Stock Market: స్వల్ప నష్టాల్లో ముగిసిన సూచీలు.. సెన్సెక్స్‌ 49, నిఫ్టీ 96 పాయింట్ల నష్టం

వ్రాసిన వారు Sirish Praharaju

Sep 30, 2026

04:19 pm

ఈ వార్తాకథనం ఏంటి

దేశీయ స్టాక్ మార్కెట్ సూచీలు బుధవారం ట్రేడింగ్‌లో తీవ్ర ఒడుదొడుకులను ఎదుర్కొన్నాయి. ఉదయం కొంతకాలం లాభాల్లో కొనసాగినప్పటికీ.. చివరికి స్వల్ప నష్టాలతో ముగిశాయి. ఇంట్రాడే గరిష్ఠ స్థాయి నుంచి సెన్సెక్స్ దాదాపు 650 పాయింట్లు వెనక్కి జారింది. అంతర్జాతీయ మార్కెట్‌లో క్రూడాయిల్ ధరలు అధిక స్థాయుల్లో కొనసాగడం, విదేశీ మదుపర్లు అమ్మకాలకు దిగడం మార్కెట్ సెంటిమెంట్‌పై ప్రభావం చూపాయి.

వివరాలు

స్వల్ప నష్టాల్లో సెన్సెక్స్

సెన్సెక్స్ (Sensex) బుధవారం ఉదయం 72,441.15 పాయింట్ల వద్ద నష్టాలతో ప్రారంభమైంది.

మంగళవారం 72,529.07 పాయింట్ల వద్ద సూచీ ముగిసింది. ప్రారంభ నష్టాల అనంతరం సెన్సెక్స్ కొద్దిసేపటికే లాభాల్లోకి వచ్చింది.

ఇంట్రాడేలో 73,062.23 పాయింట్ల గరిష్ఠాన్ని నమోదు చేసింది.

అయితే ఆ స్థాయి నుంచి మళ్లీ అమ్మకాల ఒత్తిడి ఎదురవడంతో లాభాలు ఆవిరయ్యాయి. చివరికి 48.78 పాయింట్ల నష్టంతో 72,480.29 వద్ద స్థిరపడింది.

వివరాలు

నిఫ్టీ కూడా నష్టాల్లోనే

నేషనల్ స్టాక్ ఎక్స్ఛేంజ్ సూచీ నిఫ్టీ (Nifty) కూడా బుధవారం నష్టాలతో ముగిసింది. 95.75 పాయింట్లు కోల్పోయిన నిఫ్టీ 22,620.45 వద్ద స్థిరపడింది.

మార్కెట్‌లో కొనసాగిన అస్థిరత కారణంగా కీలక సూచీలు రోజంతా హెచ్చుతగ్గులకు లోనయ్యాయి.

సెన్సెక్స్ 30 సూచీలో ఎటర్నల్, సన్‌ఫార్మా, టైటాన్, అదానీ పోర్ట్స్, టాటా స్టీల్ షేర్లు ప్రధానంగా నష్టపోయాయి. వీటిలో అమ్మకాల ఒత్తిడి సూచీలపై ప్రతికూల ప్రభావం చూపింది.

మరోవైపు కోటక్ మహీంద్రా బ్యాంక్, ఐసీఐసీఐ బ్యాంక్, ఇండిగో, యాక్సిస్ బ్యాంక్, అల్ట్రాటెక్ సిమెంట్ షేర్లు లాభాల్లో ముగిశాయి. ఈ స్టాక్స్‌లో కొనుగోళ్లు మార్కెట్ నష్టాలను కొంతమేర పరిమితం చేశాయి.

వివరాలు

క్రూడాయిల్, బంగారం ధరలు

అంతర్జాతీయ విపణిలో క్రూడాయిల్ ధరలు అధిక స్థాయుల్లో కొనసాగుతున్నాయి.

బ్రెంట్ క్రూడ్ బ్యారెల్ ధర 97 డాలర్ల వద్ద ట్రేడవుతోంది. మరోవైపు బంగారం ధర ఔన్సుకు 4,188 డాలర్ల వద్ద కొనసాగుతోంది.

డాలర్‌తో రూపాయి మారకం విలువ 95.81గా నమోదైంది.