Ask Google Pay: గూగుల్ పేలో జెమినీ ఏఐ ఎంట్రీ.. మీ ఖర్చులకు చెక్, పొదుపుకు స్మార్ట్ సలహాలు
ఈ వార్తాకథనం ఏంటి
డిజిటల్ చెల్లింపుల్లో దేశవ్యాప్తంగా అత్యధికంగా వినియోగించే యాప్లలో గూగుల్ పే ఒకటి. ఇప్పటి వరకు డబ్బులు పంపడం, బిల్లులు చెల్లించడం, రీఛార్జ్లు చేయడం వంటి సేవలకు పరిమితమైన ఈ యాప్.. ఇకపై వ్యక్తిగత ఆర్థిక నిర్వహణలోనూ వినియోగదారులకు తోడ్పడనుంది. ఇందుకోసం గూగుల్ తన అత్యాధునిక ఆర్టిఫిషియల్ ఇంటెలిజెన్స్ (AI) మోడల్ జెమినీ ఆధారంగా రూపొందించిన కొత్త ఫీచర్లను గూగుల్ పేలో ప్రవేశపెట్టింది. వీటి ద్వారా వినియోగదారులు తమ నెలవారీ ఖర్చులను విశ్లేషించడంతో పాటు, డబ్బు ఆదా చేసే మార్గాలపై ఏఐ నుంచి సూచనలు కూడా పొందే అవకాశం ఉంటుంది.
వివరాలు
'ఆస్క్ గూగుల్ పే' అంటే ఏమిటి?
గూగుల్ పేలో అందుబాటులోకి వచ్చిన 'ఆస్క్ గూగుల్ పే' (Ask Google Pay) అనేది జెమినీ ఏఐ ఆధారంగా పనిచేసే స్మార్ట్ ఫైనాన్స్ అసిస్టెంట్.
యూపీఐ లావాదేవీలు, రోజువారీ ఖర్చులను విశ్లేషించి వినియోగదారులకు తమ ఆర్థిక పరిస్థితిపై స్పష్టమైన అవగాహన కల్పించడమే దీని ప్రధాన ఉద్దేశం.
సాధారణంగా యూపీఐ ద్వారా ఎన్నో చెల్లింపులు చేసిన తర్వాత.. "గత నెలలో ఎక్కువ డబ్బు ఎక్కడ ఖర్చైంది?", "ఏ విభాగంలో అనవసర ఖర్చులు పెరిగాయి?" వంటి వివరాలను తెలుసుకోవడం చాలా మందికి కష్టంగా ఉంటుంది.
ఈ కొత్త ఏఐ అసిస్టెంట్ అలాంటి ప్రశ్నలకు వెంటనే సమాధానాలు అందిస్తూ ఖర్చులపై పూర్తి విశ్లేషణను చూపిస్తుంది.
వివరాలు
ఖర్చుల విశ్లేషణతో పాటు మరిన్ని సేవలు
ఈ ఏఐ చాట్బాక్స్ ద్వారా కేవలం ఖర్చుల వివరాలే కాకుండా, డబ్బు పొదుపు చేసేందుకు ఉపయోగపడే సూచనలు కూడా పొందవచ్చు.
అలాగే వ్యక్తిగత ఖర్చుల విధానానికి అనుగుణంగా సరిపోయే క్రెడిట్ కార్డులపై సమాచారం,ఎస్ఐపీ (SIP) పెట్టుబడులకు సంబంధించిన వివరాలు, సీబిల్ స్కోర్కు సంబంధించిన సమాచారాన్ని కూడా అడిగి తెలుసుకునే అవకాశం కల్పించారు.
తెలుగు సహా 10 భారతీయ భాషల్లో సేవలు
ఈ ఫీచర్ను కేవలం టైప్ చేయడం ద్వారానే కాకుండా, వాయిస్ కమాండ్ల ద్వారా కూడా ఉపయోగించవచ్చు.
ప్రారంభ దశలోనే తెలుగు సహా మొత్తం 10 భారతీయ భాషల్లో ఈ సేవలను గూగుల్ అందుబాటులోకి తీసుకొచ్చింది.
వివరాలు
కొంతమంది గూగుల్ పే వినియోగదారులకు ప్రయోగాత్మకంగా అందుబాటులోకి..
ఉదాహరణకు.. "గత వారం నా ఖర్చులను విశ్లేషించు", "నా అవసరాలకు ఏ క్రెడిట్ కార్డ్ అనుకూలంగా ఉంటుంది?" వంటి ప్రశ్నలను అడిగితే, ఏఐ తక్షణమే సమాధానాలు అందిస్తుంది.
