్ని ఏర్పాట్లు చేస్తున్నారు. ఈ విగ్రహావిష్కరణ కార్యక్రమానికి జూనియర్ ఎన్టీఆర్ ని గౌరవ అతిథిగా ఆహ్వానించారని సమాచారం.