Tata Nexon EV BaaS: టాటా ఎలక్ట్రిక్ కార్లకు గుడ్‌న్యూస్‌.. ఈ 4 మోడళ్లకు BaaS సదుపాయం!

వ్రాసిన వారు Jayachandra Akuri

Sep 29, 2026

12:42 pm

ఈ వార్తాకథనం ఏంటి

టాటా మోటార్స్ తన ఎలక్ట్రిక్ కార్లకు సంబంధించిన బ్యాటరీ-యాజ్-ఎ-సర్వీస్ (BaaS) పథకాన్ని మరిన్ని మోడళ్లకు విస్తరించింది. ఇప్పటివరకు టియాగో EV, పంచ్ EVలకు మాత్రమే అందుబాటులో ఉన్న ఈ పథకాన్ని తాజాగా నెక్సాన్ EV, కర్వ్ EV, సియెరా EV, హ్యారియర్ EVలకు కూడా అందుబాటులోకి తీసుకొచ్చింది. దీంతో టాటా మోటార్స్ పూర్తి ఎలక్ట్రిక్ కార్ల శ్రేణి BaaS పథకం పరిధిలోకి వచ్చింది. BaaS పథకంలో భాగంగా టియాగో EVలో 19kWh బ్యాటరీ ఉంటుంది. బ్యాటరీతో కలిపి సాధారణంగా కొనుగోలు చేస్తే దీని ధర రూ.6.99 లక్షలుగా ఉండగా, BaaSతో రూ.4.69 లక్షల ప్రారంభ ధరకు లభిస్తుంది. బ్యాటరీ వినియోగ ఛార్జీ కిలోమీటరుకు రూ.2.6గా ఉంటుంది.

వివరాలు

నెక్సాన్ EVలో 45kWh బ్యాటరీ

పంచ్ EVలో 30kWh బ్యాటరీ ఉంటుంది. దీని సాధారణ ధర రూ.9.79 లక్షలు కాగా, BaaSతో రూ.6.59 లక్షలకు అందుబాటులో ఉంటుంది.

వినియోగ ఛార్జీ కిలోమీటరుకు రూ.2.6గా ఉంటుంది. నెక్సాన్ EVలో 45kWh బ్యాటరీ ఉంటుంది.

బ్యాటరీతో కలిపి దీని ధర రూ.14.34 లక్షలు కాగా, BaaS పథకంలో రూ.8.99 లక్షల నుంచి లభిస్తుంది.

బ్యాటరీ వినియోగానికి కిలోమీటరుకు రూ.4.4 చెల్లించాలి. కర్వ్ EVలో 55kWh బ్యాటరీ ఉంటుంది.

సాధారణంగా దీని ధర రూ.17.19 లక్షలు కాగా, BaaSతో రూ.10.99 లక్షలకు అందుబాటులోకి వస్తుంది. వినియోగ ఛార్జీ కిలోమీటరుకు రూ.5గా ఉంటుంది.

వివరాలు

సాధారణ ధర రూ.18.79 లక్షలు

సియెరా EVలో 63kWh బ్యాటరీ ఉంటుంది. సాధారణ ధర రూ.18.79 లక్షలు కాగా, BaaS పథకంలో రూ.11.99 లక్షల ప్రారంభ ధరకు లభిస్తుంది.

బ్యాటరీ వినియోగానికి కిలోమీటరుకు రూ.5.5 చెల్లించాల్సి ఉంటుంది. హ్యారియర్ EVలో 65kWh బ్యాటరీ ఉంటుంది.

సాధారణంగా దీని ధర రూ.21.79 లక్షలు కాగా, BaaSతో రూ.14.49 లక్షలకు లభిస్తుంది. ఈ మోడల్‌కు బ్యాటరీ వినియోగ ఛార్జీ కిలోమీటరుకు రూ.5.9గా ఉంటుంది.

వివరాలు

BaaSతో ప్రారంభ ధర తగ్గింపు

BaaS పథకంలో బ్యాటరీ ఖర్చును వాహనం ధర నుంచి వేరు చేసి ఫైనాన్స్ చేస్తారు. దీంతో కారు కొనుగోలు సమయంలో చెల్లించాల్సిన ప్రారంభ మొత్తం తగ్గుతుంది.

మోడల్, బ్యాటరీ సామర్థ్యాన్ని బట్టి ఈ తగ్గింపు ఉంటుంది. టియాగో EVలో ప్రారంభ ధర రూ.2.30 లక్షలు తగ్గుతుంది. పంచ్ EVలో రూ.3.20 లక్షలు తగ్గుతుంది.

