Binance: బైనాన్స్‌కు భారీ షాక్.. రూ.35 వేల కోట్ల క్రిప్టో ఆస్తులు విత్‌డ్రా
ఈ వార్తాకథనం ఏంటి
ప్రపంచంలోనే అతిపెద్ద క్రిప్టో కరెన్సీ ఎక్స్ఛేంజ్ సంస్థ బైనాన్స్‌కు భారీ ఎదురుదెబ్బ తగిలింది. ఇటీవల జరిగిన సైబర్ దాడి నేపథ్యంలో కస్టమర్లు తమ క్రిప్టో ఆస్తులను పెద్ద ఎత్తున వెనక్కి తీసుకుంటున్నారు. దీంతో ఏకంగా 3.6బిలియన్ డాలర్ల విలువైన క్రిప్టో ఆస్తులు బైనాన్స్ నుంచి బయటకు వెళ్లాయి. భారత కరెన్సీలో ఈ మొత్తం రూ.35 వేల కోట్లకు పైమాటే. ఇటీవల బైనాన్స్‌పై జరిగిన సైబర్ దాడిలో సుమారు 6.3బిలియన్ డాలర్ల విలువైన క్రిప్టో ఆస్తులు చోరీకి గురయ్యాయి. ఈ దాడి వెనుక ఉత్తర కొరియాకు చెందిన హ్యాకర్లు ఉన్నట్లు అమెరికా దర్యాప్తు సంస్థలు,ముఖ్యంగా ఫెడరల్ బ్యూరో ఆఫ్ ఇన్వెస్టిగేషన్ (ఎఫ్‌బీఐ),బ్లాక్‌చెయిన్ నిపుణులు ఆరోపిస్తున్నారు. ఈ ఘటనతో క్రిప్టోకరెన్సీ మార్కెట్‌లో తీవ్ర కలకలం మొదలైంది.
వివరాలు
విత్‌డ్రాలను తాత్కాలికంగా నిలిపివేసిన బైనాన్స్
సైబర్ దాడి విషయం వెలుగులోకి వచ్చిన వెంటనే బైనాన్స్ అప్రమత్తమైంది.
పరిస్థితిని సమీక్షించేందుకు గురువారం కస్టమర్ల క్రిప్టో ఆస్తుల విత్‌డ్రాలను తాత్కాలికంగా నిలిపివేసింది.
హ్యాకింగ్ ఎలా జరిగింది? ఎంత మొత్తంలో నిధులు చోరీకి గురయ్యాయి? సంస్థ భద్రతా వ్యవస్థలో ఎక్కడ లోపం ఏర్పడింది? అనే అంశాలపై దర్యాప్తు ప్రారంభించింది.
ఆదివారం నుంచి విత్‌డ్రాలను దశలవారీగా పునరుద్ధరించింది. అయితే సేవలు అందుబాటులోకి వచ్చిన వెంటనే కస్టమర్లు తమ క్రిప్టో ఆస్తులను ఇతర వాలెట్లకు తరలించడం మొదలుపెట్టారు.
దీంతో ఒక్కరోజులోనే భారీ మొత్తంలో నిధులు సంస్థ నుంచి బయటకు వెళ్లాయి. ఈ విషయాన్ని బైనాన్స్ కూడా సోషల్ మీడియా ద్వారా వెల్లడించింది.
మొదట్లో విత్‌డ్రాలు గణనీయంగా పెరిగాయని, ఆ తర్వాత క్రమంగా తగ్గుముఖం పట్టాయని తెలిపింది.
వివరాలు
కస్టమర్లకు నష్టపరిహారం చెల్లింపు
సైబర్ దాడి కారణంగా కస్టమర్లు నష్టపోకుండా చూస్తామని బైనాన్స్ హామీ ఇచ్చింది. చోరీకి గురైన క్రిప్టో ఆస్తుల విలువను సంస్థ తన సొంత నిధులు, అత్యవసర నిధులు, బీమా నిధుల ద్వారా భర్తీ చేస్తోంది.
ఇప్పటికే దొంగిలించబడిన క్రిప్టో ఆస్తుల విలువలో దాదాపు 95 శాతం మొత్తాన్ని భర్తీ చేసినట్లు కంపెనీ వెల్లడించింది.
ఈ ఘటన వల్ల కలిగిన ఆర్థిక భారాన్ని తామే భరిస్తామని, కస్టమర్లపై ఎలాంటి భారం మోపబోమని బైనాన్స్ స్పష్టం చేసింది.