Scotch whisky market: అమెరికాను వెనక్కి నెట్టి స్కాచ్ విస్కీ మార్కెట్‌లో భారత్ అగ్రస్థానం
ఈ వార్తాకథనం ఏంటి
స్కాచ్ విస్కీ మార్కెట్‌లో భారత్ సరికొత్త రికార్డు సృష్టించేందుకు సిద్ధమవుతోంది. ఇప్పటికే విక్రయించే బాటిళ్ల సంఖ్య పరంగా ప్రపంచంలోనే అతిపెద్ద మార్కెట్‌గా ఉన్న భారత్.. త్వరలోనే విలువ పరంగా కూడా అగ్రస్థానానికి చేరుకోవచ్చని స్కాచ్ విస్కీ అసోసియేషన్ అంచనా వేస్తోంది. ప్రస్తుతం ఈ విభాగంలో ముందున్న అమెరికాను భారత్ అధిగమించే అవకాశం ఉందని పేర్కొంది. భారత్-యూకే మధ్య కుదిరిన స్వేచ్ఛా వాణిజ్య ఒప్పందం (ఎఫ్‌టీఏ), దేశంలో ప్రీమియం మద్యం ఉత్పత్తులకు పెరుగుతున్న డిమాండ్ ఈ మార్పునకు ప్రధాన కారణాలుగా నిలుస్తున్నాయి.
వివరాలు
తగ్గిన సుంకాలు.. పెరగనున్న అమ్మకాలు!
భారత్-యూకే మధ్య కుదిరిన స్వేచ్ఛా వాణిజ్య ఒప్పందం జులై 15 నుంచి అమల్లోకి వచ్చింది.
ఇందులో భాగంగా స్కాచ్ విస్కీ దిగుమతులపై గతంలో ఉన్న 150 శాతం కస్టమ్స్ సుంకాన్ని కేంద్ర ప్రభుత్వం 75 శాతానికి తగ్గించింది.
రాబోయే పదేళ్లలో ఈ సుంకాన్ని దశలవారీగా 40 శాతానికి తీసుకురావాలని నిర్ణయించింది.
దిగుమతి సుంకాలు తగ్గడంతో స్కాచ్ విస్కీ ధరలు తగ్గే అవకాశం ఉందని పరిశ్రమ వర్గాలు భావిస్తున్నాయి.
దీంతో మరింత మంది వినియోగదారులు ప్రీమియం మద్యం ఉత్పత్తుల వైపు మొగ్గు చూపుతారని అంచనా వేస్తున్నాయి.
ఈ ప్రభావం ఇప్పటికే కొన్ని రాష్ట్రాల్లో కనిపిస్తున్నట్లు నివేదికలు వెల్లడించాయి. కొన్ని బ్రాండ్ల ధరలు 6 నుంచి 15 శాతం వరకు తగ్గినట్లు పేర్కొన్నాయి.
వివరాలు
రూ.3,614 కోట్ల విలువైన ఎగుమతులు
గణాంకాల ప్రకారం.. 2025లో భారత్‌కు స్కాచ్ విస్కీ ఎగుమతుల విలువ 286 మిలియన్ పౌండ్లుగా నమోదైంది.
భారత కరెన్సీలో ఇది సుమారు రూ.3,614 కోట్లకు సమానం. ఈ ఎగుమతులు దాదాపు 220 మిలియన్ బాటిళ్లతో సమానమని అంచనా.
ప్రస్తుతం విలువ పరంగా చూస్తే అమెరికా, ఫ్రాన్స్ తర్వాత భారత్ మూడో అతిపెద్ద స్కాచ్ విస్కీ ఎగుమతి మార్కెట్‌గా కొనసాగుతోంది.
అయితే దిగుమతి సుంకాల తగ్గింపుతో ఈ పరిస్థితిలో మార్పులు వచ్చే అవకాశం ఉందని పరిశ్రమ వర్గాలు భావిస్తున్నాయి.
వివరాలు
దేశీయ కంపెనీల ఆందోళన.. పోటీకి సిద్ధం
మరోవైపు దిగుమతి సుంకాల తగ్గింపుపై భారత ఆల్కహాలిక్ బేవరేజ్ కంపెనీల సమాఖ్య (సీఐఏబీసీ) ఆందోళన వ్యక్తం చేస్తోంది.
దేశీయంగా తయారయ్యే మద్యం ఉత్పత్తులు, విదేశాల నుంచి దిగుమతి చేసుకునే ఉత్పత్తుల మధ్య సమానమైన పోటీ ఉండేలా పన్నుల విధానాన్ని రూపొందించాలని కోరుతోంది.
కేవలం దిగుమతి సుంకాలు తగ్గించినంత మాత్రాన వినియోగదారులకు విక్రయించే తుది ధరలు పూర్తిగా తగ్గవని సమాఖ్య స్పష్టం చేస్తోంది.
రాష్ట్ర ప్రభుత్వాలు విధించే పన్నులు, పంపిణీ ఖర్చులు, రిటైలర్ల లాభాల మార్జిన్లు కూడా ధరలను ప్రభావితం చేస్తాయని పేర్కొంటోంది.
వివరాలు
దేశీయ కంపెనీల ఆందోళన.. పోటీకి సిద్ధం
ఇదిలా ఉండగా.. విదేశీ స్కాచ్ విస్కీ బ్రాండ్ల నుంచి పోటీ పెరుగుతుండటంతో దేశీయ తయారీదారులు తమ వ్యాపార వ్యూహాలను మార్చుకుంటున్నారు.
దిగుమతి చేసుకున్న ఉత్పత్తులతో పోటీ పడేందుకు డిస్టిలేషన్, మెచ్యూరేషన్, నాణ్యత మెరుగుదల వంటి అంశాలపై భారీగా పెట్టుబడులు పెడుతున్నారు.
ముఖ్యంగా ప్రీమియం విభాగంలో తమ బ్రాండ్లకు ప్రత్యేక గుర్తింపు తీసుకురావడంపై దృష్టి సారిస్తున్నారు.
మొత్తంగా భారత్-యూకే వాణిజ్య ఒప్పందం, దిగుమతి సుంకాల తగ్గింపు, ప్రీమియం మద్యం ఉత్పత్తులకు పెరుగుతున్న ఆదరణతో భారత స్కాచ్ విస్కీ మార్కెట్‌లో పోటీ మరింత పెరిగే అవకాశం ఉందని విశ్లేషకులు భావిస్తున్నారు.
ధరలు, వినియోగదారుల అభిరుచులు, దేశీయ కంపెనీల వ్యూహాల్లో రానున్న రోజుల్లో కీలక మార్పులు చోటుచేసుకోవచ్చని అంచనా వేస్తున్నారు.