NITI Aayog: అర్హతకు తగ్గ ఉద్యోగాలు పొందుతున్న గ్రాడ్యుయేట్లు 8.25 శాతమే: నీతి ఆయోగ్
ఈ వార్తాకథనం ఏంటి
భారత్లో గ్రాడ్యుయేట్లలో నిరుద్యోగం ఆందోళనకర స్థాయిలో ఉందని నీతి ఆయోగ్ పేర్కొంది. దేశ సగటు నిరుద్యోగ రేటుతో పోలిస్తే గ్రాడ్యుయేట్లలో ఈ సమస్య ఎక్కువగా ఉందని తెలిపింది. 'వికసిత్ భారత్ కోసం నైపుణ్యాభివృద్ధిని పునఃకల్పించడం' పేరుతో రూపొందించిన నివేదికలో ఈ అంశాలను ప్రస్తావించింది. బీఏ, బీఎస్సీ, బీకాం వంటి సాధారణ డిగ్రీలపై ఎక్కువగా ఆధారపడటం కూడా దీనికి ప్రధాన కారణాల్లో ఒకటని పేర్కొంది. అర్హతలకు సరిపోయే ఉద్యోగాల్లో పనిచేస్తున్న గ్రాడ్యుయేట్లు కేవలం 8.25 శాతం మాత్రమేనని నివేదిక వెల్లడించింది.
వివరాలు
గ్రాడ్యుయేట్లలో విద్యావంతుల నిరుద్యోగం అధికం
దేశంలోని ఉన్నత విద్యా విధానానికి, ఉద్యోగ మార్కెట్ అవసరాలకు మధ్య పెద్ద అంతరం ఉందని నీతి ఆయోగ్ తెలిపింది.
చాలా విద్యాసంస్థల్లోని సిలబస్ ఇప్పటికీ పాత పద్ధతుల్లోనే ఉందని, పరిశ్రమల్లో మారుతున్న అవసరాలకు అనుగుణంగా లేదని పేర్కొంది.
దీంతో డిగ్రీలు పూర్తి చేసినా ఉద్యోగం పొందే అవకాశాలు ఆశించిన స్థాయిలో ఉండటం లేదని వివరించింది.
దేశంలోని మొత్తం గ్రాడ్యుయేట్లలో 13 శాతం మంది నిరుద్యోగులుగా ఉన్నారని, గ్రాడ్యుయేట్ మహిళల్లో ఈ రేటు 20.4 శాతంగా ఉందని తెలిపింది.
ఇది దేశ సగటు నిరుద్యోగ రేటైన 3.2 శాతంతో పోలిస్తే చాలా ఎక్కువ.
వివరాలు
8.7 కోట్ల మంది యువత 'నీట్' కేటగిరీలో
15 నుంచి 29 ఏళ్ల మధ్య వయసున్న 8.7 కోట్ల మంది యువత 'NEET' కేటగిరీలో ఉన్నారని నివేదిక పేర్కొంది.
NEET అంటే చదువు, ఉద్యోగం లేదా శిక్షణలో లేని వారని అర్థం. అయితే ఈ సంఖ్యను నిరుద్యోగానికి సూచికగా పరిగణించకూడదని నీతి ఆయోగ్ మంగళవారం స్పష్టం చేసింది.
ఎందుకంటే ఈ కేటగిరీలో ఉద్యోగం కోసం ప్రయత్నించని వారు కూడా ఉంటారని వివరించింది.
భారత్లో వృత్తి విద్య, ప్రత్యామ్నాయ విద్యా మార్గాలపై ఉన్న సామాజిక వివక్షను కూడా నివేదిక ప్రస్తావించింది.
వివరాలు
పరీక్షల మార్కుల ఆధారంగానే కెరీర్ ఎంపికలు
వృత్తి నైపుణ్యాలు, ప్రత్యామ్నాయ విద్యా మార్గాలపై సమాజంలో ఇప్పటికీ ఉన్న అభిప్రాయాలు యువతను ప్రభావితం చేస్తున్నాయని నీతి ఆయోగ్ తెలిపింది.
సాంకేతిక శిక్షణ, పారిశ్రామిక శిక్షణ సంస్థలు (ఐటీఐలు), డిప్లొమా కోర్సులను కొందరు 'రెండో స్థాయి' విద్యా మార్గాలుగా భావిస్తున్నారని పేర్కొంది.
పరీక్షల్లో వచ్చిన మార్కులు, కుటుంబ సభ్యుల అభిప్రాయాలు, చదువుకు అయ్యే ఖర్చు వంటి అంశాల ఆధారంగానే చాలామంది కెరీర్ నిర్ణయాలు తీసుకుంటున్నారని తెలిపింది.
తమలాంటి సామాజిక, ఆర్థిక నేపథ్యం నుంచి వచ్చినవారు వృత్తి విద్య ద్వారా విజయాన్ని సాధించిన ఉదాహరణలు కనిపించకపోవడంతో ఈ విద్యా మార్గాలకు మొదటి నుంచే తక్కువ ప్రాధాన్యం లభిస్తోందని పేర్కొంది.
వివరాలు
సాధారణ డిగ్రీ కోర్సులను పరిశ్రమ అవసరాలకు అనుగుణంగా మార్చాలి
సాధారణ విశ్వవిద్యాలయ డిగ్రీ కోర్సులను పరిశ్రమ అవసరాలకు అనుగుణంగా ప్రత్యేక కోర్సులుగా మార్చాలని నీతి ఆయోగ్ సూచించింది.
అప్రెంటిస్షిప్తో కూడిన డిగ్రీ ప్రోగ్రామ్లు (AEDP), పని అనుభవంతో కూడిన డిగ్రీ ప్రోగ్రామ్లను (WIDP) విస్తరించాలని పేర్కొంది.
ప్రభుత్వ, ప్రైవేటు భాగస్వామ్యంతో ప్రత్యేక నైపుణ్యాభివృద్ధి విశ్వవిద్యాలయాలను ఏర్పాటు చేయాలని సూచించింది.
ఇప్పటికే ఉన్న ప్రభుత్వ విద్యా ప్రాంగణాల్లో ప్రత్యేక నైపుణ్యాభివృద్ధి కేంద్రాలను ఏర్పాటు చేయడంతో పాటు పరిశ్రమల భాగస్వామ్యంతో కాలేజీల్లో కోర్సులను రూపొందించాలని తెలిపింది.
స్థానిక ఉద్యోగ మార్కెట్ అవసరాలకు అనుగుణంగా కోర్సులు, శిక్షణలను మార్చుకునేలా ఐటీఐలకు విద్యా స్వేచ్ఛ కల్పించాలని, శిక్షకుల నియామకం, పరికరాల కొనుగోలులోనూ పరిపాలనా స్వేచ్ఛ ఇవ్వాలని నివేదిక సూచించింది.