AP Highcourt: ఎమ్మెల్యే ఆదిమూలంకు హైకోర్టులో బిగ్ రిలీఫ్.. కేసును కొట్టివేస్తూ తీర్పు
ఈ వార్తాకథనం ఏంటి
సత్యవేడు ఎమ్మెల్యే కోనేటి ఆదిమూలానికి హైకోర్టులో ఊరట లభించింది. ఆయనపై నమోదైన లైంగిక వేధింపుల కేసును ఉన్నత న్యాయస్థానం కొట్టివేసింది. తిరుపతి జిల్లా కేవీబీ పురం మండలానికి చెందిన బాధితురాలు ఇచ్చిన ఫిర్యాదు ఆధారంగా ఆదిమూలంపై తిరుపతి తూర్పు ఠాణా పోలీసులు కేసు నమోదు చేశారు. అయితే,ఈ కేసును కొట్టేయాలంటూ ఆదిమూలం హైకోర్టుకు దాఖలు చేసారు. తాజా విచారణలో, ఆయన తరఫున ఉన్న సీనియర్ న్యాయవాది సి.రఘు వాదిస్తూ,పోలీసులు ప్రాథమిక విచారణ చేయకుండా అనవసరంగా కేసు నమోదు చేశారని పేర్కొన్నారు. మూడో వ్యక్తి ఒత్తిడితో పిటిషనర్‌పై ఆ మహిళ ఫిర్యాదు చేశారని ఆయన తెలిపారు. ఈ అంశాన్ని న్యాయవాది హనీట్రాప్ గా వర్ణించారు.అత్యాచారం సెక్షన్‌ను నమోదు చేయడం చెల్లదని,అందువల్ల ఎఫ్‌ఐఆర్‌ను కొట్టేయాలని అభ్యర్థించారు.
వివరాలు
ఎఫ్‌ఐఆర్‌లో పేర్కొన్న అంశాలు అవాస్తవమని అఫిడవిట్‌
ఈ క్రమంలో, బాధితురాలికి చెందిన న్యాయవాది కె. జితేందర్ కూడా వాదనలు వినిపించారు. బాధితురాలు స్వయంగా కోర్టుకు హాజరై, ఆదిమూలంపై పోలీసులకు ఇచ్చిన ఫిర్యాదులోని ఆరోపణలు,ఎఫ్‌ఐఆర్‌లో పేర్కొన్న అంశాలు అవాస్తవమని అఫిడవిట్‌ను హైకోర్టులో దాఖలు చేశారు. ఈ విషయాలను పరిగణనలోకి తీసుకొని, ఎమ్మెల్యేపై కేసును కొట్టేయాలని కోర్టు తాజా ఉత్తర్వులు జారీ చేసింది.