ప్రస్తుతం ఈ ఫీచర్ను భారతదేశంలో ఎంపిక చేసిన కొంతమంది గూగుల్ పే వినియోగదారులకు ప్రయోగాత్మకంగా అందుబాటులోకి తీసుకొచ్చారు.
దశలవారీగా త్వరలోనే అన్ని వినియోగదారులకు విస్తరించనున్నారు.
వివరాలు
కొంతమంది గూగుల్ పే వినియోగదారులకు ప్రయోగాత్మకంగా అందుబాటులోకి..
ఈ సేవలను గూగుల్ డిఫాల్ట్గా అందరికీ ఆన్ చేయలేదు. వినియోగదారులు స్వచ్ఛందంగా అనుమతి (Opt-in) ఇచ్చిన తర్వాతే ఈ ఫీచర్ పనిచేస్తుంది. దీనిని ప్రారంభించేందుకు..
గూగుల్ పే యాప్ను ఓపెన్ చేయాలి.
Settings > Privacy & Security > Data and Personalisation విభాగంలోకి వెళ్లాలి.
అక్కడ Personalisation ఆప్షన్ను ON చేయాలి.
అనంతరం హోమ్ స్క్రీన్లోని Money ట్యాబ్లోకి వెళ్లి "Ask About Your Finances" విభాగంలో ఉన్న "Ask a Question" ఎంపికపై క్లిక్ చేసి ఏఐతో సంభాషణ ప్రారంభించవచ్చు.
వివరాలు
డేటా భద్రతపై గూగుల్ స్పష్టత
పర్సనలైజేషన్ను ఆన్ చేసిన తర్వాత వినియోగదారుల లావాదేవీలు, సేవ్ చేసిన పేమెంట్ విధానాలు, గూగుల్ అకౌంట్ సమాచారం, సీబిల్ రిపోర్ట్కు సంబంధించిన డేటాను విశ్లేషించి అవసరమైన సమాధానాలను ఏఐ అందిస్తుంది.
అలాగే చాట్ హిస్టరీని 42 రోజుల వరకు వీక్షించే అవకాశం కూడా ఉంటుంది. అవసరమైతే ఎప్పుడైనా పర్సనలైజేషన్ను తిరిగి ఆఫ్ చేసుకునే సౌకర్యాన్ని కూడా గూగుల్ కల్పించింది.
వివరాలు
డేటా భద్రతపై గూగుల్ స్పష్టత
ఈ కొత్త ఫీచర్లో వినియోగదారుల ఆర్థిక సమాచారం పూర్తిగా సురక్షితంగా ఉంటుందని గూగుల్ వెల్లడించింది.
ఈ సేవ ద్వారా సేకరించే ఆర్థిక సమాచారాన్ని గూగుల్ పే వ్యవస్థలో మాత్రమే వినియోగిస్తామని, ఇతర ఏఐ మోడళ్లకు శిక్షణ ఇవ్వడానికి ఉపయోగించబోమని కంపెనీ స్పష్టం చేసింది.
అలాగే బ్యాంకు ఖాతా నంబర్లు, డెబిట్ లేదా క్రెడిట్ కార్డు వివరాలు వంటి అత్యంత సున్నితమైన సమాచారాన్ని Ask Google Pay నిల్వ చేయదని తెలిపింది.
యాప్ పనితీరును మెరుగుపరిచేందుకు చేసే విశ్లేషణల్లో కూడా వినియోగదారుల వ్యక్తిగత గుర్తింపును పూర్తిగా గోప్యంగా ఉంచే అత్యాధునిక ప్రైవసీ ప్రమాణాలను పాటిస్తున్నట్లు వెల్లడించింది.
వివరాలు
ఎస్బీఐతో కొత్త కార్డు
ఈ కొత్త ఏఐ ఫీచర్లతో పాటు, స్టేట్ బ్యాంక్ ఆఫ్ ఇండియా (ఎస్బీఐ) భాగస్వామ్యంతో రూపే నెట్వర్క్ ఆధారంగా పనిచేసే Google Pay Flex SBI Cardను కూడా భారత మార్కెట్లో గూగుల్ ఆవిష్కరించింది.
ఈ కార్డు ద్వారా వినియోగదారులకు మరిన్ని డిజిటల్ చెల్లింపు, క్రెడిట్ సదుపాయాలు అందుబాటులోకి రానున్నాయి.