Domestic air traffic: 2024లో 16.13 కోట్లకు పెరిగిన భారత దేశీయ విమాన ట్రాఫిక్
ఈ వార్తాకథనం ఏంటి
భారతదేశంలో 2024లో దేశీయ విమాన ట్రాఫిక్ (Domestic Air Traffic) గణనీయంగా పెరిగింది.
మొత్తం 16.13 కోట్ల మంది ప్రయాణీకులు ఏటా విమానాల్లో ప్రయాణించి, రికార్డు నెలకొల్పారు.
ఇది ఏడాది ప్రాతిపదికన 6 శాతం పెరుగుదలను సూచిస్తుంది.
ఈ పెరుగుదల, వేగంగా విస్తరిస్తున్న ఏవియేషన్ మార్కెట్‌ను ప్రతిబింబిస్తుంది.
డైరెక్టరేట్ జనరల్ ఆఫ్ సివిల్ ఏవియేషన్ (DGCA) ద్వారా వెల్లడించబడిన వివరాలు కింది విధంగా ఉన్నాయి.
వివరాలు
అగ్రస్థానంలో ఆన్ టైమ్ పర్ఫార్మెన్స్ (OTP)తో ఇండిగో
2024 డిసెంబర్‌లో దేశీయ విమాన ప్రయాణికుల సంఖ్య 1.49 కోట్లకు చేరుకుంది, ఇది 2023 డిసెంబర్‌తో పోలిస్తే 8.19% పెరుగుదల.
ఇండిగో 64.4% మార్కెట్ వాటాతో ఆధిపత్యం కొనసాగిస్తుండగా, ఎయిర్ ఇండియా 26.4% వాటాతో రెండో స్థానంలో ఉంది.
అకాసా ఎయిర్, స్పైస్ జెట్ 4.6% మరియు 3.3% వాటాతో వరుసగా ఉన్నాయ్.
ఇండిగో 73.4% ఆన్ టైమ్ పర్ఫార్మెన్స్ (OTP)తో అగ్రస్థానంలో నిలిచి, ఎయిరిండియా 67.6% OTPతో రెండో స్థానంలో నిలిచింది.
అయితే, విమానాల రద్దు, ఆలస్యం కారణంగా డిసెంబరులో మొత్తం OTP ప్రభావితం అయింది.
మొత్తం విమానాల రద్దు రేటు 1.07%గా ఉంది, ఇది 67,622 మంది ప్రయాణీకులపై ప్రభావం చూపింది.
వివరాలు
విమానాల ఆలస్యం 2,79,985 మంది ప్రయాణీకులపై ప్రభావం
ఈ రద్దులకు పరిహారం,సౌకర్యాల కోసం విమానయాన సంస్థలు రూ.1.26కోట్లు ఖర్చు చేశాయి.
విమానాల ఆలస్యం 2,79,985 మంది ప్రయాణీకులను ప్రభావితం చేసింది,వీరిపై సౌకర్యాల కోసం సంస్థలు రూ.3.78 కోట్లు ఖర్చు చేశాయి.
2,147 మంది ప్రయాణీకులకు బోర్డింగ్ నిరాకరించబడింది,వీరికి పరిహారం కోసం రూ.1.76 కోట్లు చెల్లించబడింది.
కొవిడ్-19 మహమ్మారి ప్రభావం నుంచి విమానయాన రంగం క్రమంగా కోలుకుంది. పెరుగుతున్న డిమాండ్‌ను తీర్చేందుకు విమానయాన సంస్థలు తమ విమానాల సంఖ్య, నెట్‌వర్క్‌లను విస్తరిస్తున్నాయి.
భారత ఆర్థిక వృద్ధి కూడా విమాన ప్రయాణ డిమాండ్‌ను పెంచడంలో కీలక పాత్ర పోషిస్తున్నట్లు నిపుణులు అంచనా వేస్తున్నారు.
తద్వారా,భారత విమానయాన రంగం మరింత వృద్ధి చెందుతుందని భావిస్తున్నారు.ప్రపంచంలో వేగంగా అభివృద్ధి చెందుతున్న విభాగాల్లో ఈ రంగం ఒకటిగా మారింది.