Mahindra XUV 3XO CNG: మహీంద్రా XUV 3XO CNG వచ్చేస్తోంది.. పనోరమిక్‌ సన్‌రూఫ్‌, టర్బో ఇంజిన్‌తో అదిరిపోయే SUV!
ఈ వార్తాకథనం ఏంటి
ప్రముఖ ఆటో మొబైల్‌ సంస్థ మహీంద్రా తన CNG కార్ల విభాగాన్ని మరింత విస్తరించేందుకు సిద్ధమైంది. ఇందులో భాగంగా మహీంద్రా XUV 3XO CNG మోడల్‌ను మార్కెట్లోకి తీసుకొచ్చేందుకు సన్నాహాలు చేస్తోంది. ఈ కొత్త SUVకి సంబంధించిన టీజర్‌ను కంపెనీ సోషల్‌ మీడియా వేదికలపై విడుదల చేసింది. అక్టోబర్‌ 15న ఈ కారును ఆవిష్కరించనున్నట్లు టీజర్‌ ద్వారా వెల్లడించింది. ఈ టీజర్‌లో REVX వేరియంట్లను పోలిన డిజైన్ అంశాలు కనిపిస్తున్నాయి. అంతేకాకుండా, ఈ కారులో పనోరమిక్‌ సన్‌రూఫ్‌ను అందించనున్నట్లు కూడా స్పష్టమైంది. ఈ విభాగంలో CNG కార్లలో పనోరమిక్‌ సన్‌రూఫ్‌ వంటి ప్రీమియం ఫీచర్‌ చాలా అరుదుగా కనిపిస్తుంది.
వివరాలు
పూర్తి వివరాలను వెల్లడించని కంపెనీ
దీంతో XUV 3XO CNGపై ఆటోమొబైల్‌ రంగంలో ఆసక్తి పెరిగింది. ఈ SUVలో మహీంద్రా అందిస్తున్న 1.2 లీటర్‌ టర్బో పెట్రోల్‌ ఇంజిన్‌ను CNGకి అనుగుణంగా మార్పులు చేసి ఉపయోగించే అవకాశం ఉంది.
REVX M, AX5 వేరియంట్లలో ఈ మోడల్‌ను అందించవచ్చని అంచనా. అయితే, వేరియంట్లు, ధరలు, ఇంజిన్‌ సామర్థ్యానికి సంబంధించిన పూర్తి వివరాలను కంపెనీ ఇంకా వెల్లడించలేదు.
SUV లుక్‌, రోజువారీ వినియోగానికి అనువైన సౌకర్యాలు, తక్కువ ఇంధన ఖర్చులను కోరుకునే వినియోగదారులను లక్ష్యంగా చేసుకుని ఈ మోడల్‌ను తీసుకొచ్చే అవకాశం ఉంది.
వివరాలు
మహీంద్రా XUV 3XO CNG Vs ప్రత్యర్థి కార్లు
భారతదేశంలో నాలుగు మీటర్లలోపు SUVల విభాగంలో ఫ్యాక్టరీ నుంచే CNG సదుపాయంతో లభించే మోడళ్లు చాలా తక్కువగా ఉన్నాయి.
ఈ విభాగంలో టాటా నెక్సాన్‌ i-CNG, మారుతి సుజుకి బ్రెజ్జా S-CNG ప్రముఖ ప్రత్యర్థులుగా ఉన్నాయి. ఇప్పుడు XUV 3XO CNG కూడా ఈ విభాగంలోకి ప్రవేశిస్తే పోటీ మరింత పెరిగే అవకాశం ఉంది.
టర్బోచార్జ్డ్‌ ఇంజిన్‌, ప్రీమియం ఫీచర్లు, మెరుగైన ఇంధన సామర్థ్యాన్ని ఒకే కారులో అందించడం ద్వారా కొనుగోలుదారులను ఆకర్షించాలని మహీంద్రా భావిస్తున్నట్లు తెలుస్తోంది.
వివరాలు
మహీంద్రా XUV 3XO CNG డిజైన్ ప్రత్యేకతలు
కంపెనీ విడుదల చేసిన టీజర్‌లో XUV 3XO CNGని ఆకర్షణీయమైన ఎరుపు రంగులో చూపించారు. ముందు భాగంలో హెడ్‌ల్యాంప్‌ల మధ్య బాడీ రంగులో ఉండే ప్యానెల్‌ ప్రత్యేకంగా కనిపిస్తోంది.
మహీంద్రా ట్విన్‌ పీక్స్‌ లోగో చుట్టూ మెటాలిక్‌ యాక్సెంట్స్‌ను అందించారు.
