LPG Price Hike: దసరా ముందు ప్రజలకు బిగ్ షాక్.. భారీగా పెరిగిన గ్యాస్ సిలిండర్ ధరలు
ఈ వార్తాకథనం ఏంటి
పండుగ సీజన్‌ మొదలయ్యే వేళ వ్యాపారులకు ఎల్పీజీ ధరల పెంపు అదనపు భారంగా మారింది. అక్టోబర్‌ 1 నుంచి ప్రభుత్వ రంగ చమురు మార్కెటింగ్‌ సంస్థలు (OMCలు) 19 కేజీల వాణిజ్య ఎల్పీజీ సిలిండర్ల ధరలను పెంచాయి. అయితే ఇళ్లలో వంటకు వినియోగించే 14.2 కేజీల గృహ వినియోగ సిలిండర్ల ధరల్లో మాత్రం ఎలాంటి మార్పు చేయలేదు.
వివరాలు
ఢిల్లీలో రూ.62.50 పెంపు
దేశ రాజధాని ఢిల్లీలో 19 కేజీల వాణిజ్య ఎల్పీజీ సిలిండర్ ధర రూ.62.50 పెరిగి రూ.2,810కి చేరింది.
సెప్టెంబర్‌ ప్రారంభంలోనూ ఇదే సిలిండర్ ధర రూ.9.50 పెరిగింది. దీంతో వరుసగా రెండో నెలలోనూ వాణిజ్య గ్యాస్ ధర పెరిగినట్లయింది.
ఈ పెంపుతో హోటళ్లు, రెస్టారెంట్లు, చిన్న వ్యాపారాలు నిర్వహించే వారికి ఇంధన వ్యయం మరింత పెరగనుంది.
బిహార్‌ రాజధాని పాట్నాలో వాణిజ్య సిలిండర్‌పై గరిష్ఠంగా రూ.71.50 వరకు పెంపు నమోదైంది.
వివరాలు
తెలుగు రాష్ట్రాల్లోనూ పెరిగిన ధరలు
వాణిజ్య ఎల్పీజీ ధరల పెంపు తెలుగు రాష్ట్రాలపైనా ప్రభావం చూపింది.
హైదరాబాద్‌లో 19 కేజీల వాణిజ్య సిలిండర్ ధర రూ.11 పెరిగి రూ.2,996కి చేరింది.
ఆంధ్రప్రదేశ్‌లో మాత్రం ఏకంగా రూ.69 పెరగడంతో కొత్త ధర రూ.3,001గా ఉంది.
స్థానిక పన్నులు, రవాణా ఖర్చుల్లో తేడాల కారణంగా దేశంలోని వివిధ ప్రాంతాల్లో పెంపు రూ.60 నుంచి రూ.71.50 మధ్య నమోదైంది.
వివరాలు
గృహ సిలిండర్ ధరలో మార్పు లేదు
వాణిజ్య సిలిండర్ల ధరలు పెరిగినప్పటికీ గృహ వినియోగదారులకు మాత్రం ఊరట లభించింది.
రోజువారీ వంటకు ఉపయోగించే 14.2 కేజీల ఎల్పీజీ సిలిండర్ ధరలను చమురు సంస్థలు యథాతథంగా కొనసాగించాయి.
హైదరాబాద్‌లో ఈ సిలిండర్ ధర రూ.994గా ఉంది. ఆంధ్రప్రదేశ్‌లో రూ.966.50 వద్ద కొనసాగుతోంది.
ఢిల్లీలో రూ.942, ముంబైలో రూ.941.50, చెన్నైలో రూ.957.50, లక్నోలో రూ.979.50, పాట్నాలో రూ.1,031.50గా ఉంది.
రవాణా సవాళ్లు ఎక్కువగా ఉండే లేహ్‌లో గృహ సిలిండర్ ధర రూ.1,179గా ఉంది.
వివరాలు
ఎలా నిర్ణయిస్తారు?
ఎల్పీజీ సిలిండర్ల ధరలను నిర్ణయించడంలో అంతర్జాతీయ మార్కెట్‌ పరిస్థితులు కీలక పాత్ర పోషిస్తాయి.
క్రూడ్‌ ఆయిల్‌, ఎల్పీజీ ప్రామాణిక అంతర్జాతీయ ధరలతో పాటు డాలర్‌తో రూపాయి మారకం విలువను పరిగణనలోకి తీసుకుంటారు.
ఇండియన్‌ ఆయిల్‌ వివరాల ప్రకారం.. చమురు మార్కెటింగ్‌ సంస్థలు గత నెలలో నమోదైన సగటు అంతర్జాతీయ ధరలను లెక్కించి, ప్రతి నెలా ఒకటో తేదీన కొత్త ల్యాండింగ్‌ ధరలను ప్రకటిస్తాయి.
గృహ వినియోగదారులకు ప్రభుత్వం అండ
అంతర్జాతీయ మార్కెట్‌లో ఎల్పీజీ ధరల్లో మార్పులు వచ్చినా గృహ వినియోగ సిలిండర్ల ధరలపై వాటి ప్రభావం నేరుగా పడకుండా ప్రభుత్వం చర్యలు తీసుకుంటోంది.
వంటగ్యాస్‌ను నిత్యావసరంగా పరిగణిస్తూ సామాన్యులపై భారం తగ్గించేలా ధరలను స్థిరంగా ఉంచే విధానాన్ని అనుసరిస్తోంది.
వివరాలు
ఉజ్జ్వల లబ్ధిదారులకు రూ.300 వరకు సబ్సిడీ
ప్రధానమంత్రి ఉజ్జ్వల యోజన (PMUY) లబ్ధిదారులకు కూడా ప్రభుత్వం ఆర్థికంగా సహాయం అందిస్తోంది.
అర్హులైన లబ్ధిదారులకు ప్రతి 14.2 కేజీల సిలిండర్‌పై, ప్రభుత్వం నిర్ణయించిన వార్షిక రీఫిల్ల పరిమితిలో రూ.300 వరకు సబ్సిడీని నేరుగా బ్యాంకు ఖాతాల్లో జమ చేస్తోంది.
దీంతో అర్హత ఉన్న పేద కుటుంబాలకు వంటగ్యాస్‌ ఖర్చు కొంత మేర తగ్గుతోంది.