Iran Warns US: దోహా చర్చల వేళ ఇరాన్ కీలక వ్యాఖ్యలు.. మాట తప్పితే యుద్ధమే
ఈ వార్తాకథనం ఏంటి
ఖతార్ రాజధాని దోహాలో అమెరికా-ఇరాన్ మధ్య కీలక చర్చలు ప్రారంభం కానున్న వేళ ఇరాన్ అమెరికాకు గట్టి హెచ్చరికలు జారీ చేసింది. దౌత్యపరంగా శాంతి చర్చలకు తాము పూర్తిగా కట్టుబడి ఉన్నప్పటికీ, ఒకవేళ చర్చలు విఫలమైతే లేదా అమెరికా తన హామీలను నిలబెట్టుకోకపోతే యుద్ధాన్ని ఎదుర్కొనేందుకు కూడా సిద్ధంగా ఉన్నామని ఇరాన్ పార్లమెంట్ స్పీకర్, చర్చల ప్రధాన ప్రతినిధి మహమ్మద్ బాగెర్ గాలిబాఫ్ స్పష్టం చేశారు. ముఖ్యంగా శుద్ధి చేసిన యురేనియంతో సంబంధం ఉన్న తమ అణు హక్కుల విషయంలో ఎలాంటి రాజీ ఉండదని, అది ఇరాన్ నిర్ణయించిన 'రెడ్ లైన్' అని ఆయన తేల్చిచెప్పారు.
వివరాలు
లెబనాన్ సార్వభౌమత్వానికి ఇరాన్ డిమాండ్
అమెరికా-ఇరాన్ మధ్య కుదిరిన అవగాహన ఒప్పందంలోని కీలక నిబంధనలు పూర్తిగా అమలయ్యే వరకు తదుపరి దశ చర్చలకు వెళ్లే ఉద్దేశం తమకు లేదని ఇరాన్ వెల్లడించింది. ముఖ్యంగా లెబనాన్లో కొనసాగుతున్న యుద్ధానికి ముగింపు పలకడం,ఆ దేశ సార్వభౌమాధికారాన్ని కాపాడడం,ఇరాన్ చమురు ఎగుమతులకు ఎలాంటి ఆటంకాలు లేకుండా చూడడం,అలాగే వ్యూహాత్మక ప్రాధాన్యం ఉన్న హర్మూజ్ జలసంధి గుండా నౌకల రాకపోకలకు భద్రత కల్పించడం వంటి అంశాలపై తమ వైఖరి స్పష్టంగా ఉందని తెలిపింది. ఈ సందర్భంగా 2015లో కుదిరిన అణు ఒప్పందాన్ని అమెరికా అమలు చేయకుండా హామీలను ఉల్లంఘించిన విషయాన్ని గాలిబాఫ్ ప్రస్తావించారు.
వివరాలు
చర్చల మధ్య పెరిగిన చమురు ఎగుమతులు
అలాగే లెబనాన్-ఇజ్రాయెల్ సంబంధాలను సాధారణ స్థితికి తీసుకురావడానికి అమెరికా విదేశాంగ మంత్రి మార్కో రూబియో చేస్తున్న ప్రయత్నాలు ప్రస్తుత అవగాహన ఒప్పందానికి విరుద్ధంగా ఉన్నాయని ఆరోపించారు. అమెరికా విధించిన ఆంక్షలు సడలిన తర్వాత ఇరాన్ చమురు ఎగుమతులు గణనీయంగా పెరిగాయని గాలిబాఫ్ వెల్లడించారు. ప్రస్తుతం రోజుకు 40మిలియన్ బారెళ్లకు పైగా చమురును ఎగుమతి చేస్తున్నట్లు తెలిపారు. ఖతార్ విదేశాంగ మంత్రి ఆధ్వర్యంలో జరుగుతున్న ఈ మధ్యవర్తిత్వ చర్చల్లో అమెరికా ప్రతినిధులు స్టీవ్ విట్కాఫ్, జారెడ్ కుష్నర్ కూడా పాల్గొంటున్నారు. అవగాహన ఒప్పందాన్ని ముందుకు తీసుకెళ్లే లక్ష్యంతో దోహా చర్చలు కొనసాగుతున్నప్పటికీ, ఒకవైపు చర్చలకు హాజరవుతూనే మరోవైపు అవసరమైతే సైనిక చర్యలకు కూడా సిద్ధంగా ఉన్నామని ఇరాన్ ప్రకటించడం అంతర్జాతీయంగా ఉత్కంఠను మరింత పెంచుతోంది.