AndhraPradesh: వయసు చిన్నదైనా సాహసం పెద్దది.. ప్రాణం కాపాడిన పసివాడికి ప్రశంసల వెల్లువ
ఈ వార్తాకథనం ఏంటి
ఆంధ్రప్రదేశ్ రాష్ట్రం ఏలూరు జిల్లా ఉంగుటూరు మండలం కైకరంలో ఓ బాలుడు సాహసం చేసి ప్రాణాన్ని కాపాడాడు.
తన ప్రాణాన్ని సైతం లెక్కచేయకుండా ఓ మహిళను రక్షించిన ఎనిమిదో తరగతి విద్యార్థి తెగువకు గ్రామస్థులతో పాటు అధికారులు ప్రశంసల వెల్లువెత్తిస్తున్నారు.
కైకరంలో ఓ పక్క షష్టి ఉత్సవాలు అంగరంగ వైభవంగా జరుగుతున్నాయి. మరోపక్క సాయంత్రం 6 గంటల సమయంలో కైకరం గ్రామానికి చెందిన చిన్నమ్ములు అనే మహిళ ఏలూరు కాలువలో పడిపోయింది. ఈ మేరకు అక్కడే ఉన్న బాలుడు యశ్వంత్, ఈ ఘటనను చూశాడు.
దీంతో క్షణం ఆలస్యం చేయకుండా కాలువలోకి దూకి ఆమెను పట్టుకుని ఒడ్డుకు చేర్చాడు. వెంటనే అక్కడ ఉన్న స్థానికులు హుటాహుటిన ఒడ్డుకొచ్చిన చిన్నమ్ములను బయటకు లాగారు.
details
అందరికీ స్ఫూర్తిగా నిలిచిన ఎనిమిదో తరగతి విద్యార్థి యశ్వంత్
సమయస్ఫూర్తితో వ్యవహరించిన బాలుడి సాహసం ఆమె ప్రాణాలను రక్షించాయి. ఇదే సమయంలో చిన్నమ్ములు ప్రమాదవశాత్తు కాలువలో పడిందా లేక కాలువలో దూకి ఆత్మహత్యకు పాల్పడిందా అనే విషయం మాత్రం ఇంకా తెలియలేదు.
యశ్వంత్ స్థానిక కైకరం జిల్లా పరిషత్ పాఠశాలలో ఎనిమిదో తరగతి చదువుతున్నాడు.యశ్వంత్'కు ఈతలో ప్రావీణ్యం ఉండటంతో కాలువలో కొట్టుకుపోతున్న మహిళను రక్షించి ప్రాణాలు నిలిపాడు.
ఎవరికో ఏమైతే నాకెందుకులే అని స్వార్థంగా ఆలోచించకుండా గొప్ప మనసుతో ప్రమాదంలో ఉన్న మహిళ ప్రాణాలు రక్షించిన బాలుడ్ని అభినందనలతో ముంచెత్తుతున్నారు.
ఎన్నో సందర్భాల్లో మన కళ్లముందే ఎంతో మంది ప్రమాదాల బారిన పడిన క్రమంలో బాధితులకు సాయం చేయకుండా చాలా మంది చూసిచూడనట్టు వెళ్లిపోతుంటారు.అలాంటి వారిలో బాలుడు స్ఫూర్తిని రగిలించాడని గ్రామస్తులు కొనియాడారు.