AMFI Data: ఈక్విటీ మ్యూచువల్ ఫండ్స్‌లోకి కొనసాగిన పెట్టుబడులు.. స్మాల్‌క్యాప్స్‌కే అధిక ఆదరణ
ఈ వార్తాకథనం ఏంటి
ఈక్విటీ మ్యూచువల్ ఫండ్స్‌లోకి సెప్టెంబర్ నెలలోనూ పెట్టుబడులు కొనసాగాయి. ముఖ్యంగా స్మాల్‌క్యాప్ ఫండ్స్ మదుపర్ల నుంచి అధిక నిధులను ఆకర్షించాయి. మరోవైపు డెట్ మ్యూచువల్ ఫండ్స్ నుంచి భారీ స్థాయిలో పెట్టుబడులు వెనక్కి వెళ్లాయి. సెప్టెంబర్ నెలకు సంబంధించిన మ్యూచువల్ ఫండ్స్ పెట్టుబడుల గణాంకాలను మ్యూచువల్ ఫండ్స్ అసోసియేషన్ ఆఫ్ ఇండియా (యాంఫీ) సోమవారం వెల్లడించింది. యాంఫీ వివరాల ప్రకారం.. సెప్టెంబర్‌లో ఈక్విటీ ఆధారిత మ్యూచువల్ ఫండ్ పథకాల్లోకి రూ.38,306.55 కోట్ల పెట్టుబడులు వచ్చాయి. ఆగస్టులో నమోదైన రూ.29,328.62 కోట్లతో పోలిస్తే ఈ నిధుల ప్రవాహం 31 శాతం పెరిగింది. అయితే, ఇదే సమయంలో డెట్ మ్యూచువల్ ఫండ్స్ నుంచి రూ.1.83 లక్షల కోట్ల నిధులు బయటకు వెళ్లాయి.
వివరాలు
స్మాల్‌క్యాప్ ఫండ్స్‌లోకి అత్యధిక పెట్టుబడులు
ఆగస్టులో ఈ పథకాల నుంచి ఉపసంహరించుకున్న మొత్తం రూ.8,127.32కోట్లుగా ఉంది.
దీంతో సెప్టెంబర్ నెలలో అన్ని రకాల మ్యూచువల్ ఫండ్స్‌లో కలిపి నికరంగా రూ.1,33,214.25 కోట్ల పెట్టుబడులు వెనక్కి వెళ్లాయి.
ఆగస్టులో ఈ నికర ఉపసంహరణలు రూ.41,368.05 కోట్లుగా నమోదయ్యాయి.
ఈక్విటీ మ్యూచువల్ ఫండ్స్ విభాగంలో స్మాల్‌క్యాప్ పథకాలు అత్యధిక పెట్టుబడులను ఆకర్షించాయి.
వరుసగా మూడో నెల కూడా ఈ ఫండ్స్‌లోకి నిధుల ప్రవాహం కొనసాగింది.
ఆగస్టులో స్మాల్‌క్యాప్ ఫండ్స్‌లోకి రూ.7,973 కోట్ల పెట్టుబడులు రాగా.. సెప్టెంబర్‌లో ఈ మొత్తం రూ.9,038 కోట్లకు చేరింది.
స్మాల్‌క్యాప్ ఫండ్స్ తర్వాత మిడ్‌క్యాప్, ఫ్లెక్సీక్యాప్ పథకాలు అధిక పెట్టుబడులను అందుకున్నాయి.
సెప్టెంబర్‌లో మిడ్‌క్యాప్ ఫండ్స్‌లోకి రూ.7,834 కోట్లు, ఫ్లెక్సీక్యాప్ ఫండ్స్‌లోకి రూ.6,701 కోట్ల నిధులు వచ్చాయి.
వివరాలు
గోల్డ్, సిల్వర్ ఈటీఎఫ్‌ల్లోకీ పెట్టుబడులు
మరోవైపు లార్జ్‌క్యాప్ ఫండ్స్ నుంచి వరుసగా రెండో నెల కూడా పెట్టుబడులు బయటకు వెళ్లాయి.
సెప్టెంబర్‌లో ఈ పథకాల నుంచి రూ.859 కోట్ల నిధులు ఉపసంహరణకు గురయ్యాయి.
ఈక్విటీ, డెట్ ఫండ్స్‌తో పాటు విలువైన లోహాలకు సంబంధించిన ఎక్స్ఛేంజ్ ట్రేడెడ్ ఫండ్స్ (ఈటీఎఫ్‌)లోనూ పెట్టుబడులు నమోదయ్యాయి.
సెప్టెంబర్ నెలలో గోల్డ్ ఈటీఎఫ్‌ల్లోకి రూ.4,450 కోట్ల నిధులు వచ్చాయి. సిల్వర్ ఈటీఎఫ్‌లు రూ.1,974 కోట్ల పెట్టుబడులను ఆకర్షించాయి. ఈ వివరాలను యాంఫీ వెల్లడించింది.