వాల్తేరు వీరయ్య: ప్రీ రిలీజ్ డేట్ ఫిక్స్, ఒకరోజు ముందే ట్రైలర్ రిలీజ్
మెగాస్టార్ చిరంజీవి నటిస్తున్న వాల్తేరు వీరయ్య విడుదలకు సిద్ధమైంది. సంక్రాంతి సంబరంగా జనవరి 13వ తేదీన ప్రపంచ వ్యాప్తంగా మెగా అభిమానులకు పూనకాలు తెప్పించేందుకు రెడీ అయ్యింది. మాస్ మహారాజ్ రవితేజ, ఈ సినిమాలో అతిధి పాత్రలో కనిపిస్తున్నాడు. రవితేజ పాత్ర గురించి రిలీజ్ చేసిన చిన్న వీడియో క్లిప్పింగ్ అందరినీ ఆకట్టుకుంది. తెలంగాణ యాసలో రవితేజ చెప్పిన మాటలు అదనపు ఆకర్షణగా నిలిచాయి. ఇప్పటికే పూనకాలు లోడింగ్ పాటలో చిరంజీవి, రవితేజ కనిపించి అందరికీ కనువిందు చేసారు. ప్రస్తుతం ఈ సినిమా నుండి మరో రెండు అప్డేట్లు బయటకు వచ్చాయి. ఎప్పుడెప్పుడా అని ఎదురుచూస్తున్న ట్రైలర్ రిలీజ్ అవబోతుంది. జనవరి 7వ తేదీన ట్రైలర్ ని విడుదల చేస్తామని చిత్రబృందం ప్రకటించింది.
ప్రీ రిలీజ్ ఎప్పుడంటే
ప్రీ రిలీజ్ ఫంక్షన్ జనవరి 8వ తేదీన ఉంటుందని ఒక పొస్టర్ రిలీజ్ చేసి మరీ ప్రకటించారు. దీనికి మెగా మాస్ ఈవెంట్ అని పేరు పెట్టారు. విశాఖపట్నంలోని ఆంధ్రా యూనివర్సిటీ గ్రౌండ్ లో ఈ ప్రీ రిలీజ్ ఈవెంట్ ఉండనుందని సమాచారం. ఈ సినిమాలో చిరంజీవి సరసన శృతిహాసన్ హీరోయిన్ గా కనిపిస్తోంది. బాబీ కొల్లి ఈ చిత్రానికి దర్శకత్వం వహిస్తుండగా, దేవిశ్రీ ప్రసాద్ సంగీతం సమకూర్చారు. మైత్రీ మూవీస్ మేకర్స్ బ్యానర్ పై నవీన్ యెర్నేని, రవిశంకర్ నిర్మించారు. ఆచార్య, గాడ్ ఫాదర్ వంటి భిన్నమైన చిత్రాల తర్వాత పూర్తి మాస్ అంశాలతో వస్తున్న వాల్తేరు వీరయ్య, బాక్సాఫీసు వద్ద తన ప్రభావాన్ని గట్టిగా చూపిస్తుందని అభిమానులు అందరూ అనుకుంటున్నారు.
