Amul: పండుగ వేళ అమూల్‌ షాక్‌.. నెయ్యి, వెన్న ధరల పెంపు
ఈ వార్తాకథనం ఏంటి
దీపావళి పండుగకు ముందు అమూల్‌ సంస్థ నెయ్యి, వెన్న ధరలను పెంచింది. కిలో నెయ్యి ప్యాక్‌పై రూ.50 పెంచడంతో కొత్త ధర రూ.680కు చేరింది. 500 గ్రాముల వెన్న ప్యాక్‌ ధర కూడా రూ.15 పెరిగింది. మార్కెట్లలో డిమాండ్ పెరగడం, సరఫరా తగ్గడంతో ఈ నిర్ణయం తీసుకున్నట్లు తెలుస్తోంది. 2025 సెప్టెంబరులో పాల ఉత్పత్తులపై జీఎస్టీని 12 శాతం నుంచి 5 శాతానికి తగ్గించడంతో వినియోగదారులకు కొంత ఊరట లభించింది. అయితే తాజా ధరల పెంపుతో ఆ ప్రయోజనం దాదాపుగా లేకుండా పోయింది.
వివరాలు
వెన్న ధరలు కూడా పెరిగాయి
అమూల్‌ వెన్న ధరలను కూడా రెండు ప్యాకెట్లకు పెంచింది. 100 గ్రాముల వెన్న ప్యాక్‌ ధర రూ.63 నుంచి రూ.66కు చేరింది.
500 గ్రాముల ప్యాక్‌ ధర రూ.310 నుంచి రూ.325కు పెరిగింది.
అమూల్‌ ఆన్‌లైన్‌ ప్లాట్‌ఫామ్‌లో ఆవు నెయ్యి లీటరు ధర రూ.740గా, సాగర్‌ నెయ్యి రూ.710గా, స్వచ్ఛమైన నెయ్యి రూ.700గా, గేదె నెయ్యి రూ.720గా ఉన్నాయి.
అయితే స్వచ్ఛమైన నెయ్యి, గేదె నెయ్యి సహా పలు రకాల ఉత్పత్తులు ఆన్‌లైన్‌లో అందుబాటులో లేవు.
వివరాలు
అమూల్‌ ఉత్పత్తుల కోసం వినియోగదారుల ఇబ్బందులు
ధరలు పెరగడంతో పాటు కొన్ని అమూల్‌ పాల ఉత్పత్తులు దొరకక వినియోగదారులు ఇబ్బందులు పడుతున్నారు.
గణేశ్‌ పండుగ నుంచి ఆవు నెయ్యికి డిమాండ్ పెరగడంతో వడోదర, అహ్మదాబాద్‌ నగరాల్లోని దుకాణాల్లో నిల్వలు తగ్గినట్లు వ్యాపారులు తెలిపారు.
అహ్మదాబాద్‌లోని శాటిలైట్‌ ప్రాంతంలో ఉన్న డీ-మార్ట్‌ దుకాణంలో మంగళవారం అమూల్‌ నెయ్యి, వెన్న నిల్వలు పూర్తిగా అయిపోయాయి.
వివరాలు
కల్తీ నెయ్యిపై చర్యలతో అమూల్‌కు పెరిగిన డిమాండ్
గుజరాత్‌, రాజస్థాన్‌ రాష్ట్రాల్లో కల్తీ నెయ్యి విక్రయాలపై అధికారులు చర్యలు తీసుకోవడంతో బ్రాండెడ్‌ నెయ్యికి డిమాండ్ పెరిగిందని అమూల్‌తో సంబంధం ఉన్న ఓ సహకార సంఘం నాయకుడు తెలిపారు.
గత ఆరు నెలల్లో రెండు రాష్ట్రాల్లో కలిపి సుమారు 2 లక్షల కిలోల నకిలీ నెయ్యిని అధికారులు స్వాధీనం చేసుకున్నట్లు ఆయన వెల్లడించారు.
ఈ చర్యలతో వినియోగదారులు అమూల్‌ వంటి పేరున్న బ్రాండ్ల వైపు మొగ్గు చూపుతున్నారని చెప్పారు.