Somasila: నాగర్కర్నూల్లో సోమశిల టూర్ గైడ్.. బోటింగ్, దర్శనం, టికెట్ వివరాలు
ఈ వార్తాకథనం ఏంటి
శ్రీశైలం బ్యాక్వాటర్ అందాలు, నల్లమల అడవుల నిశ్శబ్దం, పచ్చని కొండల మధ్య ప్రకృతి సోయగాలు, చారిత్రక ఆలయాల ప్రత్యేకత.. ఈ అన్నింటి సమ్మేళనం అయిన అందమైన పర్యాటక కేంద్రమే సోమశిల. నాగర్కర్నూల్ జిల్లాలోని కొల్లాపూర్కు దగ్గరలో ఉన్న ఈ ప్రదేశం ఇటీవలి కాలంలో పర్యాటకులను విపరీతంగా ఆకర్షిస్తోంది. కృష్ణా నది ఒడ్డున ఉన్న సోమశిలలో ఉదయం సూర్యోదయం, సాయంత్రం సూర్యాస్తమయం సమయంలో కనిపించే దృశ్యాలు ప్రత్యేకంగా ఉంటాయి. ఆ సమయాల్లో ఇక్కడి వాతావరణం మరో ప్రపంచంలోకి తీసుకెళ్లినట్టు అనిపిస్తుందని సందర్శకులు చెబుతున్నారు. శ్రీశైలం బ్యాక్వాటర్ కారణంగా నీటిలో మునిగిపోయిన పలు పాత దేవాలయాలను తిరిగి ఒడ్డున పునర్నిర్మించారు. వీటిని సమీపంలోని కొల్లాపూర్, జటప్రోలు ప్రాంతాల్లో తిరిగి నిర్మించి భక్తులకు దర్శనానికి అందుబాటులో ఉంచారు.
వివరాలు
బోటులో మల్లన్న దర్శనం
పర్యాటకుల కోసం సోమశిలలో కాటేజీలు కూడా ఏర్పాటు చేశారు. ఇక్కడ బస చేయడానికి మంచి సౌకర్యాలు ఉన్నాయి. అలాగే దగ్గరలోని మత్స్యకారులు తాజా చేపలతో తయారు చేసే వంటకాలు ప్రత్యేక ఆకర్షణగా నిలుస్తున్నాయి. సోమశిలలో తెలంగాణ టూరిజం శాఖతో పాటు కొన్ని ప్రైవేట్ సంస్థలు బోటింగ్ సౌకర్యాన్ని అందిస్తున్నాయి. ఫన్ యాక్, స్వాన్ బోట్, పెడల్ బోట్, కయాకింగ్ వంటి అనేక వినోదాత్మక బోటింగ్ ఎంపికలు పర్యాటకులకు అందుబాటులో ఉన్నాయి.
వివరాలు
పర్యాటకులకు భోజనం, అల్పాహారం సౌకర్యాలు
ఇక్కడి నుంచి బోటులో శ్రీశైలానికి వెళ్లే ప్రత్యేక ప్యాకేజీలను కూడా రాష్ట్ర పర్యాటక శాఖ నిర్వహిస్తోంది. సోమశిల నుంచి శ్రీశైలం వెళ్లేందుకు పెద్దలకు రూ.2,000, పిల్లలకు రూ.1,600 టికెట్ ధరగా నిర్ణయించారు. వెళ్లి తిరిగి రావాలనుకుంటే పెద్దలకు రూ.3,600, పిల్లలకు రూ.3,000 వసూలు చేస్తున్నారు. ఈ ప్రయాణంలో పర్యాటకులకు భోజనం, అల్పాహారం సౌకర్యాలు కూడా కల్పిస్తారు. సోమశిల నుంచి శ్రీశైలానికి మంగళవారం, గురువారం, శనివారం రోజుల్లో బోటింగ్ సర్వీసులు అందుబాటులో ఉంటాయి. అలాగే శ్రీశైలం నుంచి సోమశిలకు బుధవారం, శుక్రవారం, ఆదివారం బోటింగ్ నడుస్తుంది. టికెట్లు బుక్ చేసుకోవాలనుకునే వారు టూరిజం శాఖ అధికారిక వెబ్సైట్ ద్వారా ముందుగానే రిజర్వేషన్ చేసుకోవాలి.