Nvidia: ఎన్విడియాలో జెన్సన్ హువాంగ్ వారసులకు రూ.21 కోట్ల వేతనం.. ఒకరు పేస్ట్రీ చెఫ్.. మరొకరు బార్ ఓనర్!
ఈ వార్తాకథనం ఏంటి
ప్రపంచంలోనే అతిపెద్ద చిప్ తయారీ సంస్థ ఎన్విడియా సీఈఓ జెన్సన్ హువాంగ్ కుటుంబం ఇప్పుడు వార్తల్లో నిలిచింది. ఆయన వ్యక్తిగత జీవితానికి సంబంధించిన వివాదాల నేపథ్యంలో కంపెనీ బోర్డు స్వతంత్ర దర్యాప్తునకు సిద్ధమైనట్లు వార్తలు వస్తున్నాయి. ఈ క్రమంలో ఎన్విడియాలో పనిచేస్తున్న ఆయన ఇద్దరు వారసుల వేతనాలపై కూడా చర్చ మొదలైంది. జెన్సన్ హువాంగ్, ఆయన భార్య లోరీ హువాంగ్‌కు ఇద్దరు పిల్లలు. కుమార్తె మాడిసన్ హువాంగ్, కుమారుడు స్పెన్సర్ హువాంగ్ ఇద్దరూ ప్రస్తుతం ఎన్విడియాలో కీలక బాధ్యతలు నిర్వహిస్తున్నారు. కంపెనీ 2026 ఆర్థిక సంవత్సరానికి సంబంధించిన నివేదిక ప్రకారం.. వీరిద్దరికీ కలిపి 2.55 మిలియన్ డాలర్లు (సుమారు రూ.21 కోట్లకు పైగా) వేతనంగా అందింది.
వివరాలు
మాడిసన్ హువాంగ్ ఎవరు?
జెన్సన్ హువాంగ్ కుమార్తె మాడిసన్ హువాంగ్ విద్యాభ్యాసం,తొలి ఉద్యోగం టెక్నాలజీ రంగానికి పూర్తిగా భిన్నమైనది.
న్యూయార్క్‌లోని క్యులినరీ ఇన్‌స్టిట్యూట్‌లో రెస్టారెంట్ నిర్వహణ, హాస్పిటాలిటీ మేనేజ్‌మెంట్‌లో డిగ్రీ పూర్తి చేశారు.
అనంతరం లండన్‌లోని లీ కార్డన్ బ్లూ సంస్థలో వైన్, గ్యాస్ట్రోనమీ, మేనేజ్‌మెంట్‌లో డిప్లొమా పొందారు.
లండన్ బిజినెస్ స్కూల్‌లో ఎంబీఏ కూడా పూర్తి చేశారు. ఎన్విడియాలో చేరకముందు లూయీ విట్టన్ వంటి లగ్జరీ బ్రాండ్ల సంస్థ ఎల్‌వీఎంహెచ్‌లో మార్కెటింగ్, వ్యాపార అభివృద్ధి విభాగాల్లో పనిచేశారు.
ప్రస్తుతం ఎన్విడియాలో ఫిజికల్ ఏఐ ప్లాట్‌ఫామ్‌లకు సంబంధించిన ప్రొడక్ట్, టెక్నికల్ మార్కెటింగ్ సీనియర్ డైరెక్టర్‌గా ఉన్నారు.
2026 ఆర్థిక సంవత్సరంలో ఆమెకు 1.232 మిలియన్ డాలర్లు (సుమారు రూ.10.3 కోట్లు) వేతనం అందింది.
వివరాలు
స్పెన్సర్ హువాంగ్ ఎవరు?
జెన్సన్ కుమారుడు స్పెన్సర్ 2012లో చికాగోలోని కొలంబియా కాలేజీలో మార్కెటింగ్, కల్చరల్ ఆర్ట్స్ చదివారు.
అనంతరం తైవాన్‌లోని నేషనల్ తైవాన్ యూనివర్సిటీలో చైనీస్ భాష నేర్చుకున్నారు.
2014లో తైపీ నగరంలో ఆర్‌అండ్‌డీ కాక్‌టెయిల్ ల్యాబ్ పేరుతో బార్‌ను ప్రారంభించారు. దాదాపు ఏడేళ్లపాటు దాన్ని నిర్వహించారు.
2021లో న్యూయార్క్ యూనివర్సిటీలో ఏఐ (కృత్రిమ మేధ)కు సంబంధించిన అంశాలతో ఎంబీఏలో చేరారు.
ప్రస్తుతం ఎన్విడియాలో రోబోటిక్స్ విభాగానికి ప్రొడక్ట్ డైరెక్టర్‌గా పనిచేస్తున్నారు.
రోబోలు వర్చువల్ వాతావరణంలో పనులు నేర్చుకుని, వాస్తవ ప్రపంచంలో వాటిని అమలు చేసేలా సాంకేతిక పరిజ్ఞానాన్ని అభివృద్ధి చేయడం ఆయన బాధ్యత.
2026 ఆర్థిక సంవత్సరంలో ఆయనకు 1.32 మిలియన్ డాలర్లు (సుమారు రూ.11 కోట్లు) వేతనంగా అందింది.
వివరాలు
మూడేళ్లలో భారీగా పెరిగిన వేతనాలు
కంపెనీ నివేదికల ప్రకారం.. 2023 ఆర్థిక సంవత్సరంలో మాడిసన్ వేతనం గరిష్ఠంగా 1.65 లక్షల డాలర్లు ఉండగా, 2026 నాటికి 12.32 లక్షల డాలర్లకు పెరిగింది.
అంటే 600 శాతానికి పైగా వృద్ధి నమోదైంది. స్పెన్సర్ వేతనం కూడా 1.30 లక్షల డాలర్ల గరిష్ఠ పరిమితి నుంచి 13.2 లక్షల డాలర్లకు చేరింది.
ఇది 900 శాతానికి పైగా పెరుగుదల. అయితే, 2023 నాటి మొత్తాలు కచ్చితమైన వేతనాలు కాకుండా గరిష్ఠ పరిమితులని కంపెనీ నివేదిక స్పష్టం చేసింది.
ఉద్యోగుల వేతనాలను సమాన హోదాల్లో పనిచేసే ఇతర ఉద్యోగుల జీతాల ప్రమాణాల ఆధారంగా నిర్ణయిస్తామని, ఇందులో జెన్సన్ హువాంగ్ జోక్యం ఉండదని ఎన్విడియా పేర్కొంది.