ఇవి కారు ముందు భాగానికి భిన్నమైన రూపాన్ని ఇస్తున్నాయి. ప్రస్తుత XUV 3XOలో కనిపించే స్ప్లిట్‌ హెడ్‌ల్యాంప్‌ సెటప్‌, LED డేటైమ్‌ రన్నింగ్‌ లైట్లు కొత్త మోడల్‌లోనూ కొనసాగనున్నాయి.
నలుపు రంగులో ఉండే ఎక్స్‌టీరియర్‌ రియర్‌ వ్యూ మిర్రర్లు SUVకి స్పోర్టీ లుక్‌ను అందిస్తున్నాయి.
మొత్తంగా ప్రస్తుత XUV 3XO డిజైన్‌ను కొనసాగిస్తూనే కొన్ని ప్రత్యేకమైన స్టైలింగ్‌ అంశాలతో కొత్త CNG వెర్షన్‌ను తీసుకొచ్చే అవకాశం ఉంది.
వివరాలు
రోడ్లపై పరీక్షలు.. దాదాపు ఎలాంటి కవరింగ్‌ లేకుండానే దర్శనం
అధికారిక ఆవిష్కరణకు ముందే మహీంద్రా XUV 3XO CNG పబ్లిక్‌ రోడ్లపై పరీక్షలు నిర్వహిస్తున్న సమయంలో కనిపించింది.
పరీక్షల కోసం ఉపయోగించిన కారుపై దాదాపుగా ఎలాంటి కవరింగ్‌ లేకపోవడంతో దాని డిజైన్‌ను స్పష్టంగా గమనించవచ్చు.
వెనుక భాగంలో ప్రస్తుత XUV 3XOలో ఉన్న అనేక డిజైన్ అంశాలను కొనసాగించారు. ఇందులో ప్రముఖంగా కనిపించే XUV 3XO బ్యాడ్జింగ్‌, రూఫ్‌ రైల్స్‌, వెనుక స్పాయిలర్‌, కనెక్టెడ్‌ LED టెయిల్‌ ల్యాంప్స్‌ ఉన్నాయి.
అలాగే, సిల్వర్‌ స్కిడ్‌ ప్లేట్‌, స్టాటిక్‌ రిఫ్లెక్టర్లతో కూడిన మందపాటి నల్లటి బంపర్‌ను కూడా అందించారు.
వివరాలు
డిజైన్ లో పెద్దగా మార్పుల్లేవు
ప్రస్తుతం బయటకు కనిపిస్తున్న ప్రధానమైన తేడా వెనుక విండ్‌షీల్డ్‌పై ఉన్న చిన్న 'CNG' స్టిక్కర్‌. ఇది ఈ SUVలో CNG పవర్‌ట్రెయిన్‌ ఉండనున్నట్లు సూచిస్తోంది.
బయటి డిజైన్‌లో పెద్దగా మార్పులు కనిపించకపోయినా, ఫ్యాక్టరీ నుంచే అమర్చిన CNG వ్యవస్థ అందుబాటులోకి రావడం ద్వారా ఈ SUV మరింత మంది కొనుగోలుదారులకు చేరువయ్యే అవకాశం ఉంది.
ముఖ్యంగా SUV తరహా డిజైన్, వినియోగ సౌలభ్యం, తక్కువ నిర్వహణ ఖర్చులను కోరుకునేవారికి ఈ మోడల్‌ ఆకర్షణీయమైన ఎంపికగా మారవచ్చు.
వివరాలు
మహీంద్రా XUV 3XO CNG ఇంజిన్‌ వివరాలు
ఈ కొత్త SUVలో మహీంద్రాకు చెందిన 1.2 లీటర్‌ టర్బోచార్జ్డ్‌ MPFI పెట్రోల్‌ ఇంజిన్‌ను CNGకి అనుగుణంగా మార్పులు చేసి అందించవచ్చని అంచనా.
సాధారణ పెట్రోల్‌ వెర్షన్‌లో ఈ ఇంజిన్‌ సుమారు 110 బీహెచ్‌పీ శక్తిని, 200 ఎన్ఎం టార్క్‌ను ఉత్పత్తి చేస్తుంది. ఈ గణాంకాల ప్రకారం, ఇది తన విభాగంలో శక్తివంతమైన ఇంజిన్లలో ఒకటిగా నిలుస్తుంది.
అయితే CNG వెర్షన్‌లో ఇంజిన్‌ ఎంత పవర్‌, టార్క్‌ను ఉత్పత్తి చేస్తుందనే విషయాన్ని మహీంద్రా ఇంకా వెల్లడించలేదు.
CNG మోడ్‌లో పనితీరు, అందుబాటులో ఉండే గేర్‌బాక్స్‌ ఎంపికలు, అధికారికంగా ధ్రువీకరించిన మైలేజీ వివరాలు కూడా తెలియాల్సి ఉంది.