Parents Property: తల్లిదండ్రుల ఆస్తిపై పిల్లలకు హక్కులుంటాయా ..? చట్టాలు ఏం చెబుతున్నాయి..?
ఈ వార్తాకథనం ఏంటి
తల్లిదండ్రుల ఆస్తి విషయానికి వస్తే పిల్లలకు హక్కులుంటాయా అనే సందేహం చాలామందిలో ఉంటుంది. చాలా మంది తమకు తల్లిదండ్రుల ఆస్తిపై స్వతహాగా హక్కు ఉంటుందని అనుకుంటారు. కానీ ఇది పూర్తిగా సరైన భావన కాదు. భారత చట్టాల ప్రకారం ఈ విషయం ఆస్తి స్వభావంపై ఆధారపడి ఉంటుంది. పిల్లలు తల్లిదండ్రుల ఆస్తిని క్లెయిమ్ చేసుకోవాలంటే అది వంశపారంపర్యంగా వచ్చిందా, లేక తల్లిదండ్రులు తమ సొంత సంపాదనతో కొనుగోలు చేసిందా అన్నది ముఖ్యమైన అంశం. ఈ ఆధారంపైనే పిల్లలకు హక్కులు ఉన్నాయా లేదా అన్నది నిర్ణయించబడుతుంది. చట్టపరంగా ఆస్తిని రెండు రకాలుగా విభజించారు. ఒకటి స్వంతంగా సంపాదించిన ఆస్తి, మరొకటి వంశపారంపర్యంగా వచ్చిన ఆస్తి.
వివరాలు
స్వంత ఆస్తి - వంశపారంపర్య ఆస్తి
తల్లిదండ్రులు తమ సొంతంగా సంపాదించి కొనుగోలు చేసిన ఆస్తిపై వారికి పూర్తిస్థాయి హక్కు ఉంటుంది. ఆ ఆస్తిని తమకు నచ్చిన వ్యక్తికి ఇవ్వొచ్చు, అమ్ముకోవచ్చు, బహుమతిగా అందించొచ్చు లేదా వీలునామా ద్వారా ఎవరికి కావాలంటే వారికి కట్టబెట్టొచ్చు. ఈ సందర్భంలో పిల్లలకు ఆ ఆస్తిపై చట్టబద్ధమైన హక్కులు ఉండవు. అదే ఒక కుటుంబంలో వరుసగా నాలుగు తరాల పాటు ఎలాంటి విభజన లేకుండా వచ్చిన ఆస్తిని వంశపారంపర్య ఆస్తిగా పరిగణిస్తారు. ఈ ఆస్తిపై పిల్లలకు పూర్తి హక్కులు ఉంటాయి.
వివరాలు
తల్లిదండ్రుల ఆస్తి పిల్లలకు స్వయంగా దక్కదు
తండ్రి ఒక్కడే ఈ ఆస్తిపై నిర్ణయాలు తీసుకోలేడు. అమ్మకం లేదా బదిలీ చేయాలంటే కుటుంబ సభ్యుల అనుమతి అవసరం. పిల్లలు మైనర్లైనా వారి హక్కులు చట్టం కాపాడుతుంది. అయితే బహుమతిగా వచ్చిన ఆస్తి, వీలునామా ద్వారా వచ్చిన ఆస్తి లేదా స్వంతంగా కొనుగోలు చేసిన ఆస్తిని వంశపారంపర్య ఆస్తిగా పరిగణించరు. అటువంటి సందర్భాల్లో పిల్లలకు ఎలాంటి హక్కులు ఉండవని చట్టం స్పష్టం చేస్తుంది. అందువల్ల తల్లిదండ్రుల ఆస్తి స్వయంగా తమకే వస్తుందని అనుకోవడం ఒక అపోహ మాత్రమే.