John Ternus: జాన్ టెర్నస్ నాయకత్వంలో ఆపిల్ ఫైనాన్షియల్ పాలసీలో కీలక మార్పులు
ఈ వార్తాకథనం ఏంటి
అమెరికాకు చెందిన ప్రముఖ టెక్నాలజీ సంస్థ ఆపిల్లో కీలక నాయకత్వ మార్పుకు రంగం సిద్ధమవుతోంది. సంస్థ ప్రస్తుత హార్డ్వేర్ చీఫ్ జాన్ టెర్నస్, 2026 సెప్టెంబర్ 1 నుంచి కొత్త సీఈవోగా బాధ్యతలు చేపట్టనున్నారు. ఈ నిర్ణయాన్ని గత నెలలో అధికారికంగా ప్రకటించగా, ప్రస్తుత సీఈవో టిమ్ కుక్ స్థానంలో టెర్నస్ బాధ్యతలు స్వీకరించనున్నారు. ఈ మార్పుతో సంస్థ ఆర్థిక వ్యూహంలో కూడా కీలక మార్పులు చోటుచేసుకునే అవకాశముందని అంతర్జాతీయ మీడియా సంస్థ బ్లూమ్బెర్గ్ వెల్లడించింది.
వివరాలు
షేర్హోల్డర్ల లాభాల నుంచి పెట్టుబడుల వైపు మలుపు
టిమ్ కుక్ నేతృత్వంలో ఆపిల్ సంస్థ ప్రధానంగా షేర్ బైబ్యాక్స్, డివిడెండ్ల ద్వారా షేర్హోల్డర్లకు లాభాలు అందించే వ్యూహాన్ని అనుసరించింది. అయితే జాన్ టెర్నస్ నాయకత్వంలో ఈ విధానం మారే అవకాశముంది. భవిష్యత్ ఉత్పత్తుల అభివృద్ధి, నైపుణ్యాలున్న ప్రతిభను ఆకర్షించేందుకు కంపెనీ తన నిధులను మరింతగా వినియోగించే దిశగా అడుగులు వేయొచ్చని విశ్లేషకులు భావిస్తున్నారు.
వివరాలు
'నెట్ క్యాష్ న్యూట్రాలిటీ' లక్ష్యానికి ముగింపు?
2018 నుంచి ఆపిల్ సంస్థ క్యాష్, అప్పుల మధ్య సమతుల్యతను కాపాడే 'నెట్ క్యాష్ న్యూట్రాలిటీ' లక్ష్యాన్ని అనుసరిస్తోంది. అయితే ఇటీవల నిర్వహించిన ఆర్థిక ఫలితాల సమావేశంలో సంస్థ సీఎఫ్ఓ కెవాన్ పరేఖ్ ఈ లక్ష్యాన్ని ఇకపై అధికారికంగా కొనసాగించబోమని తెలిపారు. ఈ నిర్ణయం వెనుక టెర్నస్ ప్రభావం ఉన్నట్టుగా సమాచారం. దీంతో సంస్థ భవిష్యత్ పెట్టుబడులకు మరింత స్వేచ్ఛ లభించే అవకాశం ఉంది.
వివరాలు
ఆపిల్ భవిష్యత్ ఉత్పత్తులపై టెర్నస్ సంకేతాలు
భవిష్యత్తులో ఆపిల్ ఉత్పత్తులపై జాన్ టెర్నస్ ఉత్సాహాన్ని వ్యక్తం చేశారు. రాబోయే రోజుల్లో కొత్త ఉత్పత్తుల వరుసను తీసుకురానున్నట్టు సంకేతాలిచ్చారు. ముఖ్యంగా ఫోల్డబుల్ ఐఫోన్ (iPhone Fold)పై ఊహాగానాలు వినిపిస్తున్నాయి. అలాగే కృత్రిమ మేధస్సు (AI) ఆధారంగా మెరుగైన సిరి సేవలను అందించే దిశగా కంపెనీ పని చేస్తోంది. నా 25 ఏళ్ల ఆపిల్ కెరీర్లో ఇదే అత్యంత ఉత్సాహభరితమైన సమయమని టెర్నస్ గత నెలలో పేర్కొన్నారు. ఈ మార్పులతో ఆపిల్ భవిష్యత్ వ్యూహం, ఉత్పత్తుల అభివృద్ధి దిశలో కీలక మలుపు తిరిగే అవకాశం ఉందని నిపుణులు అభిప్రాయపడుతున్నారు.