Vijayanand: ఆంధ్రప్రదేశ్ కొత్త సీఎస్ గా విజయానంద్‌
ఈ వార్తాకథనం ఏంటి
ఆంధ్రప్రదేశ్ రాష్ట్ర ప్రభుత్వ నూతన ప్రధాన కార్యదర్శిగా కె. విజయానంద్‌ నియమితులయ్యారు.
1992 ఐఏఎస్‌ బ్యాచ్‌కు చెందిన విజయానంద్‌ను సీఎస్‌గా నియమిస్తూ ఆదివారం రాత్రి ప్రభుత్వం ఉత్తర్వులు జారీ చేసింది.
ప్రస్తుతం ఆయన ఇంధన శాఖ ప్రత్యేక ప్రధాన కార్యదర్శిగా సేవలు అందిస్తున్నారు.
ప్రస్తుత సీఎస్ నీరబ్‌కుమార్‌ ప్రసాద్‌ మంగళవారం పదవీ విరమణ చేయనుండగా, ఆయన స్థానంలో విజయానంద్‌ బాధ్యతలు చేపట్టనున్నారు.
వైఎస్సార్‌ జిల్లాలోని రాజుపాలెం మండలం అయ్యవారిపల్లె గ్రామం విజయానంద్‌ స్వస్థలం.
ఆయన మొదటి పోస్టింగ్‌ ఆదిలాబాద్‌ జిల్లాలో అసిస్టెంట్‌ కలెక్టర్‌గా జరిగింది. ఆ తర్వాత రంగారెడ్డి జిల్లా జాయింట్‌ కలెక్టర్‌గా, శ్రీకాకుళం, నల్గొండ జిల్లాల కలెక్టర్‌గా పనిచేశారు.
వివరాలు
ఏపీ ట్రాన్స్‌కో, జెన్‌కో ఎండీగా విజయానంద్‌
విజయానంద్‌ ఏపీ ట్రాన్స్‌కో, జెన్‌కో ఎండీగా సుదీర్ఘకాలం పాటు సేవలు అందించారు.
అలాగే రాష్ట్ర ప్రధాన ఎన్నికల అధికారి (సీఈఓ)గా కూడా ఆయన పని చేశారు.
2025 నవంబర్‌లో విజయానంద్‌ పదవీ విరమణ చేయనున్నారు. ఆయన పదవీకాలం ముగిసిన తర్వాత జలవనరుల శాఖ ప్రత్యేక ప్రధాన కార్యదర్శి సాయిప్రసాద్‌ను సీఎస్‌గా నియమించే అవకాశం ఉంది.
సాయిప్రసాద్‌ 1991 బ్యాచ్‌కు చెందిన ఐఏఎస్‌ అధికారి, ఆయనకు 2026 ఏప్రిల్‌ వరకూ సేవల అవకాశం ఉంది.
సీనియారిటీ పరంగా సాయిప్రసాద్‌ ముందు ఉన్నప్పటికీ, విజయానంద్‌ రిటైర్మెంట్‌ సమయానికి ఆయన పదవీ కాలం ముగియడంతో, ప్రభుత్వం ప్రస్తుతం విజయానంద్‌ను సీఎస్‌గా నియమించడమే సముచితం అని నిర్ణయించింది.