Budget 2025 : బడ్జెట్ 2025 మహిళా పన్ను చెల్లింపుదారులు ఏమి ఆశించవచ్చు
ఈ వార్తాకథనం ఏంటి
2025-26 బడ్జెట్ సమీపిస్తున్న వేళ, పరిశ్రమల ప్రముఖుల నుంచి సామాన్య ప్రజల వరకు ఎంతో ఆశలు నెలకొన్నాయి. కేంద్ర బడ్జెట్ ప్రతి ఆర్థిక సంవత్సరానికి ప్రభుత్వ ఆదాయం, వ్యయాలను వివరిస్తూ దేశ ఆర్థిక స్థితిని మెరుగుపరచడంలో కీలక పాత్ర పోషిస్తుంది. ఆర్థిక మంత్రి నిర్మలా సీతారామన్ ఫిబ్రవరి 1న 2025-26 కేంద్ర బడ్జెట్‌ను ప్రవేశపెట్టనున్నారు. పన్ను చెల్లించే మహిళలు ఈసారి కూడా తమ కోసం ప్రత్యేక ప్రయోజనాలు ఆశిస్తున్నారు. ఇటీవల మహిళా పన్ను చెల్లింపుదారుల సంఖ్య పెరుగుతోంది. వారు ఆర్థిక వృద్ధిలో ముఖ్యమైన పాత్ర పోషిస్తున్నారు. మహిళా సాధికారత కోసం ప్రభుత్వం ఇప్పటికే పలు కార్యక్రమాలను ప్రవేశపెట్టింది, వీటిలో పన్ను భారాన్ని తగ్గించడం, మహిళలకు మరిన్ని ఆర్థిక అవకాశాలను కల్పించడం కీలకం.
వివరాలు
స్వంత వ్యాపారాల విస్తరణకు సానుకూల వాతావరణం
మహిళా పారిశ్రామికవేత్తల ప్రోత్సాహానికి పెట్టుబడులకు పన్ను రాయితీలను బడ్జెట్‌లో తీసుకురావచ్చనే అంచనాలు ఉన్నాయి. మహిళలు తమ వ్యాపారాలలో పెట్టుబడి పెడితే పన్ను తగ్గింపు వంటి ప్రత్యేక ప్రోత్సాహాలు అందుబాటులోకి రావచ్చు. అలాగే, మహిళల ఆధ్వర్యంలో చిన్న, మధ్య తరహా వ్యాపారాలకు తక్కువ పన్నులు, సులభమైన రుణాలు వంటి సదుపాయాలు ఉంటే వారి అభివృద్ధికి మరింత దోహదం అవుతుంది. రుణ ప్రక్రియలను సులభతరం చేయడం,తక్కువ వడ్డీ రేట్లను అందించడం ద్వారా మహిళలకు ఆర్థిక అవసరాలు తీర్చుకోవడం సులభమవుతుంది. వారి స్వంత వ్యాపారాల విస్తరణకు సానుకూల వాతావరణం ఏర్పడుతుంది.
వివరాలు
వ్యక్తిగత, ఆర్థిక, వ్యాపార వృద్ధికి మరిన్ని అవకాశాలు
గృహ రుణాలపై మెరుగైన పన్ను మినహాయింపులు మహిళలను దీర్ఘకాలిక ఆస్తుల్లో పెట్టుబడి పెట్టడానికి ప్రోత్సహించగలవు. అలాగే, విద్యారంగానికి సంబంధించిన రుణాలపై పన్ను రాయితీలు మహిళలకు ఉన్నత విద్య సాధించడంలో, మెరుగైన ఉద్యోగ అవకాశాలను పొందడంలో మద్దతునిస్తాయి. ఈ బడ్జెట్‌లో మహిళా పన్ను చెల్లింపుదారులు తమ వ్యక్తిగత, ఆర్థిక, వ్యాపార వృద్ధికి మరిన్ని అవకాశాలను ఆశించవచ్చు. ప్రభుత్వ పథకాలు, ప్రోత్సాహాలు వారి సాధికారతను పెంపొందించడంలో కీలక పాత్ర పోషించగలవు.