APPSC: ఏపీపీఎస్సీ నుంచి నిరుద్యోగులకు మరో శుభవార్త.. 1,466 పోస్టులకు 10 నోటిఫికేషన్లు
ఈ వార్తాకథనం ఏంటి
ఆంధ్రప్రదేశ్‌లో నిరుద్యోగ యువతకు ఏపీపీఎస్సీ మరో శుభవార్త అందించింది. రాష్ట్రంలో ఉద్యోగాల భర్తీకి ప్రకటించిన జాబ్‌ క్యాలెండర్‌ ప్రకారం ఇప్పటికే 892 పోస్టుల భర్తీకి నోటిఫికేషన్లు విడుదల చేయగా.. తాజాగా మంగళవారం మరో 1,466 ఉద్యోగాల భర్తీకి సంబంధించి 10 ప్రాథమిక నోటిఫికేషన్లను జారీ చేసింది. దరఖాస్తుల స్వీకరణ సమయానికి ఖాళీల సంఖ్య, రిజర్వేషన్లు, విద్యార్హతలు తదితర వివరాలతో కూడిన పూర్తిస్థాయి నోటిఫికేషన్లను విడుదల చేస్తామని ఏపీపీఎస్సీ ఇన్‌ఛార్జ్‌ ఛైర్మన్‌ శశిధర్‌ వెల్లడించారు. విజయవాడలోని ఏపీపీఎస్సీ కార్యాలయంలో సభ్యుడు సుధీర్‌తో కలిసి ఆయన మంగళవారం ఈ నోటిఫికేషన్ల వివరాలను ప్రకటించారు. అన్ని విభాగాలకు చెందిన పోస్టులను కలిపి గ్రూప్‌-2లో మొత్తం 686 ఉద్యోగాలను భర్తీ చేయనున్నట్లు తెలిపారు.
వివరాలు
నాన్‌ యూనిఫాం పోస్టులకు గరిష్ఠ వయోపరిమితి 44 ఏళ్లు
గ్రూప్‌-2 ఉద్యోగాలకు సంబంధించిన పూర్తిస్థాయి నోటిఫికేషన్‌ను నవంబర్‌ 9న విడుదల చేయనున్నట్లు పేర్కొన్నారు.
గ్రూప్‌-2 ఎంపిక ప్రక్రియలో భాగంగా స్క్రీనింగ్‌ పరీక్షను 150 మార్కులకు నిర్వహిస్తారు.
మెయిన్స్‌ పరీక్షలో రెండు పేపర్లు ఉంటాయి. ఒక్కో పేపర్‌కు 150 మార్కుల చొప్పున మొత్తం 300 మార్కులకు పరీక్ష నిర్వహించనున్నారు.
అభ్యర్థుల వయోపరిమితిని నిర్ణయించేందుకు జులై 1వ తేదీని ప్రామాణికంగా తీసుకుంటారు.
నాన్‌ యూనిఫాం పోస్టులకు దరఖాస్తు చేసుకునే అభ్యర్థులకు గరిష్ఠ వయోపరిమితిని 44 ఏళ్లుగా నిర్ణయించారు.
రిజర్వేషన్‌ కేటగిరీలకు చెందిన అభ్యర్థులకు నిబంధనల ప్రకారం అదనపు వయోపరిమితి సడలింపులు వర్తిస్తాయి.