నెక్సాన్ EVలో రూ.5.35 లక్షలు, కర్వ్ EVలో రూ.6.20 లక్షలు, సియెరా EVలో రూ.6.80 లక్షలు తగ్గుతాయి. హ్యారియర్ EVలో అత్యధికంగా రూ.7.30లక్షల మేరకు ప్రారంభ ధర తగ్గుతుంది.

ఈ విధానంలో కస్టమర్లు వాహనం కోసం తక్కువ మొత్తాన్ని ముందుగా చెల్లించి, బ్యాటరీ ఖర్చును వినియోగ ఆధారిత రుసుము లేదా ప్రత్యేక బ్యాటరీ EMI రూపంలో క్రమంగా చెల్లించవచ్చు.

వివరాలు

టాటా BaaS ఎలా పనిచేస్తుంది?

ఎంచుకున్న ప్లాన్‌ను బట్టి చెల్లింపు విధానం మారుతుంది. టాటా మోటార్స్ BaaS పథకాన్ని డ్యూయల్-లోన్ విధానంలో అందిస్తోంది. ఇందులో వాహనానికి ఒక రుణం, బ్యాటరీకి మరో రుణం ఉంటుంది.

బ్యాటరీ EMI లేదా వినియోగ రుసుము బ్యాటరీ సామర్థ్యం, డౌన్ పేమెంట్, రుణ కాలవ్యవధి వంటి అంశాలపై ఆధారపడి ఉంటుంది.

అయితే బ్యాటరీకి సంబంధించిన ఈ చార్జీల్లో విద్యుత్ ఛార్జింగ్ ఖర్చు, మెయింటెనెన్స్, రిపేర్లు లేదా ఇతర వాహన నిర్వహణ ఖర్చులు ఉండవు.

అవన్నీ కస్టమర్లు విడిగా భరించాల్సి ఉంటుంది. టాటా ప్రకటించిన BaaS ధరలు వ్యక్తిగత వినియోగదారుల కోసం ఎంట్రీ-లెవల్ వేరియంట్లకు వర్తిస్తాయి.

చాలా మోడళ్ల విషయంలో రోజుకు 60 కిలోమీటర్ల ప్రయాణాన్ని ఆధారంగా తీసుకుని ఈ లెక్కలు రూపొందించారు.

వివరాలు

బ్యాటరీతో సహా కొనుగోలు చేసే అవకాశం కూడా ఉంది

టియాగో EV విషయంలో మాత్రం రోజుకు 44 కిలోమీటర్ల ప్రయాణాన్ని ప్రాతిపదికగా తీసుకున్నారు. ప్రభుత్వ పన్నులు, రోడ్ ట్యాక్స్, ఇన్సూరెన్స్, TCS వంటి ఖర్చులు ప్రకటించిన BaaS ధరల్లో ఉండవు.

కస్టమర్లకు BaaS మాత్రమే ఏకైక ఎంపిక కాదు. గతంలో మాదిరిగానే బ్యాటరీతో కలిపి టాటా EVని పూర్తిగా కొనుగోలు చేసే అవకాశం కూడా కొనసాగుతుంది.

ప్రారంభంలో తక్కువ మొత్తాన్ని చెల్లించాలని కోరుకునే, బ్యాటరీ కోసం విడిగా చెల్లించేందుకు సిద్ధంగా ఉన్న కస్టమర్లకు BaaS ప్రత్యామ్నాయ ఫైనాన్సింగ్ విధానంగా అందుబాటులో ఉంటుంది.

వివరాలు

ఆరు ఎలక్ట్రిక్ కార్లు

ప్రస్తుతం టియాగో EV, పంచ్ EV, నెక్సాన్ EV, కర్వ్ EV, సియెరా EV, హ్యారియర్ EV.. టాటా మోటార్స్‌కు చెందిన మొత్తం ఆరు ఎలక్ట్రిక్ కార్లు BaaS పథకం పరిధిలోకి వచ్చాయి.

ప్రారంభ కొనుగోలు వ్యయాన్ని తగ్గించడం ద్వారా ఎలక్ట్రిక్ కార్లను కొనుగోలు చేయాలనుకునే వారికి మరింత సౌకర్యవంతమైన చెల్లింపు విధానాన్ని అందించడమే ఈ పథకం ఉద్దేశం.