పెట్రోల్, డీజిల్‌ను రూ. 1 తక్కువే అమ్ముతాం: నయారా ఎనర్జీ
ఈ వార్తాకథనం ఏంటి
దేశంలోని అతిపెద్ద ప్రైవేట్ ఇంధన రిటైలర్ అయిన 'నయారా ఎనర్జీ ' ప్రభుత్వ యాజమాన్యంలోని సంస్థలు విక్రయించే ధర కంటే రూ.1 తక్కువకు పెట్రోల్, డీజిల్‌ను విక్రయించడం ప్రారంభించినట్లు అధికారులు తెలిపారు. అంతర్జాతీయంగా ధరలు తగ్గినప్పటికీ ప్రభుత్వ యాజమాన్యంలోని ఇండియన్ ఆయిల్ కార్పొరేషన్ (ఐఓసీ), భారత్ పెట్రోలియం కార్పొరేషన్ లిమిటెడ్ (బీపీసీఎల్), హిందుస్థాన్ పెట్రోలియం కార్పొరేషన్ లిమిటెడ్ (హెచ్‌పీసీఎల్) సంస్థలు పాత రేట్లకే పెట్రోల్, డీజిల్‌ను విక్రయిస్తున్నాయి. ఈ క్రమంలో ప్రైవేట్ ఇంధన రిటైలర్లు వినియోగదారులకు ప్రయోజనాలను అందించడం కోసం ధరలను తగ్గిస్తున్నాయి. దేశీయ వినియోగాన్ని మరింత ఉత్తేజపరిచేందుకు, వినియోగదారులను ఆర్థిక ప్రయోజనాలు కల్పించేందుకు జూన్ 2023 చివరి వరకు మా రిటైల్ అవుట్‌లెట్‌లలో రూ.1 తగ్గింపు ఆఫర్‌ను అమలు చేస్తామని ప్రకటించారు.
పెట్రోల్
దేశంలోని పెట్రోల్ పంపుల్లో 7 శాతానికి పైగా వాటా నయారా ఎనర్జీదే
భారత ఇంధన అవసరాలకు బలమైన భాగస్వామిగా ఉండాలని తాము విశ్వసిస్తున్నామని చెప్పారు. భారతదేశంలోని 86,925పెట్రోల్ పంపుల్లో 7శాతానికి పైగా వాటా నయారా ఎనర్జీ సంస్థదే కావడం గమనార్హం. ఈ నెల ప్రారంభంలో రిలయన్స్ ఇండస్ట్రీస్ లిమిటెడ్ ఆధర్వంలోని జీయో-బీపీ ఇంధన రిటైలర్ రూ.1 తగ్గించిన తర్వాత, తాజాగా నయారా ఎనర్జీ సంస్థ వెల్లడించడం గమనార్హం. రిలయన్స్-బీపీ డీజిల్ ధరను మాత్రమే తగ్గించగా, నయారా డీజిల్, పెట్రోల్ రెండింటినీ తక్కువ ధరలకు విక్రయిస్తోంది. గతేడాది ఉక్రెయిన్‌పై రష్యా యుధ్దం నేపథ్యంలో అంతర్జాతీయంగా చమురు ధరలు పెరిగినప్పుడు ప్రభుత్వ రంగ సంస్థలు రిటైల్ ధరలను స్తంభింపజేశాయి. ఆ తర్వాత అంతర్జాతీయంగా చమురు ధరలు తగ్గుముఖం పట్టినప్పటికీ, గతేడాది చవిచూసిన నష్టాలను పూడ్చుకునేందుకు ధరలను సవరించడం లేదు.