సర్కార్ నౌకరి: హీరోగా మారుతున్న సింగర్ సునీత కొడుకు
సినిమా ఇండస్ట్రీలో వారసులకు కొదవలేదు. వరుసపెట్టి సినిమా ఇండస్ట్రీకి చెందిన కుటుంబాల నుండి వారసులు వస్తూనే ఉన్నారు. ఇప్పటికే తెలుగు ఇండస్ట్రీలో ఒక్కో కుటుంబం నుండి ఎక్కువ మొత్తంలో వారసులు ఉన్నారు. బాలీవుడ్, టాలీవుడ్ ఎక్కడైనా వారసుల ఆధిక్యం ఎక్కువగానే ఉంది. తాజాగా సింగర్ సునీత, తన కొడుకుని తెలుగు సినిమాల్లోకి తీసుకువస్తుంది. సింగర్ సునీత కొడుకు ఆకాష్, "సర్కార్ నౌకరి" అనే సినిమాతో తెలుగు సినిమాలోకి అడుగుపెడుతున్నాడు. గణతంత్ర దినోత్సవం సందర్భంగా హైదరాబాద్ లో లాంఛనంగా ప్రారంభమైంది. పూజా కార్యక్రమాలు పూర్తయ్యాక, సునీత భర్త రామ్ వీరపనేని, మొదటి షాట్ కి దర్శకత్వం వహించగా, దర్శకేంద్రుడు రాఘవేంద్రరావు మొదటి క్లాప్ కొట్టారు.
రాఘవేంద్ర రావు నిర్మాతగా తెరకెక్కుతున్న సర్కారు నౌకరి
సర్కార్ నౌకరి సినిమాలో ఆకాష్ సరసన భావన వజపండల్ అనే కొత్తమ్మాయి తెలుగు తెరకు పరిచయం కాబోతుంది. ఈ సినిమా రెగ్యులర్ షూటింగ్ ఫిబ్రవరి 6వ తేదీ నుండి మొదలవనుందని సమాచారం. ఆర్ కే టెలిఫిలిమ్ షో బ్యానర్ పై రూపొందుతున్న ఈ సినిమాను దర్శకుడు రాఘవేంద్రరావు నిర్మిస్తున్నారు. గంగమౌని శేఖర్ దర్శకత్వం వహిస్తున్నారు. ఆకాష్, భావన, తనికెళ్ళ భరణి ప్రధాన పాత్రల్లో కనిపించనున్నారు. మిగతా ముఖ్యమైన పాత్రల్లో ఎవరు చేస్తున్నారో వెల్లడి చేయలేదు. అలాగే సంగీతం ఎవరు చేస్తున్నారనేది ప్రకటించలేదు. మరి సునీత కొడుకు ఆకాష్, సర్కారు నౌకరి సినిమాతో ఎలాంటి ఫలితం అందుకుంటాడో చూడాలి. అలాగే ఎంతో మంది వారసుల మధ్య తనకంటూ ప్రత్యేక స్థానాన్ని ఏర్పర్చుకుంటాడో లేదో చూడాలి.
