THE World University Rankings 2027: ప్రపంచ యూనివర్సిటీ ర్యాంకింగ్స్‌లో భారత్‌ ఎక్కడ? ఐఐఎస్సీకి 254వ స్థానం

వ్రాసిన వారు Sirish Praharaju

Sep 30, 2026

04:40 pm

ఈ వార్తాకథనం ఏంటి

ప్రపంచ యూనివర్సిటీల ర్యాంకింగ్స్‌లో భారతీయ విద్యాసంస్థలు తమ స్థానాన్ని మరింత విస్తరిస్తున్నా.. టాప్‌-200లో మాత్రం చోటు దక్కించుకోలేకపోయాయి. 'టైమ్స్‌ హయ్యర్‌ ఎడ్యుకేషన్‌' (THE) విడుదల చేసిన వరల్డ్‌ యూనివర్సిటీ ర్యాంకింగ్స్‌ 2027లో బెంగళూరులోని ఇండియన్‌ ఇన్‌స్టిట్యూట్‌ ఆఫ్‌ సైన్స్‌ (IISc)భారతీయ యూనివర్సిటీల్లో అత్యుత్తమ స్థానాన్ని సాధించింది. ప్రపంచవ్యాప్తంగా ఐఐఎస్సీ 254వ స్థానంలో నిలిచింది. భారత్‌ నుంచి 143 యూనివర్సిటీలు THE వరల్డ్‌ యూనివర్సిటీ ర్యాంకింగ్స్‌ 2027లో భారత్‌ నుంచి మొత్తం 143యూనివర్సిటీలు చోటు సంపాదించాయి. గతేడాదితో పోలిస్తే ఈ సంఖ్య 15 పెరిగింది. వరుసగా రెండో ఏడాది ఆసియాలో అత్యధిక సంఖ్యలో యూనివర్సిటీలకు ప్రాతినిధ్యం వహించిన దేశంగా భారత్‌ నిలిచింది. అయితే టాప్‌-200లో మాత్రం ఒక్క భారతీయ విద్యాసంస్థ కూడా స్థానం దక్కించుకోలేదు.

వివరాలు

ఐఐఎస్సీ తర్వాత ఏ సంస్థలు?

భారతీయ విద్యాసంస్థల్లో ఐఐఎస్సీ తర్వాత సేవిత ఇన్‌స్టిట్యూట్‌ ఆఫ్‌ మెడికల్‌ అండ్‌ టెక్నికల్‌ సైన్సెస్‌ 326-350 ర్యాంకింగ్‌ బ్యాండ్‌లో నిలిచింది.

షూలిని యూనివర్సిటీ 451-500 బ్యాండ్‌లో ఉంది. జామియా మిల్లియా ఇస్లామియా, కేఐఐటీ యూనివర్సిటీలు 501-550 బ్యాండ్‌లో చోటు సంపాదించాయి.

ర్యాంకుల్లో మార్పులు ఇలా..

2026 ర్యాంకింగ్స్‌తో పోలిస్తే కొన్ని భారతీయ యూనివర్సిటీల స్థానాల్లో మార్పులు కనిపించాయి. సేవిత ఇన్‌స్టిట్యూట్‌ గతేడాది 351-400 బ్యాండ్‌లో ఉండగా.. ఈసారి 326-350 బ్యాండ్‌కు చేరింది.

కేఐఐటీ యూనివర్సిటీ 601-800 బ్యాండ్‌ నుంచి 501-550 బ్యాండ్‌కు ఎగబాకింది.

మరోవైపు షూలిని యూనివర్సిటీ గతేడాది 401-500 బ్యాండ్‌లో ఉండగా.. ఈసారి 451-500 బ్యాండ్‌లో నిలిచింది. జామియా మిల్లియా ఇస్లామియా 401-500 బ్యాండ్‌ నుంచి 501-550 బ్యాండ్‌కు వెళ్లింది.

వివరాలు

ఐఐఎస్సీకి 57.0 ఓవరాల్‌ స్కోరు

ఐఐఎస్సీ గతేడాది 201-250 బ్యాండ్‌లో ఉండగా.. ఈసారి 254వ స్థానాన్ని దక్కించుకుంది.

ర్యాంకింగ్స్‌లో ఐఐఎస్సీ మొత్తం 57.0 స్కోరు సాధించింది. పరిశోధన వాతావరణం విభాగంలో 98.0 స్కోరుతో మెరుగైన ప్రదర్శన నమోదు చేసింది.

బోధనలో 62.1, పరిశోధన నాణ్యతలో 58.6 స్కోర్లు సాధించింది. సేవిత ఇన్‌స్టిట్యూట్‌ మొత్తం స్కోరు 52.3-53.3 మధ్య నమోదైంది.

2,297 యూనివర్సిటీలతో ర్యాంకింగ్స్‌

THE వరల్డ్‌ యూనివర్సిటీ ర్యాంకింగ్స్‌ 2027లో 118 దేశాలు, ప్రాంతాలకు చెందిన 2,297 యూనివర్సిటీలు ఉన్నాయి.

ఆసియా నుంచి ఈసారి 1,000కుపైగా యూనివర్సిటీలు జాబితాలో చోటు దక్కించుకున్నాయి. గతేడాది ఆసియా నుంచి ర్యాంకింగ్స్‌లో ఉన్న యూనివర్సిటీల సంఖ్య 929గా ఉంది.

వివరాలు

మరోసారి అగ్రస్థానంలో ఆక్స్‌ఫర్డ్‌..

ప్రపంచ ర్యాంకింగ్స్‌లో ఆక్స్‌ఫర్డ్‌ యూనివర్సిటీ మరోసారి మొదటి స్థానాన్ని దక్కించుకుంది. వరుసగా 11వ ఏడాది ఆక్స్‌ఫర్డ్‌ అగ్రస్థానంలో నిలిచింది.

ఎంఐటీ రెండో స్థానాన్ని సాధించగా.. ప్రిన్స్‌టన్‌, స్టాన్‌ఫోర్డ్‌ యూనివర్సిటీలు సంయుక్తంగా మూడో స్థానంలో నిలిచాయి. కేంబ్రిడ్జ్‌ యూనివర్సిటీ ఐదో స్థానాన్ని దక్కించుకుంది.