ఆఫీసుకు రాకుంటే కఠిన చర్యలు తప్పవు; ఉద్యోగులకు మెటా హెచ్చరిక
వర్క్ ఫ్రమ్ హోమ్ చేస్తున్న ఉద్యోగులకు మార్క్ జూకర్ బర్గ్ నేతృత్వంలోని మెటా కీలక హెచ్చరికలు జారీ చేసింది. ప్రతి వారం కనీసం మూడు రోజులు ఆఫీసులకు రావాల్సిందేనని స్పష్టం చేసింది. కొత్త నిబంధనలను పాటించలేని వారు తమ ఉద్యోగాలను కోల్పోయే అవకాశం ఉందని హెచ్చరించింది. ఈ మేరకు మెటా హెచ్ఆర్ చీఫ్ గోలెర్ ఉత్తర్వులు జారీ చేశారు. సెప్టెంబర్ 5 నుంచి కార్యాలయానికి కేటాయించిన ఉద్యోగులు వారానికి కనీసం మూడు రోజులు భౌతికంగా హాజరు కావాలని ఆయన ఆ ఉత్తర్వుల్లో పేర్కొన్నారు. ఆఫీసుకు రాకుండా, పదేపదే ఉల్లంఘనలకు పాల్పడితే ఉద్యోగాలు కోల్పోతారని మెటా సంస్థ హెచ్చరించింది. అయితే ఉద్యోగులు వస్తున్నారో, లేదో చూసుకోవాల్సిన మేనేజర్లదేనని కంపెనీ సూచించింది.