Diwali: దీపావళి పండుగ వేళ ధరల బాదుడు...కొనాలంటే జేబుకు చిల్లు
ఈ వార్తాకథనం ఏంటి
దీపావళి వచ్చిందంటే కొత్త టీవీ, ఫ్రిజ్‌, ఏసీ కొనాలని కొందరు, ఇంటికి స్వీట్లు, డ్రై ఫ్రూట్స్‌ తీసుకెళ్లాలని మరికొందరు ప్లాన్‌ చేస్తుంటారు. కానీ ఈసారి పండుగ షాపింగ్‌ బడ్జెట్‌ మాత్రం తలకిందులయ్యేలా కనిపిస్తోంది. ఎలక్ట్రానిక్‌ వస్తువుల నుంచి సంప్రదాయ మిఠాయిల వరకు ధరలు పెరిగాయి. గృహోపకరణాల రేట్లు 3-7 శాతం అధికమయ్యాయి. స్వీట్ల ధరలు 15 శాతం పెరగ్గా, పిస్తా ధరలు గత ఏడాదితో పోలిస్తే దాదాపు రెండింతలయ్యాయి. ముడిసరుకుల ధరలు, రవాణా ఖర్చులు, పంట దిగుబడుల తగ్గుదల ఈ భారానికి కారణమవుతున్నాయి.
Details
పెరిగిన ధరలతోనూ అమ్మకాల్లో 20 శాతం వృద్ధి అంచనా
ఎలక్ట్రానిక్స్‌ రిటైలర్‌ విజయ్‌ సేల్స్‌ ఈ పండుగ సీజన్‌లో విలువ పరంగా దాదాపు 20 శాతం అమ్మకాల వృద్ధిని ఆశిస్తోంది.
అయితే విక్రయించే వస్తువుల సంఖ్యలో వృద్ధి మాత్రం సింగిల్‌ డిజిట్‌కే పరిమితం కావచ్చని అంచనా వేస్తోంది.
కంపెనీ మేనేజింగ్‌ డైరెక్టర్‌ నీలేశ్‌ గుప్తా తెలిపిన వివరాల ప్రకారం, కొనుగోళ్ల కోసం వినియోగదారులు ఈఎంఐలను ఎక్కువగా ఎంచుకుంటున్నారు.
ఒకేసారి పెద్ద మొత్తం చెల్లించకుండా నెలవారీ వాయిదాల్లో చెల్లించే పద్ధతికి ప్రాధాన్యం పెరుగుతోంది.
Details
ఏసీలు, టీవీల ధరలు 7 శాతం వరకు పెంపు
హయ్యర్‌, ఎల్‌జీ, బ్లూ స్టార్‌ వంటి కంపెనీలు ఏసీలు, టీవీలు సహా పలు గృహోపకరణాల ధరలను 3-7 శాతం వరకు పెంచాయి.
తయారీలో ఉపయోగించే విడిభాగాలు, ముడిసరుకుల ఖర్చులు అధికం కావడమే ఇందుకు కారణం.
హావెల్స్‌ ఇండియా కూడా డిసెంబర్‌ త్రైమాసికంలో ధరలను మరో 5-7 శాతం పెంచాలని భావిస్తోంది.
దీంతో పండుగ సందర్భంగా కొత్త ఎలక్ట్రానిక్‌ వస్తువులు కొనాలనుకునేవారు గత ఏడాదితో పోలిస్తే ఎక్కువ మొత్తం ఖర్చు చేయాల్సి వస్తోంది.
Details
స్వీట్లు, డ్రై ఫ్రూట్స్‌ ధరలూ పైపైకి
దీపావళి కానుకల్లో ప్రధానంగా ఉండే స్వీట్లు, డ్రై ఫ్రూట్స్‌ కూడా ఈసారి ఖరీదయ్యాయి. పాలు, ఖోయా, చక్కెర, నట్స్‌, ప్యాకేజింగ్‌ ఖర్చులు పెరగడంతో ఢిల్లీలోని ఓ స్వీట్‌ షాప్‌ ధరలను 15 శాతం పెంచింది.
జైపూర్‌లోని త్యోహార్‌ స్వీట్స్‌ 10-12 శాతం పెంపు చేపట్టింది. నాణ్యమైన డ్రై ఫ్రూట్స్‌ కొనాలంటే మరింత ఖర్చు తప్పడం లేదు. గత దీపావళి నుంచి బాదం ధరలు 35 శాతం పెరిగాయి.
కిలో బాదం రూ.1,000-1,200కు చేరగా, పిస్తా ధర రూ.1,500-2,100 మధ్య ఉంది. గత ఏడాది కిలో పిస్తా సుమారు రూ.900గా ఉండేది.
Details
కొనుగోలుకు ముందు ఆలోచిస్తున్న వినియోగదారులు
ధరలు పెరగడంతో వినియోగదారుల కొనుగోలు విధానంలోనూ మార్పు కనిపిస్తోంది. ఏ వస్తువు కొనాలన్నా దాని ఫీచర్లు, ధర, నాణ్యతను పోల్చి చూసిన తర్వాతే నిర్ణయం తీసుకుంటున్నారు.
చిన్న, పెద్ద గృహోపకరణాల విషయంలోనూ ఇదే ధోరణి ఉందని సెల్లెకార్‌ గాడ్జెట్స్‌ వ్యవస్థాపకుడు రవి అగర్వాల్‌ పేర్కొన్నారు.
వ్యాపారులు మాత్రం మొత్తం అమ్మకాల విలువ పెరుగుతుందని ఆశిస్తున్నా, వస్తువుల సంఖ్య పరంగా అదే స్థాయి వృద్ధి ఉంటుందా అనే సందేహం వ్యక్తం చేస్తున్నారు.
మొత్తంగా ఈ దీపావళికి కొనుగోళ్లు తగ్గకపోయినా, ఖర్చుల విషయంలో మాత్రం వినియోగదారులు ఆచితూచి అడుగులు వేస్తున్నారు.