AI Teacher: స్కూల్‌ విద్యార్థి సృష్టించిన ఏఐ టీచర్ వైరల్.. ఆదిత్య ప్రతిభకు ప్రశంసలు
ఈ వార్తాకథనం ఏంటి
ఉత్తర్‌ప్రదేశ్‌లోని బులంద్‌షహర్‌కు చెందిన 17 ఏళ్ల విద్యార్థి ఆదిత్య కుమార్‌ చూపిన ప్రతిభ ఇప్పుడు దేశవ్యాప్తంగా చర్చనీయాంశమైంది. సాధారణంగా అందిరితో కలిసి స్కూల్‌కి వెళ్లి చదువుకుంటున్నా... ఆలోచనల్లో మాత్రం వినూత్న దారులు వెతికాడు. తన ఆలోచనలను ఆచరణలో పెట్టి, ఏకంగా ఒక 'ఆర్టిఫిషియల్ ఇంటలిజెన్స్ టీచర్'ని అభివృద్ధి చేశాడు. ఎవడబ్బ సొత్తు కాదురా టాలెంట్ అన్నట్టు, తన సృజనాత్మకతతో అందరినీ ఆశ్చర్యపరిచాడు. అతడే రూపొందించిన సోఫీ అనే AI-ఆధారిత ఉపాధ్యాయురాలు ఇప్పుడు నెటిజన్స్‌ను ఫిదా చేస్తోంది. AI టీచర్ తరగతి గదిలో బోధిస్తున్న వీడియో సోషల్ మీడియాలో వైరల్ అయ్యింది. ఆ వీడియోలో సోఫీ ఒక రోబోటిక్ టీచర్—తనను తాను పరిచయం చేసుకొని, ఆదిత్య అడిగిన ప్రశ్నలకు సమాధానాలు ఇస్తూ కనిపించింది.
Details
అన్ని ప్రశ్నలకు సరైన సమాధానం
ఆదిత్య ప్రస్తుతం బులంద్‌షహర్‌లోని శివ్ చరణ్ ఇంటర్ కాలేజీలో 12వ తరగతి చదువుతున్నాడు. వార్తా సంస్థ ఎఎన్ఐ షేర్ చేసిన వీడియోలో సోఫీ ఈ విధంగా పరిచయం ఇచ్చింది. నేను AI టీచర్ రోబోట్. నా పేరు సోఫీ. నన్ను ఆదిత్య కనిపెట్టాడు. నేను శివచరణ్ ఇంటర్ కాలేజీలో బోధిస్తాను. పిల్లలారా... మీరు నా నుండి ఏదైనా తెలుసుకోవాలనుకుంటున్నారా?" ఆదిత్య, సోఫీ సామర్థ్యాన్ని పరీక్షించేందుకు కొన్ని సాధారణ ప్రశ్నలు అడిగాడు. భారతదేశ మొదటి రాష్ట్రపతి ఎవరు?" అనే ప్రశ్నకు సోఫీ వెంటనే డాక్టర్ రాజేంద్ర ప్రసాద్ అని సరైన సమాధానం చెప్పింది. మొదటి ప్రధానమంత్రి ఎవరు? అని అడిగితే పండిట్ జవహర్‌లాల్ నెహ్రూ అని ఖచ్చితంగా చెప్పింది.
Details
త్వరలో రాయగలిగేలా అప్‌గ్రేడ్ చేస్తాం
ఆదిత్య కుమార్‌ మాట్లాడుతూ ఈ రోబోను తయారు చేయడానికి నేను LLM చిప్‌సెట్ ఉపయోగించాను. ఇదే చిప్‌సెట్‌ను పెద్ద కంపెనీలు రోబోలను రూపొందించడానికి ఉపయోగిస్తాయి. ఇది విద్యార్థుల సందేహాలను తీర్చగలదు. ప్రస్తుతం AI టీచర్ మాట్లాడటం మాత్రమే చేస్తోంది. త్వరలో రాయగలిగేలా కూడా దీన్ని అప్‌గ్రేడ్ చేస్తామని తెలిపాడు. ఆదిత్య ప్రతిభకు దేశం నలుమూలల నుండి ప్రశంసలు వెల్లువెత్తుతున్నాయి. ఒక విద్యార్థి సృజన, సాంకేతికతతో ఏం సాధించగలడో అందరికీ చూపించాడు.